Read Paite Chin NAMBARS 28 Bible Online

NAMBARS 28 - Paite Chin bible

NAMBARS 28

¹Huan, TOUPA’N Mosi a houpih a:

²Israel suante thupia inla, a kiang uah, kei adia gimlim mei a thillat, ka kiang a thillat pen a hungeih in na lan ding uh ahi, a chi hi.

³A kiang uah, Hiai mei a thillat TOUPA kiang a na lat ding uh ahi. Belamnoupa, kum khat a upa, gensiatbei, ni teng in nih, haltum thillat a lat gige ding ahi.

⁴Belamnou khat zingsang in na lan ding ua, khat nitaklam in na lan ding uh.

⁵Tangbuang thillat ding in tangbuang nelte ephah mun sawm a khen, mun khat sathau suk hin mun li a khen, mun khat a hel toh.

⁶TOUPA adia mei a thillat, gimlim dia Sinai tang a sehsa haltum thillat lat gige ding ahi.

⁷Belamnou khat latna a dawn thillat, hin mun li a khen, mun khat ahi ding ahi. TOUPA adia uain, dawn thillat Mun Siangthou ah na sungkhe ding ahi.

⁸Belamnou khat nitaklam in na lan dia; zingsang lam a tangbuang thillat bang in leh dawn thillat bang in TOUPA adia gimlim ding in mei a thillat na lan ding ahi.

⁹Sabbath ni’n belamnoupa kum khat a upa, gensiatbei nih leh tangbuang thillat ading in tangbuang nelte ephah mun sawm a khen, mun nih sathau a helkhawm leh dawn thillat toh na lat ding ahi.

¹⁰Hiai Sabbath teng a haltum thillat lat gige leh dawn thillat simlouh a haltum thillat lat ding ahi.

¹¹Na kha thak teng un TOUPA adia haltum thil na lat ding uh ahi. Bawngtal nih leh belampa khat leh belamnoupa kum khat a upa gensiatbei sagih.

¹²Bawngtal chih ah tangbuang thillat ding in tangbuang nelte sathau a helkhawm ephah mun sawm a khen, mun thum; belam khat a tangbuang thillat ah tangbuang nelte, sathau a helkhawm mun sawm a khen, mun nih.

¹³Belamnou chih ah tangbuang thillat ah tangbuang nelte, sathau a helkhawm mun sawm a khen, mun khat. Hiai haltum thillat gimlim TOUPA adia mei a thillat ahi.

¹⁴A dawn thillat uh bawngtal khat ah uain hin kimkhat ahi dia, belampa khat ah hin mun thum a khen, mun khat, belamnou khat ah hin mun li a khen, mun khat. Hiai kumtawn a kha teng a haltum thillat ahi.

¹⁵TOUPA kiang a khelh thoihna dia kelpa khat na lat ding uh ahi. Haltum thillat lat gige leh huai dawn thillat simlouh in.

¹⁶A kha khatna, ni sawmlehli ni TOUPA Paikan ahi.

¹⁷Huai kha ni sawmlehnga ni Ankuanglui ni ahi dia; ni sagih sung tanghou silngou sohlouh nekding ahi.

¹⁸Ni khat ni’n khawmpi siangthou a om dia; nna himhim na sem ding uh ahi kei.

¹⁹Mei a thillat bel TOUPA kiang a na lat ding uh ahi. Bawngpa tung nih leh belampa khat leh belamnoupa kum khat a upa sagih; na ngaihtuah ua gensiatbei ahi ding ahi.

²⁰Tangbuang nelte, sathau helkhawm, a tangbuang thillat utoh: bawngtal khat ah mun sawm a khen, mun thum belampa khat ah mun sawm a khen, mun nih.

²¹Belamnou sagih bel belamnou khat ah mun sawm a khen, mun khat ahi ding ahi.

²²Nou adia kilemna bawlna ding khelh thoihna ding in kelpa khat.

²³Hiaite zingsang a haltum thillat dawn thillat simlouh a lat gige ding ahi.

²⁴Hichibang in Toupa adia gimlim, mei a thillat nekding ni teng in, ni sagih sung na lan ding uh ahi; haltum thillat lat gige leh dawn thillat simlouh in.

²⁵A ni sagih ni’n khawmpi siangthou na nei ding ua, nna himhim na sem ding uh ahi kei.

²⁶Na nipikal Ankuangluina, na buh thak tung Ankuangluina TOUPA adia thil thak tangbuang thillat na lat ni un leng khawmpi siangthou na nei ding ua; nna himhim na sem ding uh ahi kei.

²⁷TOUPA adia gimlim haltum thillat bel na lat ding uh ahi; bawngpa tuai nih, belampa khat, belamnoupa kum khat a upa sagih;

²⁸A tangbuang thillat uh, tangbuang nelte sathau a helkhawm, bawngtal khat ah mun sawm a khen a mun thum.

²⁹Belampa khat ah mun sawm a khen a mun nih, belamnou sagih, belamnou khat chiat ah mun sawm a khen, a mun khat.

³⁰Nou adia kilemna bawlna ding kelpa khat toh.

³¹Haltum thillat gige leh huai a tangbuang thillat, huaite dawn thillat toh na lat ding uh ahi, na ngaihtuah ua gensiatbei ahi ding ahi.