Read Paite Chin NAMBARS 30 Bible Online

NAMBARS 30 - Paite Chin bible

NAMBARS 30

¹Huan, Mosi in Israel suan intekpente a houpih a: TOUPA’N thu a piak pentak hiai ahi.

²Mi’n TOUPA kiang a thu a chiam a ahihkeileh a thuchiam a kihen leh a thuchiam a bohse ding ahi kei. A kam a pawt bangbang a hih ding ahi.

³Numei in leng a nungak lai a, a pa inn a a omlai a, TOUPA kiang a thu a chiam a, a thuchiama a kihen a;

⁴a thuchiam leh a thuchiam a a kihenna a pa’n a zak a, a pa’n a daihsan maimah leh a thuchiam tengteng a paisuak ding ahi. A thuchiama a kihenna a om gige ding ahi.

⁵Himahleh a pa’n a zak ni a a phalkei leh a thuchiama a kihenna thuchiamte a koi mahmah a paisuak kei ding. A pa’n a phallouh ziak in TOUPA’N amah a ngaidam ding hi.

⁶Thuchiam min thu khuallou a, a henna a omlai a pasal a neih a;

⁷a pasal in a zak a, a zak ni a, a daih dide leh a thuchiam a om gige dia, thuchiama a henna leng a om gige ding.

⁸Himahleh a pasal in a zak ni a a phalkei leh a tung a thuchiam leh khuallou a a kihenna a mang dia, TOUPA’N amah a ngaidam ding.

⁹Himahleh meithai hiam, mak a omnu hiam thuchiam zaw, a henna tengteng in a delh gige ding.

¹⁰Inn a thu a chiam a, kichiam a a kihen leh,

¹¹A pasal in a zak a leng a daih dide a, a phallouh kei leh a thuchiam a om gige dia, kichiam a a kihenna leng a om gige ding hi.

¹²Himahleh a pasal in a zak ni a bangmahlou a bawl a, a hihmang leh a thuchiam hiam, kichiam a a kihenna a kam a thupawt peuhmah a om nawn kei ding. A pasal in a hihmang khinta ahi. TOUPA’N amah a ngaidam ding.

¹³Thuchiam tengteng leh hinna hihgim dia hen a kichiamna tengteng a pasal in a kipsak thei in a hihmang thei hi.

¹⁴Himahleh a pasal in a zak ni apan a deihdan leh a thuchiam tengteng leh a tung a henna om tengteng kipsak ahi a; a zak ni apan a daihsan ziak in a kipsak ahi.

¹⁵Himahleh a zak khitnung a bangmahlou a bawl a, a hihman leh a thulimlouhna mawh a puak ding ahi, a chi hi.

¹⁶Hiaite pasal leh a zi kal leh a pa inn a om gige lai a kikal ua dan dia TOUPA’N Mosi thu a piakte ahi uh.