Read Paite Chin MIKAH 1 Bible Online

MIKAH 1 - Paite Chin bible

MIKAH 1

¹Judah kumpipa Jotham, Ahaz, leh Hezekiah vaihawm laia Moreseth mi Mikah kiang a TOUPA thu hongtung, Samaria khua leh Jerusalem khaw tungtang thu a muh:

²Nou, mite aw, na vek un za unla: Aw lei leh asung a om tengteng aw, ngaikhia un: TOUPA Pathian, TOUPA a biakin siangthou a kipan, nou dem in na tungthu uh theihpihpa hi hen.

³Ngai dih ua, TOUPA a mun a kipan in a hongpawt a, a hong paisuk ding a, lei munsangte a chil ngal ding hi.

⁴Mei kiang chin a khuainun bang leh mun ken a tui kikhoh khia bang mai in, tangte a nuai ah a zul ding a, munzangte a khangkham ding.

⁵Hiai tengteng Jakobte tatlekna ziak leh Israel inkawte khelhna ziak ahi. Jakobte tatlekna bang ahia oi? Samaria ahi kei maw? Judah mun sangte bang ahia? Jerusalem ahi kei maw?

⁶Huaiziak in Samaria gam a thilsia omkhawm bang in ka bawl ding a, grephuan mun bang mai in: huai mun a suangte luiguam ah ka khukkhe ding a, a suangphumte ka dawksak ding hi.

⁷A milim bawltawm tengteng sukkhap vek ahi ding a, a kizuakna mante mei a haltum ahi ding a, a milim tengteng ka hihgawp ding: kizuakna man ding in a la vek ngal a, kizuakna man mah in a pang nawn ding uhi.

⁸Hiaiziakin ka kap ding a, ka mau vongvong ding a, kisuah leh vuaktang in ka om ding: sehalte bang in ka kikou ding a, vangawngsaute bang in ka thum ding hi.

⁹A liamna hihdam theih ahi kei: Judah gam a tungta ngal a: ka mite kongpi, Jerusalem hial a tungta hi.

¹⁰Gath khua ah genkei unla kap hetkei un; Beth-leaphra khua ah leivui lak ah ki khuk un.

¹¹Aw Saphir mi, vuaktang leh zumtakin paimang in: Zaanan mite Beth-ezel kahna ziak in hong pawtkhe kei ding ua; huai ah bitna mun a omlouh ziak in.

¹²Maroth mi in tanhoih tan a ngaklah tuntun hi, TOUPA kiang a kipan thil hoihlou Jerusalem kongpi tan a a hongtun suk ziak in.

¹³Aw Lakis mi, kangtalai sakol hattak henden in: amah pen Zion tanu khelhna kipatna ahi. Israelte tatlekna nang a muh ahi.

¹⁴Huaiziak in Moreseth-gath kiang ah kikhakna thilpiak na piak ding ahi: Akzib innte Israel gam kumpipate adin khemna ahi ding hi.

¹⁵Aw Maresa mi, nang hon zoutu na kiang ah konpi ding: Israelte thupina Adullam pha in a hongpai ding hi.

¹⁶Kimet giau inla, na ta deihtakte ziak in kimet giau in: musane bang in kihih giau semsem in; na kiang a kipan a sal a pi in a omta uhi.