Read Paite Chin NAMBARS 36 Bible Online

NAMBARS 36 - Paite Chin bible

NAMBARS 36

¹Huan, Joseph inkuanpihte lak a mi, Manasseh tapa Makir tapa Gilead tate inkuan intekpente lak a mite’n a honnaih ua, Mosi leh heutu, Israel suante intekpente ma ah thu a gen uhi.

²“TOUPA’N ka toupa Israel suante aisan a, a luah ding uh gam pe ding in thu a pia hi. TOUPA’N ka toupa, ka unaupa uh Jelophehad gam a tanute pe ding in nang thu a honpia hi.

³Amau Israel suante lak a mi, namdang kuapeuh tate a va kitenpih uleh, ka pi leh pute uh gam a luah uh laksak a, a kitenpih uh namte gam toh gawm ding ahi dia; huchibang in ka gam tantuan ua kipan lakkhiak a ahi ding hi

⁴Israel suante Jubili a hongtun chiang in a gam uh a va kitenpih uh namte gam toh gawm ding ahi dia; huchi in ka pi le pute uh gam apan amau gam lakhek a honghi ding hi” a chi uh.

⁵Mosi in, TOUPA thu bang in Israel suante thu a pia a; “Joseph tate nam in a gen dik uhi.

⁶Jelophehad tanute tungtang thu a TOUPA’N thu a piak pen hiai ahi. Hoih a saksak uh kitenpih uhen la, himahleh a pate uh nam pih lak a mi ngei a kitenpih ding uh ahi, a chi hi.

⁷Huchi in Israel suante gam pen namdang kiang a suan ahi kei ding. Israel suante’n a pi leh pu uh nam gam a neih gige ding uh ahi.

⁸Israel suante lak a gouluah ding tanu peuhmah Israel suante’n a pi leh pute uh gam a luahchiat zel theihna ding un a pa nampih lak a mi zi a hih ngeingei ding ahi.

⁹Huchi in gam bel namdang kiang a suan ahi kei ding hi. Israel suante’n amau gam chiat a tang gige ding uh ahi ngal a’ ” a chi hi.

¹⁰TOUPA’N Mosi thu a piak bang in Jelophehad tanute’n a hih uhi.

¹¹Jelophehad tanu Mahlah, Tirzah, Hoglah, Milkah leh Noah te’n a pa uh unau tapate a kitenpih uhi.

¹²Joseph tapa Manasseh tapate a kitenpih ua, a gam uh a pa uh nam ah a om gige hi.

¹³Hiaite TOUPA’N Mosi zang a Jeriko zawn Jordan gal a Moab phaizang a Israel suante a piak, thupiakte leh vaihawmdante ahi uhi.