Read Paite Chin MIKAH 2 Bible Online

MIKAH 2 - Paite Chin bible

MIKAH 2

¹A lupna tung ua thulimlouhna gelmi leh thil hoihlou ngaihtuah khemi tung a gik hi: zingsang a khua a vak in huai a hihzel uhi.

²Mi loute eng in a laksak ua; innte a eng ua, a laksak zel uhi: mi leh a inkawte uh mi leh a goutan un a nuaisiah uhi.

³Huaiziak in TOUPA’N hichi in a chi: “Ngai dih, hiai inkaw tung ah thil hoihlou ka gel ahi, huai a kipan in na ngawng uh na suan kei ding ua, kisathei tak in a pai nawn kei ding uh; hun hoihlou a hih ding ziak in.

⁴Huai ni chiang in nou dem in gentehna a bawl ding ua, kahla khasiathuai a sam in: "Loh in i om vekta ua, ka mite thiltan a kilamdangta; ei kipan gam lakmang ahi a; helhatmi kiang ah i lou uh hawmzak ahita," a chi ding uhi.

⁵Huaiziak in TOUPA mite kikhawmte lak ah aisan a khau a tehsakmi kuamah na neikei ding uhi.

⁶Thu genkei un, chi in a genzel ua, hiai mite kiang ah thu a genkei ding uh: gensiatna a dai kei ding hi.

⁷Aw Jakob inkawte aw, TOUPA kha nehden in a om ahia? Hiaite a thilhih chih ding ahi maw? Diktak a om zel mi tung ah ka thute’n thil hoih a hih kei maw?

⁸Himahleh ka mite tunai chin in melma bang in a hong dingkhia uhi: kidou utlou a galmuangtak a mi vialvakte lak a kipan in a puansilh puanaktualte uh na suah sak uhi.

⁹Ka mi numeite a inn nuamtak ua kipan na delhkhia ua; a naupang noute a kipan ka thupina a lamang den uhi.

¹⁰Thou unla, paimang un; hiai khawlna mun ding ahi kei a; siatna thupitak tan ahi a, buahna a om ziak in.

¹¹Mi kuahiam in kha a om chi in zuauthu gen in, “Uain leh zu na taina ding uh ahi” chi in hong gen leh huai mi mipite kituahpih lel zawlnei ahi ding hi.

¹²Aw Jakobte, na vek un k’on samkhawm ding a; Israel omsunte ka pikhawm ding a; Bozrah khua belam bang a koihkhawm ding: ganhon a loupa mun ua om bang in, mipi a hih ziak un a chiak zuazua ding uh.

¹³A ma uah lampi phuvangpa a pai a; a phu pailet ua, kongkhak pha in a pai zel ua, huai ah a paikhia uhi: a kumpipa uh a ma uah a pai a, TOUPA’N a ma uh a kai hi.