Read Paite Chin NAMBARS 8 Bible Online

NAMBARS 8 - Paite Chin bible

NAMBARS 8

¹Huan, TOUPA’N Mosi a houpih a:

²Aron houpih inla, a kiang ah, Khawnvak na det chiang in khawnvak sagihte’n sathau khawnvak koihna malam a tatvak ding uh ahi, chi in.

³Aron in huchibang in a hih a; TOUPA’N Mosi thu a piak bang in khawnvak koihna malam ah khawnvakte a de hi.

⁴Hiai khawnvak koihna ahihleh dangkaeng a sekthoh chi ahi a; a mung bul a kipan a paktan a sekthoh ahi. A lim TOUPA’N Mosi a etsak banggeih a khawnvak koihna bawl ahi.

⁵TOUPA’N Mosi a houpih a:

⁶Levite, Israel suante lak apan hihtuam inla, hihsiangthou in.

⁷Amaute hihsiangthou ding in hichibang in na hih ding ahi. A tung uah sawpsiangna tui sung inla, a pumpi tengteng uh metsak inla, a puante uh sawpsak inla, kihih siangthousak in.

⁸Bawngtal tuai khat tangbuang thillat thau toh hel tangbuang nel mahmah toh lasak inla, khelh thoihna ding in bawngtal tuai khat dang leng na kaisak ding ahi.

⁹Levite Kihoupihna puanin bul ah pi inla, Israel suan omkhawm tengteng ki gawmkhawm sakvek in.

¹⁰Levite TOUPA kiang ah na lan dia; Israel suante’n Levite tung ah a khut uh a nga ding uhi.

¹¹Huchi in Aron in Levite, TOUPA na a sep theihna ding un Israel suante min in vei thillat TOUPA kiang ah a lan ding.

¹²Levite’n bawngtalte lutung ah a khut uh a nga ding ua; Levite adia kilemna bawlna ding in, khat, khelh thoihna ding in, a khat pen haltum thillat ding in TOUPA kiang ah a lan ding ahi.

¹³Levite Aron leh a tapate ma ah na omsak dia, TOUPA ading in vei thillat ding in na lan ding ahi.

¹⁴Huchibang in Israel suante lak apan Levite na hihtuam dia, huchi in Levite kei a ahi ding uh.

¹⁵Huaikhit in Levite Kihoupihna puanin nasem ding in a lut ding ua, nang amaute na hihsiangthou ding, vei thillat ding in na lan ding ahi.

¹⁶Israel suante lak apan kei a tuam dia seh ahi ngal ua. Sul hong tengteng, Israel suante ta masapen teng tang in kei ading in ka neita hi.

¹⁷Israel suante lak a ta masapente, mihing toh ganta toh kei a ahi him uhi. Aigupta gam a ta masapente ka sihsak lai in kei a tuam dia ka sehsa ahi.

¹⁸Huchi in Israel suante lak a ta masapente tang in Levite ka nei khinta ahi.

¹⁹Huchi in Israel suante tang a Kihoupihna puanin a nasem ding leh Israel suante’n Mun Siangthou a honnaih ua leng Israel suante lak a hi a len louhna dia lemna bawl ding in Israel suante lak apan Levite Aron leh a tapate ka pia ahi, a chi hi.

²⁰Huchibang in Mosi, Aron leh Israel suan omkhawm tengteng in Levite tung ah a hihta uhi. Levite tungtang thu a TOUPA’N Mosi thu a piak tengteng bang in a tung uah Israel suante’n a hih uhi.

²¹Huchi in Levite siansak ahi ua, a puante uh a sawp ua; Aron in TOUPA ma ah vei thillat ding in a lan hi. Amau hih siangthouna ding in Aron in kilemna a bawlsak hi.

²²Huaizoh in Levite Aron leh a tapate nuai a, a nasep uh sem ding in Kihoupihna puanin sung ah a lut uhi. Levite tungtang thu a TOUPA’N Mosi thu a piak bang in a tung uah a hihta hi.

²³TOUPA’N Mosi a houpih a:

²⁴Levite tantuam hiaite ahi. Kum sawmnih leh nga chiang tunglam in Kihoupihna puanin a nasep a sem ding uh.

²⁵Kum sawmnga a upate’n a nasep uh a khawlsan ding ua, na a sem nawn kei ding uh.

²⁶Himahleh khawmpite biakbuk kep thu ah a unaute uh a huh zel ding ua, nasep zaw a sem nawn kei ding uh. Hichibang in Levite nasep na gel sak ding ahi, a chi hi.