Read Paite Chin NAMBARS 5 Bible Online

NAMBARS 5 - Paite Chin bible

NAMBARS 5

¹Huan, TOUPA’N Mosi a houpih a:

²Israel suante a giahna mun ua kipan phak tengteng leh sipawt tengteng leh misi ziak a buah peuhmahte pawtkhe sakvek ding in thupia in.

³Numei leh pasal pawt khesak in giahphual pua ah na koih ding ahi. A laitak a ka omna giahna mun a buahsak louhna ding un, a chi hi.

⁴Huchi in Israel suante’n huchibang in a hih uhi, dainawl ah a koihkhia ua; TOUPA’N Mosi kiang a a gen bang in Israel suante’n a hih uhi.

⁵TOUPA’N Mosi a houpih a:

⁶Israel suante kiang ah gen inla, pasal hiam, numei hiam in TOUPA tung ah thil bang peuh na hihkhial in mawhta leh;

⁷a hihkhelhna ah thupha a tawi ding ahi. A hihkhelh man pen kim tak in adin dia, a mun nga a khen, mun khat a hihkhelh napa a piak behlap ding ahi.

⁸Himahleh huai mi in khelh man piakna ding tanau nai a neihkei leh, khelhman pen TOUPA a tuam ahi dia, a khelhman leh a khialpa adia kilemna bawlsakna belampa pen siampu kiang a piak ding ahi.

⁹Israel suante thil siangthou vei thillat tengteng, siampu kiang a lat peuhmah siampu a tuam ding ahi.

¹⁰Michih thil siangthou siampu a tuam ahi dia, mite’n siampu a piak peuhmah a ma a tuam ahi ding, chi in, a chi hi.

¹¹TOUPA’N Mosi a houpih a:

¹²Israel suante kiang ah gen inla, a kiang uah, Mi, a zi in a lampialsan a, mi’n amah luppih henla, a pasal in theikei leh,

¹³huchibanga a om nilouh a, kihihthanghuai pipi a ki genkhe nai lou hi in, a thei kuamah omlou, mat louh hi leh;

¹⁴a pasal thikthu hong sia a, a zi muangmoh a, siangthoulou mah a na hihleh, ahihkeileh a pasal thikthu hong sia a, a zi muangmoh a, a zi siangthou a na hihleh:

¹⁵huai mi in a zi adia thillat barli buh tangbuang ephah mun sawm a khen, mun khat tawi in a zi siampu kiang ah a pi ding hi. A thillat ding sathau a buak ding ahi kei a, begaw leng a nuh ding ahi sam kei. Thikthusiatna tangbuang thillat, theihgigena thillat, thulimlouhna theihgigena ahi.

¹⁶Siampu in a zi a pi dia, TOUPA ma ah a dingsak dia:

¹⁷Siampu in leibel in tui siangthou a la dia, biakbuk pialkhang a leivui a la dia, tui ah a khe ding hi.

¹⁸Siampu in huai numei TOUPA ma ah a dingsak dia, a sam a khah khiak sak dia, theihgigena tangbuang thillat a tawisak dia; siampu in hamsia tungsak tui kha a khut in a tawi ding.

¹⁹Siampu in huai numei a kichiam sak dia, numei kiang ah, Na pasal hilou midang kuamah in hon luppih kei a, nitna lam a na lampial kei leh hamsia tungsak hiai tui kha apan na hul ding.

²⁰Himahleh lampialsan a na kihihnit a, na pasal lou mi kuahiam in a hon luppih leh na hul kei ding, a chi ding.

²¹Siampu in numei a vau dia, a kichiamsak ding. Numei kiang ah siampu in, TOUPA’N na pheipi a zawtsak a, na gil a puaksak leh, TOUPA’N na chipihte lak ah hamsethuak in nang honbawl hen.

²²Hamsia tungsak hiai tui na gil ah a lut dia, na gil a puaksak dia, na pheipi a zawsak ding. Numei in, Amen, Amen, a chi ding.

²³Siampu in huai hamsia thute laibu ah a gelh dia, tui kha ah a diah ding hi.

²⁴Hamsia tungsak tui kha numei a dawnsak ding ahi. Huchi in hamsia tungsak tui kha a gil sung ah a lut dia, a hong kha ding hi.

²⁵Siampu in thikthusiatna thillat tangbuang numei khut apan a la dia; TOUPA ma ah tangbuang thillat a vei dia, maitam ah a paipih ding hi.

²⁶Siampu in tangbuang thillat theihgigena pham khat a la dia, maitam ah a hal dia, huaikhit in tui numei a dawnsak ding ahi.

²⁷Tui a dawnsak leh hichi ahi dia; a hong nit a, a pasal tung a thil hihkhial a na hihleh hamsia tungsak huai tui a gil sung ah a lut dia, a hong kha dia, a gil a hong puak dia, a pheipi a hongzaw dia; huchi in numei a chipihte lak a hamsia thuaknu a honghi ding hi.

²⁸Himahleh numei a nit kei a, a sianthou leh a hul dia, nau a pai thei ding.

²⁹Hiai zi lampial a, a pasal hilou midang toh kihihnin hiam,

³⁰ahihkeileh a pasal thikthu hong siat a a zi a hazat chiang a vaihawm ding dan ahi. Huchi in TOUPA ma ah a pi dia, siampu in hiai dan tengteng bang in a tung ah a hih ding.

³¹Huchi in pasal pen thulimlouhna ah a hul dia, numei in a khelhna mawh a paw ding hi, chi in, a chi hi.