Read Paite Chin NAMBARS 3 Bible Online

NAMBARS 3 - Paite Chin bible

NAMBARS 3

¹TOUPA’N Sinai tang a Mosi a houpih lai a Aron leh Mosi suan hiaite ahi uh.

²Aron tapate min a upapen Nadab, Abihu, Eleazar leh Ithamar ahi.

³Hiaite siampu dia thaunilh, siampu nasem ding a sehtuam, Aron tapate min ahi.

⁴Nadab leh Abihu ahihleh Sinai gamdai a mei zatlouh ding a chih, TOUPA ma a a latlai un TOUPA ma ah a sita ua, ta a neikei uhi. Eleazar leh Ithamar in a pa uh Aron damlai in siampu na a sem uhi.

⁵TOUPA’N Mosi a houpih a:

⁶Levi chite, siampu Aron kiang ah pi inla, a na a septheihna ding un a kiang ah omsak in.

⁷Amau biakbuk a nasem in Kihoupihna puanin chin ah amah leh khawmpi tengteng ading in na a sem ding uhi.

⁸Kihoupihna puanin van tengteng a kem ding ua, Israel suante ading in biakbuk ah a sem ding uh.

⁹Levite Aron leh a tapate kiang ah na pe ding a; Israel suante lak a kipan amah kiang a piak ahi uhi.

¹⁰Aron leh a tapate na sep ding a, a siampu hihna na a sem nilouh ding uh. Midang hong kigolh a om leh hihlup ding ahi, a chi hi.

¹¹TOUPA’N Mosi a houpih a:

¹²Ngai in, Levite Israel suante lak apan Israel suante tachil sul hong masapen sik leh tang a keimah ngei in ka lak ahi uh. Huaiziak in, Levite kei a ahi ding uhi.

¹³Piang masa ta tengteng kei a ahi. Aigupta gam a piang masa tengteng ka thah ni’n Israelte lak a piang masa tengteng, a mihing leh gan tan in kei a tuam ding in ka kham ahi. Kei a ahi ding uh. Kei, TOUPA ka hi, a chi hi.

¹⁴Sinai gamdai ah TOUPA’N Mosi a houpih a:

¹⁵Levi tate a inkuan kuan un, akhang akhang un sim inla; pasal peuhmah kha khat apan a tunglam teng na sim ding ahi, a chi hi.

¹⁶Mosi in a hih ding a thupiak bang in TOUPA thu bang in a sim chiatta hi.

¹⁷Levi tapate min: Gershon, Kohath leh Merari ahi.

¹⁸Amau suangpa Gershon tapate min Libni leh Shimei ahi.

¹⁹Amau suangpa Kohath tapate min Amram, Izhar, Hebron leh Ujiel ahi.

²⁰Amau suangpa Merari tapate min Mali leh Musi ahi. Hiaite a inkuan uh bangzel a Levi suante ahi uh.

²¹Gershon, Libnite leh Simeite suangpa ahi a, hiaite Gershonte suante ahi uhi.

²²Pasal tengteng kha khat apan a tunglam a simte uh sang sagih leh za nga ahi uhi.

²³Gershonte suante’n a puanin uh biakbuk tumlam pang ah a kai ding uhi.

²⁴Gershonte inkuan a lupen Lael tapa Eliasaph ahi.

²⁵Gershon tate’n Kihoupihna puanin a a sep ding uh ahihleh biakbuk leh puanin, a tung, Kihoupihna puanin leh a kongkhak puanzak kep ahi ding a;

²⁶a intual puanzakte, biakbuk chin a, a intual kongkhak puanzak leh maitam kim a zat ding khau tengteng toh leng ahilai ding hi.

²⁷Kohath bel Amramte, Izharte, Hebronte leh Ujielte suangpa ahi a; hiai teng Kohath suante ahi uhi.

²⁸Pasal tengteng kha khat apan a tunglam a simdan bang un sang giat leh za guk ahi ua, Mun Siangthou a kem ding uhi.

²⁹Kohath tapate suante’n biakbuk simlam pang ah a puanin a kai ding uhi.

³⁰Kohathte suante inkuan a lupen ding Ujiel tapa Eliazaphan ahi.

³¹A kep dingte: bawm, dohkan, sathau, khawnvak koihna, maitam, Mun Siangthou a nasepna tuium-belsuan tengteng, puanzak leh huai a nasepna thil tengteng ahi.

³²Siampu Aron tapa Eleazar Levite lupen ahi ding a, Mun Siangthou kemmite a makaih ding hi.

³³Merari, Malite leh Musite suangpa ahi. Hiai Merari suante ahi uh.

³⁴Pasal tengteng kha khat apan a tunglam a simdan bang un sang guk leh za nih ahi uh.

³⁵Merari suante inkuan a lupen Abihail tapa Zuriel ahi a; biakbuk mallam pang ah a puanin a kai ding uhi.

³⁶Merari tapate kep ding a sehte biakbuk khuam lepkhawm, bang kal, a khuamte, a kingakna khuak kuak, a vanzat tengteng leh nasepna vanzat tengteng ahi uh.

³⁷A kongpi umna khuamte, a kingakna khuakkuakte, a kilhbelhna leh a khaute toh leng ahilai ding hi.

³⁸Biakbuk suahlam pang Kihoupihna puanin chin a, nisuahna lam a puanin kai ding ahihleh Mosi leh Aron leh a tapa ahi ding ua, Mun Siangthou ah Israel suante a tuam ding in a kul peuhpeuh a sem ding uh. Namdang hong kigolh peuhmah thah ding ahi, a chi hi.

³⁹TOUPA thupiak a Levite a inkuan kuan ua pasal tengteng kha khat apan a tunglam Mosi leh Aron in a sim teng uh sing nih leh sang nih ahi uh.

⁴⁰TOUPA’N Mosi kiang ah: Israel suante lak a piang masa, pasal kha khat apan a tunglam teng sim inla, a zah uh thei in.

⁴¹Israel suante lak a piang masa teng sik in kei ading in Levite n’on laksak dia, Israel suante gan tengteng a piang masapen sik in Levite gante, n’on laksak ding ahi, kei TOUPA ka hi, a chi hi.

⁴²Mosi in TOUPA’N thu a piak bang in Israel suante lak a piang masa teng a sim hi.

⁴³A min uh kizom bangzel in kha khat apan a tunglam piang masa pasal teng a sim a, sing nih leh sang nih leh za nih leh sawmsagih leh thum ahi uh.

⁴⁴TOUPA’N Mosi a houpih a:

⁴⁵Israel suante lak a piang masa teng sik in Levite la inla, a gan uh sik in Levite gan; Levite kei a ahi ding ua; kei TOUPA ka hi.

⁴⁶Levite sang a tamzawte lak ah tatding in Israel suante piang masa za nih leh sawmsagih leh thum la in.

⁴⁷Sekel nga chiat na la ding ahi; Mun Siangthou a sekel bang in na la ding hi, Sekel bel gerah sawmnih ahi:

⁴⁸A tatna sum val Aron leh a tapate na piak ding ahi, a chi hi.

⁴⁹Levite tatte ban ah a tatna sum uh Mosi in a la hi.

⁵⁰Israel suante piang masate lak apan sum a la a; sum siangthou sekel bang in sang khat leh za thum leh sawmguk leh nga a la hi.

⁵¹TOUPA’N Mosi thu a piak, TOUPA thu bang in Mosi in tatna sum Aron leh a tapate a pia hi.