Read Paite Chin NAMBARS 31 Bible Online

NAMBARS 31 - Paite Chin bible

NAMBARS 31

²“Midiante tung ah Israel suante phu la in. Huaikhit chiang in na chipihte kiang a pi na hita ding” a chi hi.

³Mosi in mipite a houpih a, “Midiante tung a TOUPA phulakna tangtun dia Midiante dou ding in na lak ua mi kigalvan uhen.

⁴Israel nam tengteng lak a namchih a mi sang khat zel kidouna a na kuan ding uh ahi” a chi hi.

⁵Huchi in Israelte sang tamtak lak apan, namchih apan sang khat chiat, kidouna a kuan ding in sepaih sing khat leh sang nih a pekhia uhi.

⁶Huchi in Mosi in chichih lak a mi sang khat chiat leh siampu Eleazar tapa Phinehas Mun Siangthou a tuium belsuante, thupiakna dia pengkulte tawi in kidouna ah a kuansak hi.

⁷TOUPA’N Mosi thu a piak bang in Midiante a dou ua; pasal teng a that uhi.

⁸A mithahte lak ah Midiante kumpipate leng a tel uh. Huai Midiante kumpipa ngate min, Evi, Rekem, Zur, Hur leh Reba ahi a, Beor tapa Balaam leng namsau in a that uhi.

⁹Israel suante’n Midiante numei teng leh a tate uh sal in a pi ua; a gan tengteng uh, a belamhon tengteng uh leh a van tengteng uh gallak in a la uhi.

¹⁰A omna khuate leh a giahna tengteng uh a halvek uhi.

¹¹Gallak tengteng, mihing leh gan tan in a paipih vek uhi.

¹²Salte, matte leh gallakte, Mosi, siampu Eleazar leh Israel suan omkhawmte kiang ah, Jeriko zawn Jordan gei Moab phaizang a giahphual uh a hontun uhi.

¹³Mosi, siampu Eleazar leh omkhawmte intek penpente’n giahphual pua ah a na dawn uhi.

¹⁴Sepaih heutu, sangte tung a heutute leh zate tung a heutute, kidouna apan hongtungte tung ah Mosi a heh hi.

¹⁵Mosi in a kiang uah, “Numei tengteng na hinghawi vek uh maw?

¹⁶Ngai un, Balaam lemtheih a Peor tung tang thu ah Israelte TOUPA tung a taleksak mite hiaite ahi uhi. TOUPA mi kikhawmte lak ah hipi a hongleng hi.

¹⁷Huaiziak in, naupangte lak a pasal tengteng that unla, pasal luppihsa numei teng leng that un.

¹⁸Numei naupang pasal luppih nailouh tengteng nou ading in hinghawi un.

¹⁹Giahphual pua ah ni sagih sung giak unla; kuapeuh mi that leh thah a om misi khoih peuhmah a ni thum ni leh a ni sagih ni’n kisiangsak un, noumau leh na salte uleng.

²⁰Van himhim leh savun a thilbawl tengteng, kelmul a thilbawl tengteng, sing a thilbawl tengteng thu ah na kisiangsak ding uh” a chi hi.

²¹Siampu Eleazar in kidouna a hoh kidou mite kiang ah, “Hiai TOUPA’N Mosi thu a piak danthuseh ahi.

²²Bangpeuh dangkaeng, dangkasik, dal, sik, langva leh ngen,

²³mei a hal a setheilou teng mei ah na tholh paisuak ding ua, huchi in a hong siangthou ding uh. Bang peuh, silsiang na tui a hih siangthou ding ahi. Mei a hal thuak theilou peuhmah tui a na tholh paisuak ding uh ahi.

²⁴A ni sagih ni’n na puan uh na sawp ding ua, na hong siang ding uh. Huaikhit in giahphual ah na honglut ding uh ahi” a chi hi.

²⁵TOUPA’N Mosi a houpih a:

²⁶“Nang, siampu Eleazar leh omkhawmte inkuan intekpente’n gallak a, a lak uh mihing leh gante simvek un.

²⁷Gallak mun nih ah khen un; kidouna a kuan kidoumite ading leh omkhawmte ading in.

²⁸Kidouna a kuan galdoumi apan TOUPA adia siah piak ding in mihing za nga zel ah khat, mihing apan, bawng apan, sabiltung apan leh belamhon apan sepkhia un.

²⁹Huaite a tan kimkhat ua pan la unla, TOUPA adia vei thillat ding in siampu Eleazar pia un.

³⁰Israel suante tan sawmnga apan khat, mihing apan, bawng apan, sabiltung apan, belamhon apan leh ganhon apan sepkhia inla, huaite TOUPA biakbuk kemmi Levite pia in” a chi hi.

³¹Huchi in TOUPA’N Mosi thu a piak bang in Mosi leh siampu Eleazar in a hih uhi.

³²Sepaihte’n a mat uh gallak simlouh a lak uh belam nuai guk leh sing sagih leh sang nga,

³³Bawng sing sagih leh sang nga,

³⁴Sabiltung sing guk leh sang khat,

³⁵Pasal kithuahpih nailou numei sing thum leh sang nih ahi uh.

³⁶A kimkhat, kidouna a kuante tantuan, belam nuai thum leh sing thum leh sang sagih leh za nga ahi.

³⁷TOUPA siah belam za guk leh sawmsagih leh nga ahi.

³⁸Bawng sing thum leh sang guk ahi a; huai a TOUPA siah sawmguk leh khat ahi.

³⁹Sabiltung sing thum leh za nga ahi; huai a TOUPA siah sawmguk leh khat ahi.

⁴⁰Mihing sing khat leh sang guk ahi ua; huai a TOUPA siah mi sawmthum leh nih ahi.

⁴¹TOUPA’N Mosi thu a piak bang in siah, TOUPA vei thillat Mosi in siampu Eleazar a pia hi.

⁴²Mosi in galdou mite apan a hawm Israel mite tantuan kimkhat galdou a kuante lak ah a hawm hi.

⁴³Mipi tantuan kimkhat belam nuai thum leh sing thum leh sang sagih leh za nga,

⁴⁴Bawng sing thum leh sang guk,

⁴⁵Sabiltung sing thum leh za nga,

⁴⁶Mihing sing khat leh sang guk ahi.

⁴⁷Israel tantuan kimkhat apan Mosi in mihing leh gan sawmnga zel ah khat a la a, TOUPA thupiak bang in TOUPA biakbuk kemmi Levite a pia hi.

⁴⁸Sepaihte tung a heutu, sangte tung a heutute, zate tung a heutute’n Mosi a va naih uh.

⁴⁹Mosi kiang ah, Na sikhate’n ka khut ua om kidou mite ka sim ua, kuamah kimlou ka omkei uhi.

⁵⁰Ka hinna ua dia TOUPA ma a kilemna bawlna dia TOUPA adia thillat mi’n a neih lam uh, dangkaeng a bawl zephoih van, khengawng a bulhte, khutngawng a bulhte, min sawnna zungbuhte, bilbahte, khite, k’on tawi uhi, a chi uh.

⁵¹Mosi leh siampu Eleazar in dangkaeng a bawl van tengteng a na sang uhi.

⁵²Sangte tung a heutute leh zate tung a heutute’n dangkaeng TOUPA kiang a vei thillat dia a lat tengteng uh sekel sing khat leh sang guk leh za sagih leh sawmnga ahi.

⁵³Galdou mite’n a gallak uh amau a chiat ding in a la ngal ua.

⁵⁴Mosi leh siampu Eleazar in sangte tung a heutu leh zate tung a heutute dangkaeng a la ua, Israel suante theihgigena ding in Kihoupihna puanin ah TOUPA ma ah a hontawi uhi.