Read Paite Chin NAMBARS 4 Bible Online

NAMBARS 4 - Paite Chin bible

NAMBARS 4

²Levi tate lak a Kohath tate, a khang a khang un, a inkuan kuan un, simvek in,

³Kum sawmthum apan a tunglam, kum sawmnga tan in nasepna, Kihoupihna puanin a sem ding teng.

⁴Kihoupihna puanin Mun Siangthou pen a Kohath tapate nasep ding hiaite ahi.

⁵Giahphual a suan ding teng un Aron, a tapate toh a lut ding ua, Mun Siangthou puanzak a hawkkhe ding ua, huai in thukhun bawm a khuh ding uh.

⁶Huai pen ngalvang vun in a khuh ding ua, puandum buang in leng a khuh ding ua, a zawnna chiang a thuah ding uhi.

⁷Etsakna tanghou dohkan tung ah puandum buang a phah ding ua, huai ah kuangte, keute, belhbute leh noute butkhiakna ding a koih ding uhi. Tatlak lou in tanghou koih huai ah a om ding ahi.

⁸Huai pen puansan in a khuh ding ua; a khuhna ngalvang vun in a khuh ding uh, a zawnna chiang a thuah ding uhi.

⁹Vaksak khawnvak koihna leh huai adia a zat ding ua khawnvakte, a taitehte, a vu koihnate, thau bing tengteng puandum buang in a khuh ding uhi.

¹⁰Huai leh a vanzat tengteng a khuhna ngalvang vun a khuh in a zawnna ah a koih ding uhi.

¹¹Dangkaeng maitam puandum buang in a khuh ding ua, a khuhna ngalvang vun in a khuh nawn ding uh, a zawnna chiang a thuah ding uhi.

¹²Mun siangthou, a vanzat leh tuium-belsuan tengteng a la vek ding ua, puandum buang in a tun ding ua, a khuhna ngalvang vun in a khuh ding uh, a zawnna ah a koih ding uhi.

¹³Maitam a meivu a lamang ding ua, a tung ah puansandup a phah ding uhi.

¹⁴A tung ah a nasep vialvialna uh tuium-belsuan tengteng, mei laknate, sa thukna sikkhutte, vutluahnate, tuikuangte leh maitam tuium-belsuan tengteng a koih ding uhi. A khuhna ngalvang vun in a khuh ding ua, a zawnna a bulh ding uh.

¹⁵Aron leh a tapate’n Mun Siangthou leh Mun Siangthou van tengteng om mun suan dia a khuh khit chiang un; huaikhit chiang in a zawng ding in Kohath tapate a hongpai ding uhi. Himahleh thil siangthou himhim a khoih ding uh ahi kei, huchilou in zaw a si kha ding uhi. Hiaite Kihoupihna puanin a Kohath tapate nasep ding ahi.

¹⁶Siampu Aron tapa Eleazar sep ding, det ding thau, gim namtui, niteng a tangbuang thillat, nilhchi thau, biakbuk, huai a thil om tengteng, Mun Siangthou leh a vante ngaihtuah ahi, a chi hi.

¹⁷TOUPA’N Mosi leh Aron a houpih a:

¹⁸Kohath suan inkuan zaw Levite lak apan satkhe kei un.

¹⁹Himahleh thil siangthoute khoihlou a, silou a a om theihna ding uh hichibang ahi. Aron leh a tapate lut uhenla, a sep ding uh leh a tantuam ding chiat uh sehsak uhen.

²⁰Himahleh a kikhuh lai teng thil siangthoute en ding in lut kei uhen, a lut uleh a si ding uh, a chi hi.

²¹TOUPA’N Mosi a houpih a:

²²Gershon tapate leng a inkuan kuan un, a khang a khangun simvek in.

²³Kum sawmthum apan a tunglam kum sawmnga a upa tan in nasepna Kihoupihna puanin a semthei ding teng zah simvek in.

²⁴Gershon suante tantuam naseplam leh puaklam hiai ahi.

²⁵Biakbuk puanzakte, kihoupihna puanin, a khuhnate, a tung khuhna ngalvang vun, Kihoupihna puanin kongkhak puanzak;

²⁶intual puanzakte, intual kongkhak puanzakte, a biakbuk leh maitam bul a, a khaute leh a vanzat tengteng uh toh a pua ding ua, sep dia kiphamoh peuhmah a sem ding uh hi.

²⁷Gershon suante nasep, a seplam leh puaklam ah a tantuan tengteng uh Aron leh a tapate’n a sep ding ua; a hih ding uh banghiam nengneng tan a sehsakin huaite a sem ding uhi.

²⁸Huaite Kihoupihna puanin a Gershon suante nasep ahi. A hih ding uh siampu Aron tapa Ithamar seh ding ahi.

²⁹Merari tapate, a khang a khangun, a inkuan kuan un na sim ding ahi.

³⁰Kum sawmthum apan a tunglam kum sawmnga a upa tan in Kihoupihna puanin a sem ding zah na simvek ding ahi.

³¹Kihoupihna puanin a a nasep uh, a tantuam ding uh hiaite ahi. Biakbuk khuam lepkhawmte, a bangkalte, a khuamte, a kingakna khuakkuakte;

³²a intual umna khuamte, a kingakna khuakkuakte, a kilhbelhnate, a khaute, a vanzat tengteng leh a vanzat dang tengteng puak. A min uh lou chiat in a tantuam ding uh na sehsak ding ahi.

³³Huaite siampu Aron tapa Ithamar heu a Kihoupihna puanin a Merari tapate suante’n a hih ding uh banghiam nengneng tan a a nasep dan ding uh ahi, a chi hi.

³⁴Huchi in Mosi leh Aron leh khawmpi lak a lupente’n Kohathte tapate a khang a khangun, a inkuan kuanun a simta uhi.

³⁵Kihoupihna puanin a nasepna ading in michih nasem dia kisate, kum sawmthum apan a tunglam kum sawmnga a upa chiang.

³⁶Huaite a khang a khang a a sim uh sang nih leh za sagih leh sawmnga ahi uhi.

³⁷Hiaite ahi uh, Kihoupihna puanin a na sem Kohathte suan a simte uh, Mosi zang a TOUPA thupiak bang a Mosi leh Aron in a simte ahi uhi.

³⁸Hiaite a inkuan kuan a, a khang a khang ua kisim, Gershon tate ahi uh.

³⁹Kum sawmthum apan a tunglam kum sawmnga a upa tan Kihoupihna puanin nasepna adia michih nasem dia kisate.

⁴⁰A khang a khang a, a inkuan kuan ua a simte uh sang nih leh za guk leh sawmthum ahi uh.

⁴¹Huaite ahi uh, Gershon tapate suante, Kihoupihna puanin a nasem teng, TOUPA thupiak bang a Mosi leh Aron in a simte uh.

⁴²Huaite a inkuan kuan ua, a khang a khang ua, Merari tapate a simte uh ahi,

⁴³Kihoupihna puanin a sem ding a nasem zah ding, kum sawmthum apan a tunglam kum sawmnga a upa chiang.

⁴⁴Huai a khang a khang a, a inkuan kuan ua a simte uh sang thum leh za nih ahi uh.

⁴⁵Hiaite Merari tapate suante a sim uh, Mosi zang a TOUPA thupiak bang a Mosi leh Aron in a simte ahi uhi.

⁴⁶Mosi leh Aron leh Israelte lupente’n a khang a khang a, a inkuan kuan a, a simte uh avek un huaiteng ahi uh.

⁴⁷Nasem ding leh Kihoupihna puanin a puakchi pawmi ding zah, kum sawmthum apan a tunglam kum sawmnga a upa chiang.

⁴⁸A simte uh sang giat leh za nga leh sawmgiat ahi uh.

⁴⁹Mosi zang a TOUPA thupiak bang a michih a sep ding leh a tantuam ding dungzui zel a sim ahi. Hichibang in TOUPA’N Mosi thu a piak bang a sim ahi uhi.