Read Paite Chin NAMBARS 7 Bible Online

NAMBARS 7 - Paite Chin bible

NAMBARS 7

¹Mosi in biakbuk a lamkhit a, thau a nilhkhit a, a hih siangthou khit a, van tengteng leh maitam leh tuium-belsuan tengteng thaunilh a, a hih siangthou ni’n hichi ahi.

²Israel intekpen, a inkuan ua intekpente’n thillat a lan ua, huaite a nam ua intekpente, a simte uh tung a omte ahi uh.

³A thillatte uh kangtalai tung nei guk leh bawngtal sawmlehnih, intekpen nih in kangtalai khat zel, khat in bawngtal khat zel TOUPA ma ah a hon paipih ua, biakbuk ah a hong lan uhi.

⁴TOUPA’N Mosi a houpih a,

⁵Biakbuk nasepna ding in a phatuam kha ding, na la chiat un; Levite, a nasep uh dungzui zel in na pe chiat ding hi, a chi hi.

⁶Huchi in Mosi in kangtalaite leh bawngtalte a la a, Levite khut ah a pia hi.

⁷Kangtalai nih leh bawngtal li Gershon tapate a nasep uh dungzui zel in a pia hi.

⁸Kangtalai li leh bawngtal giat, siampu Aron tapa Ithamar, Merari tapate a nasep uh dungzui in a pia hi.

⁹Kohath tapate bel Mun siangthou a nasep amau a tuam hi a, a nasep uh a zawnthoh a hih ziak in a pe kei hi.

¹⁰Intekpente’n thaunilh ni’n maitam latna dia a thillatte uh maitam bul ah a lan uhi.

¹¹TOUPA’N Mosi kiang ah, Intekpen chih in maitam latna dia a thillat, a thillat uh amau tan hizel ding in a lan ding uhi, a chi hi.

¹²Ni khat ni a thillat lan ding mi Judah chi Aminadab tapa Nashon ahi.

¹³A thillat dangkasik kuang khat, a gikdan sekel za leh sawmthum, Mun Siangthou a sekel sawmsagih toh kikim a gik, dangkasik belhbu khat, tangbuang thillat ding in thau helsa tangbuang nel mahmah a dim tuaktuak;

¹⁴Sekel sawm toh kikima gik gimlima dim dangkaeng keu khat;

¹⁵Haltum thillat ding in bawngtal tuai khat, belamtal khat, belamnoupa kum khat a upa khat;

¹⁶Khelh thoihna ding in keltal khat;

¹⁷Lemna kithoihna thillat ding in bawngtal nih, belamtal nih, belamtal nga, keltal nga leh belamnoupa kum khat a upa nga ahi a, hiaite Aminadab tapa Nashon thillatte ahi uh.

¹⁸Ni nih ni’n Issakar intekpente’n Zuar tapa Nethaneel in a lan hi.

¹⁹A thillat ding in dangkasik kuang khat a gikdan sekel za leh sawmthum, Mun Siangthou a sekel sawmsagih toh kikim a gik dangkasik belhbu khat, tangbuang thillat ding thau toh hel tangbuang nel mahmah dim tuak;

²⁰Sekel sawm toh kikim a gik gimlim a dim dangkaeng keu khat;

²¹Haltum thillat ding in bawngtal tuai khat, belamtal khat, belamnoupa kum khat a upa khat;

²²Khelh thoihna ding in keltal khat;

²³Lemna kithoihna thillat ding in bawngtal nih, belamtal nga, keltal nga, belamnoupa kum khat a upa nga a lan hi. Hiaite Zuar tapa Nethaneel thillatte ahi uh.

²⁴Ni thum ni’n Zebulun tate intekpen Helon tapa Eliab in a lan hi.

²⁵A thillat dangkasik kuang khat, a gikdan sekel za leh sawmthum, Mun Siangthou a sekel sawmsagih toh kikim a gik, dangkasik belhbu khat; tangbuang thillat ding thau toh hel tangbuang nel mahmah a dim tuak;

²⁶Sekel sawm toh kikima gik gimlima dim dangkaeng keu khat;

²⁷Haltum thillat ding bawngtal tuai khat, belamtal khat, belamnoupa kum khat a upa khat;

²⁸Khelh thoihna ding in keltal khat;

²⁹Lemna kithoih thillat ding in bawngtal nih, belamtal nga, keltal nga, belamnoupa kum khat a upa nga ahi. Hiaite Helon tapa Eliab thillatte ahi uh.

³⁰Ni li ni’n Reuben tate intekpen Sedeur tapa Elizur in a lan hi.

³¹A thillat dangkasik kuang khat a gikdan sekel za leh sawmthum, Mun Siangthou a sekel sawmsagih toh kikim a gik dangkasik belhbu khat, tangbuang thillat dia thau hel tangbuang nel mahmah a dimtuak;

³²Sekel sawm toh kikim a gik gimlim a dim dangkaeng keu khat;

³³Haltum thillat ding bawngtal tuai khat, belamtal khat, belamnoupa kum khat a upa khat;

³⁴Khelh thoihna ding keltal khat;

³⁵Lemna kithoihna thillat ding in bawngtal nih, belamtal nga, keltal nga, belamnoupa kum khat a upa nga ahi. Hiaite Sedeur tapa Elizur thillatte ahi uh.

³⁶Ni nga ni’n Simeon tate intekpen Zurisadai tapa Selumiel in a lan hi.

³⁷A thillat dangkasik kuang khat, a gikdan sekel za leh sawmthum; Mun Siangthou a sekel sawmsagih toh kikim a gik, dangkasik belhbu khat; tangbuang thillat ding in thau toh hel tangbuang nel mahmah a dimtuak;

³⁸Sekel sawm toh kikim a gik gimlim a dim dangkaeng keu khat;

³⁹Haltum thillat a lat ding in bawngtal tuai khat, belamtal khat, belamnoupa kum khat a upa khat;

⁴⁰Khelh thoihna ding keltal khat;

⁴¹Lemna kithoih thillat ding bawngtal nih, belamtal nga, keltal nga, belamnoupa kum khat a upa nga. Hiaite Zurisadai tapa Selumiel thillatte ahi uh.

⁴²Ni guk ni’n Gad tate intekpen Deuel tapa Eliasaph in a lan hi.

⁴³A thillat dangkasik kuang khat, a gikdan sekel za leh sawmthum, Mun Siangthou a sekel sawmsagih toh kikim a gik dangkasik belhbu khat, tangbuang thillat ding thau toh hel tangbuang nel mahmah a dim tuak;

⁴⁴Sekel sawm toh kikim a gik gimlim a dim dangkaeng keu khat;

⁴⁵Halmang thillat ding bawngtal tuai khat, belamtal khat, belamnou a pa kum khat a upa khat;

⁴⁶Khelh thoihna ding keltal khat;

⁴⁷Lemna kithoih thillat ding bawngtal nih, belamtal nga, keltal nga, belamnoupa kum khat a upa ngate Deuel tapa Eliasaph thillatte ahi uh.

⁴⁸Ni sagih ni’n Ephraim tate intekpen Amihud tapa Eliasam in a lan hi.

⁴⁹A thillat dangkasik kuang khat, a gikdan sekel za leh sawmthum, Mun Siangthou a sekel sawmsagih toh kikim a gik dangkasik belhbu khat; haltum thillat ding thau toh hel tangbuang nel mahmah a dim tuak;

⁵⁰Sekel sawm toh kikim a gik gimlim a dim dangkaeng keu khat;

⁵¹Haltum thillat ding bawngtal tuai khat, belamtal khat, belamnou a pa kum khat a upa khat;

⁵²Khelh thoihna ding keltal khat;

⁵³Lemna kithoih thillat ding bawngtal nih, belamtal nga, keltal nga, belamnoupa kum khat a upa ngate Amihud tapa Eliasam thillatte ahi uh.

⁵⁴Ni giat ni’n Manasseh tate intekpen Pedazur tapa Gamaliel in a lan hi.

⁵⁵A thillat dangkasik kuang khat, a gikdan sekel za leh sawmthum, Mun Siangthou a sekel sawmsagih toh kikim a gik dangkasik belhbu khat; tangbuang thillat ding thau toh hel, tangbuang nel mahmah a dim tuak;

⁵⁶Sekel sawm toh kikim a gik gimlim a dim dangkaeng keu khat;

⁵⁷Haltum thillat ding bawngtal tuai khat, belamtal khat, belamnoupa kum khat a upa khat;

⁵⁸Khelh thoihna ding keltal khat;

⁵⁹Lemna kithoihna thillat ding bawngtal nih, belamtal nga, keltal nga, belamnoupa kum khat a upa ngate Pedazur tapa Gamaliel thillatte ahi.

⁶⁰Ni kua ni’n Benjamin tate intekpen Gideoni tapa Abidan in a lan hi.

⁶¹A thillat dangkasik kuang khat, a gikdan sekel za leh sawmthum, Mun Siangthou a sekel sawmsagih toh kikim a gik dangkasik belhbu khat, tangbuang thillat ding thau toh hel tangbuang nel mahmah a dim tuak;

⁶²Sekel sawm toh kim a gik gimlim a dim dangkaeng keu khat;

⁶³Haltum thillat ding bawngtal tuai khat, belamtal khat, belamnoupa kum khat a upa;

⁶⁴Khelh thoihna ding keltal khat;

⁶⁵Lemna kithoihna thillat ding bawngtal nih, belamtal nga, keltal nga, belamnoupa kum khat a upa nga ahi. Hiaite Gideoni tapa Abidan thillatte ahi uh

⁶⁶Ni sawm ni’n Dan tate intekpen Amisadai tapa Ahiezer in a lan hi.

⁶⁷A thillat dangkasik kuang khat, a gikdan sekel za leh sawmthum, Mun Siangthou a sekel sawmsagih toh kikim a gik dangkasik belhbu khat, tangbuang thillat ding thau toh hel tangbuang nel mahmah a dim tuak;

⁶⁸Sekel sawm toh kikim a gik gimlim a dim dangkaeng keu khat;

⁶⁹Haltum thillat ding bawngtal tuai khat, belamtal khat, belamnoupa kum khat a upa khat;

⁷⁰Khelh thoihna ding keltal khat;

⁷¹Lemna kithoih thillat ding bawngtal nih, belamtal nga, keltal nga, belamnoupa kum khat a upa nga ahi. Hiaite Amisadai tapa Ahiezer thillatte ahi uh.

⁷²Ni sawmlehkhat ni’n Asher tate intekpen Okran tapa Pagiel in a lan hi.

⁷³A thillat dangkasik kuang khat, a gikdan sekel sawmthum, Mun Siangthou a sekel sawmsagih toh kikim a gik dangkasik belhbu khat, tangbuang thillat ding thau toh hel tangbuang nel mahmah a dim tuak;

⁷⁴Sekel sawm toh kikim a gik gimlim a dim dangka keu khat;

⁷⁵Haltum thillat ding bawngtal tuai khat, belamtal khat, belamnoupa kum khat a upa khat;

⁷⁶Khelh thoihna ding keltal khat;

⁷⁷Lemna kithoih thillat ding bawngtal nih, belamtal nga, keltal nga, belamnoupa kum khat upa ngate Okran tapa Pagiel thillatte ahi uh.

⁷⁸Ni sawmlehnih ni’n Naphtali tate intekpen Enan tapa Ahira in a lan hi.

⁷⁹A thillat dangkasik kuang khat, a gikdan sekel za leh sawmthum, Mun Siangthou a sekel sawmsagih toh kikim a gik dangkasik belhbu khat, tangbuang thillat ding thau toh hel tangbuang toh hel tangbuang nel mahmah a dim tuak;

⁸⁰Sekel sawm toh kikim a gik gimlim a dim dangkaeng keu khat;

⁸¹Haltum thillat ding bawngtal tuai khat, belamtal khat, belamnoupa kum khat a upa khat;

⁸²Khelh thoihna ding keltal khat;

⁸³Lemna kithoih thillat ding bawngtal nih, belamtal nga, keltal nga, belamnoupa kum khat a upa ngate Enan tapa Ahira thillatte ahi uh.

⁸⁴Maitam thau nilh ni a Israel intekpente thillatte dangkasik kuang sawmlehnih, dangkasik belhbu sawmlehnih leh dangkaeng keu sawmlehnih ahi.

⁸⁵Dangkasik kuang sekel za leh sawmthum toh kikim a gik chiat ahi a, belhbu sawmsagih chiat ahi. Dangkasik tuium-belsuan tengteng Mun Siangthou a sekel sang nih leh za li toh kikim a gik ahi.

⁸⁶Gimlim a dim dangkaeng keu sawmlehnih Mun Siangthou a sekel sawm toh kikim a gik chiat ahi. Dangkaeng keu tengteng sekel za leh sawmnih toh kikim a gik ahi.

⁸⁷Haltum thillat ding bawngtal tengteng sawmlehnih ahi a, belamtal sawmlehnih, belamnoupa kum khat a upa sawmlehnih, a tangbuang thillatte uh toh. Khelhna thoihna ding keltal sawmlehnih.

⁸⁸Lemna kithoihna thillat ding bawngtal sawmnih leh li ahi a, belamtal bel sawmguk, keltal sawmguk, belamnoupa kum khat a upa sawmguk ahi. Hiai thau nilh khit a maitam latna dia thilpiakte ahi uh.

⁸⁹Huchi in biakbuk a amah be dia Mosi a lut in thukhun bawm tung a chitna tutphah tunglam a Cherub nihte kikal apan amah hon houpih aw a za hi.