Read Paite Chin NAMBARS 29 Bible Online

NAMBARS 29 - Paite Chin bible

NAMBARS 29

¹Huan, a kha sagihna, a ni khat ni’n khawmpi siangthou na nei ding ua; nna himhim na sem ding uh ahi kei; nou ading in pengkul mut ni ahi ding ahi.

²TOUPA adia gimlim ding in haltum thillat na lan ding uh ahi: Bawngpa tung khat, belampa khat, belamnoupa kum khat a upa gensiatbei sagih.

³A tangbuang thillat uh, tangbuang nelte sathau a helkhawm, Bawngpa khat ah mun sawm a khen, mun thum, belampa khat ah mun sawm a khen, mun nih,

⁴belamnou sagih, khat chiat ah mun sawm a khen, mun khat.

⁵Nou adia kilemna bawlna ding in khelh thoihna kelpa khat toh.

⁶Kha thak haltum thillat leh huai tangbuang thillatte, haltum thillat lat gige leh huai a tangbuang thillat, dawn thillat, a hih dan ngeina uh TOUPA adia gimlim ding a mei a thillatte simlouh in.

⁷Hiai a kha sagihna, ni sawm ni’n khawmpi siangthou na nei ding uh. Na hinna uh zangsakin nna himhim nasem ding uh ahi kei.

⁸TOUPA adia gimlim ding in haltum thillat na lan ding uh ahi. Bawngpa khat, belampa khat, belamnoupa kum khat a upa sagih; na ngaihtuah ua gensiatbei ahi ding ahi.

⁹A tangbuang thillat uh, tangbuang nelte sathau a helkhawm, bawngtal khat ah mun sawm a khen, mun thum, belampa khat ah mun sawm a khen, mun nih.

¹⁰Belamnou sagih, belamnou khat chiat ah mun sawm a khen, mun khat.

¹¹Khelh thoihna ding in kelpa khat toh; kilemna dia khelh thoihna, haltum thillat lat gige, huai a tangbuang thillat leh a dawn thillat uh simlouh in.

¹²A kha sagihna, ni sawmlehnga ni’n khawmpi siangthou na nei ding ua; bang nna mahmah na sem ding uh ahi kei, TOUPA ading in ni sagih sung Ankuang na lui ding uh ahi.

¹³TOUPA adia gimlim ding in mei a thillat, haltum thillat na lat ding uh ahi. Bawngpa tuai sawmlehthum, belampa nih, belamnoupa kum khat a upa sawmlehli, huaite gensiatbei chiat a hih ding uh ahi:

¹⁴A tangbuang thillat uh sathau toh helkhawm bawngpa sawmlehthum, bawngpa khat ah mun sawm a khen, mun thum, belampa nih, belampa khat ah mun sawm a khen, mun nih.

¹⁵Belamnou sawmlehli, belamnou khat ah mun sawm a khen, mun khat.

¹⁶Khelh thoihna ding kelpa khat toh; haltum thillat lat gige, huai a tangbuang thillat, dawn thillat simlouh in.

¹⁷A ni nih ni’n bawngpa tuai sawmlehnih, belampa nih, belamnoupa kum khat a upa gensiatbei sawmlehli na lat ding uh ahi.

¹⁸A tangbuang thillat uh leh dawn thillat a dan bangtak in a tam dan bangzel un bawngpa ading, belampa ading leh belamnou ading.

¹⁹Khelh thoihna ding kelpa khat toh. Haltum thillat gige, huai a tangbuang thillat, dawn thillat simlouh in.

²⁰A ni thum ni’n bawngpa sawmlehkhat, belampa nih, belamnou kum khat a upa gensiatbei sawmlehli.

²¹A tangbuang thillat uh leh dawn thillat a dan bangtak in a tam dan bangzel un bawngpa ading, belampa ading leh belamnou ading.

²²Khelh thoihna ding kelpa khat toh; haltum thillat lat gige leh huai a tangbuang thillat leh huai a dawn thillat simlouh in.

²³A ni li ni’n bawngpa sawm, belampa nih, belamnoupa kum khat a upa gensiatbei sawmlehli.

²⁴A tangbuang thillat uh leh dawn thillat, a dan bangtak in a tamdan bangzel un bawngpa ading, belampa ading leh belamnou ading.

²⁵Khelh thoihna ding kelpa khat toh. Haltum thillat gige, huai a tangbuang thillat leh dawn thillat simlouh in.

²⁶A ni nga ni’n bawngpa kua, belampa nih, belamnoupa kum khat a upa gensiatbei sawmlehli.

²⁷A tangbuang thillat uh leh dawn thillat uh, a dan bangtak in a tam dan bangzel un a tangbuang thillat uh leh dawn thillat uh, a dan bangtak in a tamdan bangzel un, bawngpa ading, belampa ading leh belamnou ading.

²⁸Khelh thoihna ding kelpa khat toh; haltum thillat lat gige, huai tangbuang thillat leh huai dawn ding thillat simlouh in.

²⁹A ni guk ni’n bawngpa giat, belampa nih, belamnoupa kum khat a upa gensiatbei sawmlehli.

³⁰A tangbuang thillat uh leh dawn thillat a dan bangtak in a tam dan bangzel un bawngtal ading;

³¹Khelh thoihna ding kelpa khat toh; haltum thillat lat gige, huai a tangbuang thillat leh huai a dawn thillat simlouh in.

³²A ni sagih ni’n bawngpa sagih, belampa nih, belamnoupa kum khat a upa gensiatbei sawmlehli.

³³A tangbuang thillat uh leh dawn thillat, a dan bangtak in a tam dan bangzel un, bawngpa ading, belampa ading leh belamnou ading.

³⁴Khelh thoihna ding kelpa khat toh; haltum thillat lat gige, huai a tangbuang thillat leh huai a dawn thillat simlouh in.

³⁵A ni giat ni’n khawmpi siangthou tak na nei ding ua; nna himhim na sem ding uh ahi kei.

³⁶TOUPA adia gimlim ding in haltum thillat bel na lat ding uh ahi. Bawngpa khat, belampa khat, belamnoupa kum khat a upa gensiatbei sagih.

³⁷A tangbuang thillat uh leh dawn thillat uh, bawngpa ading, belampa ading leh belamnou ading, a dan bangtak in a tamdan bangzel un.

³⁸Khelh thoihna ding kelpa khat toh; haltum thillat lat gige leh huai a tangbuang thillat leh huai a dawn ding thillat simlouh in.

³⁹Na thuchiamte uh, ut thu a thillatte, na haltum thillatte uh, na tangbuang thillatte uh, na dawn thillatte uh, na kilemna thillatte uh sim lou in hiaite Ankuangluina hunbi nei a na neihte uh ni’n TOUPA kiang ah na lan ding uhi, chi in, a chi hi.

⁴⁰TOUPA’N Mosi thu a piak tengteng Mosi in Israel suante a hilh hi.