Read Paite Chin NAMBARS 34 Bible Online

NAMBARS 34 - Paite Chin bible

NAMBARS 34

¹Huan, TOUPA’N Mosi a houpih a:

²Israel suante thu pia inla, a kiang uah, Kanan gam na tun chiang un, Kanan gam, a gamgi dan dungzui zel a na luah ding gam uh,

³simlam na luah ding chiang uh Jin gamdai apan Edom gam zulzul ahi dia, simlam gamgi Chi Tuipi tawp apan suahlam pang ahi ding.

⁴Na gamgi uh Akrabbim tung kahna simlam pang ah a kawi dia, a hong pawtna Kadesh-barnea simlam ah ahi dia, Hazaraddar ah a pai dia, Azmon ah a pai zel ding.

⁵Gamgi Azmon apan Aigupta lui tan in a kawi dia, a tunna tuipi ah ahi ding.

⁶Tumlam pang ah tuipi thupi a gamgi ding in na tang ding ua, hiai tumlam a na gamgi uh ahi ding.

⁷Hiai mallam a na gamgi uh ahi ding. Tuipi lian apan Hor tang huap in na bawl ding uh.

⁸Hor tang apan Hamath lutna tan in na bawl dia, gamgi tunna bel Zedad ah ahi ding hi.

⁹Gamgi Jiphron ah a pai zel dia, a tunna Hazarenan ah ahi ding. Hiai mallam a na gamgi uh ahi ding hi.

¹⁰Suahlam a na gamgi uh Hazarenan apan Shepham tan in na bawl ding uh.

¹¹Gamgi Shepham apan Riblah tan in Ain suahlam pang ah a suk pai dia; huchi in gamgi a pai suksuk dia, Kinereth tuipi suahlam pang a sun ding.

¹²Gamgi Jordan ah a paisuk dia, a tunna Chi Tuipi ah ahi dia hiai a kimvel a gamgi paidan bang in na gam uh ahi ding, chi in, a chi hi.

¹³Mosi in Israel suante thu a pia a, Hiai TOUPA’N nam kua leh a kimkhatte piak dia thu a piak aisan a na luah ding gam uh ahi.

¹⁴Reuben tate nam in a inkuan uh dungzui zel leh Gad tate nam in a inkuan uh dungzui zel leh Manasseh nam kimkhat in leng a gam luah ding uh a tangta ngal ua.

¹⁵Nam nih leh nam kimkhatte’n a gam luah ding uh ni suahna lam Jeriko zawn Jordan gal suahlam ah a tangta uh, a chi hi.

¹⁶TOUPA’N Mosi a houpih a:

¹⁷Luah dia gam hon khennen pihte min hiaite ahi. Siampu Eleazar leh Nun tapa Joshua.

¹⁸Gam luahdia khennen ding in namchih apan a intekpen khat chiat na tel ding ahi, a chi hi.

¹⁹Huai mite min bel hiaite ahi. Judah nam a mi Jephunneh tapa Kaleb.

²⁰Simeon tate nam a mi Amihud tapa Semuel.

²¹Benjamin nam a mi Kislon tapa Elidad.

²²Dan tate nam lak a intek pen Jogli tapa Bukki.

²³Joseph tate lak a mi, Manasseh tate nam intek pen Ephod tapa Haniel.

²⁴Ephraim tate nam lak a intek pen Sitan tapa Kemuel.

²⁵Zebulun tate nam lak a intek pen Parnak tapa Elizaphan.

²⁶Issakar tate nam lak a intek pen Azan tapa Paltiel.

²⁷Asher tate nam lak a intek pen Selomi tapa Ahihud.

²⁸Naphtali tate nam lak a intek pen Ammihud tapa Padahel.

²⁹Hiaite Kanan gam a Israel suante gam luah ding hawm dia TOUPA’N thu a piakte ahi uhi.