Read Paite Chin NAMBARS 32 Bible Online

NAMBARS 32 - Paite Chin bible

NAMBARS 32

¹Reuben leh Gad tate’n gan a hau mahmah ua; Jazer gam leh Gilead gam a muh un, a mun gan adia hoihtak hi’n a thei uhi.

²Huchi in Gad tate leh Reuben tate’n Mosi, siampu Eleazar leh omkhawm mipite a va houpih uh.

³“Ataroth, Dibon, Jazer, Nimrah, Heshbon, Elealeh, Shebam, Nebo leh Beon,

⁴Israel omkhawmte ma a TOUPA’N a zoh gam gante ading in a hoih a na sikhate’n ganhonte ka nei uhi.

⁵Hoih na sakleh hiai gam ka luah ding un honpia inla, Jordan lui honpi galkai dah maive” a chi uhi.

⁶Mosi in Gad tate leh Reuben tate kiang ah, “Na unaute uh kidouna a kuan ding ua, nou bel hiai ah na om maimah ding uh maw?

⁷Bangdia TOUPA’N a piak gam a lutlou dia Israel suante lungtang lunglel sak na hi ua?

⁸Kadesh-barnea apan gam va enkhe dia ka sawl in na pate un hichi mah bang in a hih uhi.

⁹Eskol guam a tun touh un gam a va mu ua, TOUPA’N gam a piak a a lut noplouhna ding un Israel suante lungtang a lunglel sak uhi.

¹⁰Huai ni’n TOUPA a heh mahmah a, a kichiam a,

¹¹Aigupta gam apan hongpawt, kum sawmnih chiang tunglam mi himhim in Abraham, Isak leh Jakob, kiang a kichiam a, ka piak gam kuamah in a mu kei ding uh; a honzuih taktak louh ziak un.

¹²‘Keniz mi Jephunneh tapa Kaleb leh Nun tapa Joshua kia loungal, amau bel TOUPA a zuih taktak ziak un,’ a chi hi.

¹³Israelte tung ah TOUPA a heh mahmah a, TOUPA mitmuh a thil hoihlou hihmi suan tengteng a manthat vek masiah uh gamdai ah kum sawmli a vakvai sak hi.

¹⁴Ngai un, Israelte tung a TOUPA hehna lauhuai tak behlap in nou gilou in na pute uh sik in na dingta uhi.

¹⁵TOUPA zuilou a, na om himhim uleh aman amaute gamdai ah a omsak nawn ding hi. Hiai mi tengteng na hihmang mai kei ding u maw?” a chi hi.

¹⁶A vanaih ua, a kiang ah, “Hiai ah ka gan ua ding in belamhuangte leh ka tate uh ading in khua ka sat ding uh.

¹⁷Kou bel a mun ding uh ka tut masiah uh Israel suante ma a pai ding in ka kigalvan ding uhi. Hiai gam a mite ziak in ka tate uh kulh nei khuate ah a teng ding uh.

¹⁸Israel suante michih in a mun luah ding a luahchiat ma un ka inn uah ka paikik kei ding uh.

¹⁹Ka luah ding uh bel hiai lam gal Jordan suahlam a hih ziak in Jordan galkhat lam leh a khen lam zaw ka luahpih sam kei ding uh” a chi uhi.

²⁰Mosi in a kiang uah, “Huchibang na chih ua, galdou dia TOUPA ma a kuan dia na kigalvat ua,

²¹TOUPA ma a gam zoh a hih masiah na lak ua kigalvan tengteng TOUPA ma a Jordan na galkah vek ua, a ma a melmate a delhkhiak mateng leh

²²Toupa ma a gam lak a om a, huaikhit chiang a na kiknawn ding uleh TOUPA leh Israelte ma ah na mohpuakna ua pan na siangta ding ua, TOUPA ma ah hiai gam na luah ding uhi.

²³Himahleh huchibang a na hihkei uleh, ngai un, TOUPA tung ah na khial uh ahi dia, na khelhna un a hon mukhe ngeingei ding chih thei un.

²⁴Na tate uh ading in khuate sat unla, na belamte uh ading in leng huangte bawl unla, na gen bangbang un hih un” a chi hi.

²⁵Gad tate leh Reuben tate’n Mosi kiang ah, “Na sikhate’n ka toupa uh thupiak bang in ka hih ding uh.

²⁶Ka zi, ka tate uh, ka belamhonte uh leh ka ganhon tengteng uh Gilead gam khuate ah a na om ding uh.

²⁷Himahleh na sikha, kidou dia kigalvan tengteng in ka toupa uh gen bang in TOUPA ma ah ka va galkah ding uh” chi in, a gen uhi.

²⁸Huchi in Mosi in, a tungtang thu uah siampu Eleazar, Nun tapa Joshua leh Israel nam inkuan intekpente thu a pia hi.

²⁹Mosi in a kiang uah, “Gad tate, Reuben tate leh galdou dia kigalvan tengteng in TOUPA ma a Jordan lui a hong galkah pih ua, huai gam na zoh uleh Gilead gam pen a luah ding ua na piak ding uh ahi.

³⁰Himahleh kigalvana a hong galkah pihkei uleh Kanan gam ah na lak uah a telmai ding uh” a chi hi.

³¹Gad tate leh Reuben tate’n, “A sikha kiang a TOUPA’N a gen bang in ka hih ding uh.

³²Kigalvan a TOUPA ma a galkah in Kanan gam ah ka lut ding ua, ka gamluah ding uh Jordan luikhen lam ah ahilai ding” chi in a dawng uhi.

³³Mosi in Gad tate, Reuben tate leh Joseph tapa Manasseh suan nam kimkhatte Amor kumpipa Sihon gam, Bashan Kumpipa Og gam, huai gamte a khua tengteng toh, a kim gam a khuate nangawn toh a pia hi.

³⁴Gad tate’n Dibon, Ataroth, Aroer;

³⁵Atroth leh Shophan, Jazer, Jogbehah;

³⁶Beth Nimrah leh Beth Haran a lam ua, khopi kulhneite, belam huangte toh.

³⁷Reuben tate’n Heshbon, Elealeh, Kirjathaim,

³⁸Nebo leh Baal meon, a minte khek khit ahi, leh Sibma a lam ua; a khosatte uh min dang a phuak uhi.

³⁹Manasseh tapa Makir tate Gilead gam ah a hoh ua, a la ua, huai a teng Amorte a hawlkhia uhi.

⁴⁰Mosi in Gilead gam Manasseh tapa Makir a pia a; huai ah a teng hi.

⁴¹Manasseh tapa Jair in huai a khuate a vala a, Havothjair a sa hi.

⁴²Nobah in Kenath a vala a, a khopelte toh, amah min tam in Nobah a sa hi.