Read Paite Chin NAMBARS 6 Bible Online

NAMBARS 6 - Paite Chin bible

NAMBARS 6

¹Huan, TOUPA’N Mosi a houpih a:

²Israel suante kiang ah gen inla, a kiang uah, pasal hiam, numei hiam in leng banghiam thuchiam tuam, TOUPA adia a kipiakna Nazarit thuchiam a chiam lai in uain leh zu a ngawl ding ahi.

³Uain thuk, zu thuk leh grep tui a dawn ding ahi kei a, grep mindup hiam, minvuai hiam leng a ne ding ahi sam kei hi.

⁴A kihihtuam sungteng grepgui apan a tang leng, a hawng leng a ne ding ahi kei.

⁵Kihihtuamna thu a chiam sungteng a lu leng a met louh hial ding ahi. TOUPA adia a kihihtuam sung ni a kim mateng hihtuam ahi dia, a sam a hawi ding ahi.

⁶TOUPA adia a kihihtuam sungteng misi luang a naih ding ahi kei.

⁷A pa, a nu, a unaupa, a unaunu hiam sih thu ah leng a kihihnin ding ahi kei hi; Pathian adia a kihihtuamna in amah a gak ziak in.

⁸A kihihtuam sung teng TOUPA a tuam ahi.

⁹A kiang ah mi hong siguih in, a kihihtuamna lutang hon hihnin kha taleh, a kisiansak ni, a ni sagih ni’n a lu a met ding ahi.

¹⁰A ni giat ni’n Kihoupihna puanin kongkhak a siampu kiang ah vakhu kopkhat hiam, vapal nou kopkhat hiam a hontawi ding ahi.

¹¹Siampu in khat khelh thoihna ding in a lan dia, a khat pen haltum thillat ding in, misi ziak a a hihkhelhna ah kilemna a bawlsak ding. Huai ni mah in a lu a hih siangthou ding ahi.

¹²A kihihtuamna nite Toupa kiang a pia in khelh thoihna ding in belamnoupa kum khat a upa a hontawi ding hi. Himahleh a kihihtuamna hihnit a hihtak ziak in a mangta ding uhi.

¹³Hiai Nazaritmi dan ahi: A kihihtuamna ni a bukim chiang in Kihoupihna puanin kongkhak a pi ahi ding.

¹⁴TOUPA adia thillat ding in belampa kum khat a upa gensiatbei haltum thillat ding in khat, khelh thoihna ding in belamnounu kum khat a upa gensiatbei khat, lemna thillat ding in belampa gensiatbei khat,

¹⁵silngou sohlouh tanghou leh tangbuang nel mahmah thau a mek tanghou leh tangbuang nel mahmah thau a mek tanghou beu leh thau a zut tanghoupek bawm khat, a tangbuang thillat ding uleh dawn thillat dingte toh a lan ding ahi.

¹⁶Siampu in huaite TOUPA ma ah a lan dia, a khelh kithoihna leh a haltum thillat a lan ding ahi.

¹⁷Belampa pen palbawm a tanghou silngou sohlouh toh lemna kithoih thillat TOUPA kiang ah a lan dia; siampu in tangbuang thillat leh dawn thillat mah leng a lan tel ding ahi.

¹⁸Nazaritmi in Kihoupihna puanin kongkhak ah a kihihtuamna lu a met dia, a kihihtuamna sam a ladia, lemna kithoihna thillat nuai a mei ah a haltum ding hi.

¹⁹Siampu in belampa liang huan min leh bawm a silngou sohlouh tanghou khat leh silngou sohlouh tanghou pek khat a la dia, Nazaritmi in a kihihtuamna lu a met khit in a tawisak ding hi.

²⁰Siampu in vei thillat ding in TOUPA ma ah a vei ding ahi. Hiai siampu a tuam ahi ding, awm vei leh liang vei toh. Huaikhit in Nazaritmi in uain a dawn theita ding hi.

²¹Hiai ahi, Nazaritmi thuchiam dan leh TOUPA ma a thillat dan. Amah ut thu a lat simlouh in a kihihtuamna thuchiam dungzui zel in a hih ding ahi, a chi hi.

²²TOUPA’N Mosi a houpih a:

²³Aron leh a tapate kiang ah, hichibang in Israel suante na vualzawl ding ahi. A kiang uah,

²⁴TOUPA’N nou hon vualzawl in honveng hen.

²⁵TOUPA’N a mel na tung uah vaksak henla, hon hehpih hen.

²⁶TOUPA nou lam hong nga henla, lungmuanna nou honpia hen, chi in gen un, chi in a gen hi.

²⁷Huchibang a hih in Israel suante tung ah ka min tuansak ahi dia, amau ka vualzawl ding, a chi hi.