Read Paite Chin NAMBARS 35 Bible Online

NAMBARS 35 - Paite Chin bible

NAMBARS 35

¹Huan, Jeriko zawn Jordan gei, Moab phaizang ah TOUPA’N Mosi a houpih a:

²Israel suante thu pia inla, a gam uah Levite tenna ding khuate bawlsak uhen. A gante uh tatna ding in khaw dainawl kim Levite na piak ding uh ahi.

³Khuate a tenna ding uh ahi dia, a kimte bel bawng leh a gante leh a ganvulh tengteng ading ahi.

⁴Levite na piak ding dainawl khaw kulh apan tong sang khat a sau ahi ding ahi.

⁵Kulh pawlam apan na teh dia, suahlam pang ah tong sang nih, mallam pang ah tong sang nih, khopi bel a laitak ah a om ding ahi. Hiai amau dainawl tuam ahi ding.

⁶Levite na piak ding khuate lak ah tualthatte taina ding kihumbitna khopi guk ahi dia; huaite lou khua sawmli leh nih na piaklai ding uh ahi.

⁷Levite na piak ding khua tengteng khua sawmli leh giat ahi ding. Dainawl toh na piak ding uh ahi.

⁸Israel suante luah khua na piak dan ding, mi tamte na pe tam dia, a tawmte na pe tawm ding ahi. Michih in a luah uh gam tamdan dungzui a khua Levite na piak ding uh ahi, a chi hi.

⁹TOUPA’N Mosi a houpih a:

¹⁰Israel suante houpih inla, a kiang uah,

¹¹Jordan lui na galkah ua Kanan gam na lut chiang un kihumbitna khua na sep ding uh ahi, tualthat kha mi taina ding in.

¹²Huai khuate, phulami apan na kihumbitna khua uh, omkhawmte ma a vaihawmsak dia adin ma a tualthatmi a sihlouhna ding ahi.

¹³Nou adia kihumbitna ding na sehte uh khopi guk ahi ding.

¹⁴Jordan gal ah khopi thum na sep ding ua, Kanan gam ah khopi thum na sep ding ua, kihumbitna khopite ahi ding uhi.

¹⁵Israel suante leh namdang leh a kiang ua tengte ading in hiai khopi gukte kihumbitna ahi dia, huai ah kuapeuh mi that kha a tailut ding ahi.

¹⁶Himahleh mi kuahiam in sik a mi a sat a, a sih leh tualthat ahi a, tualthat bel hihlup ngeingei ding ahi.

¹⁷Si khop a suang a mi a den a, a sih leh tualthat ahi a, tualthat bel hihlup ngeingei ding ahi.

¹⁸Ahihkeileh mi khat in mi khat thei sing in deng henla, sita leh tualthat ahi a, tualthat bel hihlup ngeingei ding ahi.

¹⁹Sisan phulami’n tualthatmi a that dia, a muh peuh chiang in a that ding ahi.

²⁰Mi khat peuh in huatna toh tupkholhna nei in midang khat sawn henla, ahihkeileh tupmawng in banghiam in deng henla, huai mi sita leh;

²¹Ahihkeileh kimelmakna nei in a khuttum in tum henla, huai mi sita leh a hihlumpa hihlup ngeingei ding ahi. Amah tualthat ahi a, sisan phulami in a thah ding ahi.

²²Himahleh kimelmakna nei hilou a, kuahiam khat in midang a sawn khak ahihkeileh tup mawng hilou a amah a den khak a,

²³ahihkeileh amah mulou a, amah that thei suang a tung a a khiaka, amah a sih leh a melma leng hilou a, hihnat tum leng hilou a hih ziak in.

²⁴Omkhawmte’n hiai vaihawmna dan bang in a hihlummi leh sisan phulami vai a hawmsak ding uh ahi:

²⁵Omkhawmte’n tualthatmi sisan phulami apan a humbit ding ua, omkhawmte’n a taina, a kihumbitna khua ah a tengsak ding ua, sathau siangthou nilh a om siampu lian a sih mateng huailai khua ah a teng ding hi.

²⁶Himahleh chiklaipeuh in tualthatmi a taina, a kihumbitna khaw gamgi pawlam a pai a;

²⁷sisan phulami in a kihumbitna khaw pawlam a a muh a, sisan phulami in a thah leh a sisan ah mawh a pawkei ding.

²⁸Siampu lian a sih mateng a kihumbitna khua ah a teng gige ding a, himahleh siampu a sih in bel tualthatmi a tenna gam ah a paikik ding ahi.

²⁹Hiai thilte na suante uh tan a na tenna peuh ua na vaihawm dan ding uh ahi.

³⁰Kuapeuh in mi a thah leh tualthatmi pen theihpihte kam apan thupawt a hihlup ding ahi. Himahleh theihpih khat kia mi hihlupna ding in a hun kei.

³¹Tualthatmi na tan ding uh ahi kei. Sihna khop a mawh ahi a, hihlup ngeingei ding ahizaw.

³²Siampu sih ma in, kihumbitna khua a tailut kuapeuh a gam a sawl kiknawn dia tatna sum na lak ding uh ahi kei.

³³Huchi in na tenna gam uh na hih thanghuai kei ding ua, sisan in gam a hih thanghuai leh sisan suahna gam hih thanghuai silna ding in a suahmi sisan kia lou lah zattheih ahi ngal kei a.

³⁴Na tenna gam uh, ka omna na hih thanghuai ding uh ahi kei. Kei TOUPA lah Israel suante lak ah ka om ngal a, chi in, a chi hi.