Read Paite Chin NAMBARS 9 Bible Online

NAMBARS 9 - Paite Chin bible

NAMBARS 9

¹Huan, TOUPA’N Aigupta gam apan a hongpawt nung uh kum nihna, kha khatna in Sinai gamdai ah Mosi a houpih a,

²Israel suante’n Paikan Ankuangluina a hunbi zel in nei uhen.

³A hunbi in, hiai kha, ni sawmlehli nitaklam in na nei ding uhi. Huai a hih dia seh tengteng leh dan bang in na nei ding uhi, a chi hi.

⁴Huchi in Mosi in Israel suante Paikan Ankuangluina nei ding in a hilh hi.

⁵Huchi in Sinai gamdai ah kha khatna, a ni sawmlehli ni nitaklam in Paikan Ankuangluina a neita uhi. TOUPA’N Mosi thu a piak bangzel in Israel suante’n a hih uhi.

⁶Kuate hiam misiluang ziak a sianglou a na om ua, huai ni’n Paikan Ankuangluina ah a tel theikei ua, huchi in huai ni’n Mosi leh Aron ma ah a hoh uhi.

⁷Huaite’n a kiang ah, “Misi luang ziak in sianglou ka hi ua; huaiziak in hia, Israel suante lak a a hunbi a TOUPA kiang a thillat ka lat sam uh kham ka hih uh?” a chi uhi.

⁸Mosi in a kiang uah, “Na pau kei phot dih uh. Na tungtang thu uah TOUPA’N bangchi’n ahia thu a honpiak k’on za masa phot ding,” a chi hi.

⁹TOUPA’N Mosi a houpih a:

¹⁰Israel suante kiang ah, Na lak ua kuapeuh, na suante uh lak a kuapeuh, misi luang ziak a sianglou hiam, a na zinmang hiam a om zenzen uleh TOUPA ading in Paikan Ankuangluina neih himhim ding ahi.

¹¹Kha nihna, ni sawmlehli ni nitaklam in a nei ding ua; tanghou silngou sohlouh loukha toh a nekding uh ahi.

¹²A zing ading in bangmah a koih ding uh ahi kei. A guh leng a hihtan ding uh ahi kei. Paikan Ankuangluina a hih dia seh bang zel a a hih ding uh ahi.

¹³Himahleh, siang ngal a, zinmangna neilou, Paikan Ankuangluina a tellou mawkmawk ahihleh a chipihte lak apan huai mi satkhiak ding ahi. A hunbi a TOUPA kiang a thillat a latlouh ziak in huai mi in a khelh mawh a kipuak ding hi.

¹⁴Namdang mi na kiang ua om in TOUPA adia Ankuangluina a telsam a ut leh Paikan Ankuangluina a hih dia seh leh a dan bang in a hih ding ahi. Hiai gam a mi mawng leh namdang mite adia dan kikhat na neih ding uh ahi, chi in gen in, a chi hi.

¹⁵Huchi in biakbuk lamkhit ni’n biakbuk, theihpihna puanin pen meipi in a tuam lii liai hi. Nitaklam in biakbuk tung ah meikuang bangbang a zingsang tan in a om hi.

¹⁶Huchibang in a om nilouh a; meipi in a tuam nilouh a, zan chiang in mei bang in a kilang hi.

¹⁷Meipi in puanin a kikhinsan teng in Israel suante’n pai ding vai a hawm zel ua; meipi a khawlna mun peuh ah Israel suante’n giahphual a satzel uh.

¹⁸TOUPA thupiak in Israel suante a pai zel ua, TOUPA thupiak mah in giahphual a sat uhi. Biakbuk tung a meipi a omsung teng giahphual ah a om nilouh uh.

¹⁹Biakbuk tung a meipi sawtpi a om leh Israel suante’n TOUPA thu a zui ua, a paikei uhi.

²⁰Meipi biakbuk tung a ni tamlou sung a om chiang in giahphual a sat ua, TOUPA thupiak bang in, huchi in a pai zel uhi.

²¹A kalkal in meipi nitaklam apan a zingsang pha in a om a; zingsang a meipi in a tung kahsan leh a pai zel uh. Ni khat lel hiam, zan khat lel hiam om a meipi in a tungkah san leh a pai zel uhi.

²²Biakbuk tung a meipi ni nih hiam, kha khat hiam, kum khat hiam a om a, huai a a om nilouh leh Israel suante giahphual ah a om nilouh ua, a paikei uh. A tung kahsan leh bel a pai zel uhi.

²³TOUPA thupiak in giahphual a satzel ua, TOUPA thupiak in a pai zel uh. Mosi zang a TOUPA thupiak in TOUPA thu a zui uhi.