Read Paite Chin MIKAH 3 Bible Online

MIKAH 3 - Paite Chin bible

MIKAH 3

¹Aw nou Jakob heutute leh Israel inkaw vaihawmmite aw, Ngaikhia unla, k’on ngen hi ka chi ahi: vaihawm dan na theih ding uh hilou hia?

²Thil hoih na hua ua, thil hoihlou na it ua, a vun uh na hawksak ua, a guh ua kipan in sa na leukhia uhi:

³Ka mite sa ne in; a vun uh na lip ua, a guh uh na hihtansak ua: ahi, sa uina bel sung a sa atnen bang in huan ding in na at nen uhi.

⁴Huai hun chiang in TOUPA a sam ding ua, himahleh amau a dawng kei ding: ahi, huai hun chiang in a thilhih ua a hih hoihlouh dan bang un, amau a kipan a mai a sel ding hi.

⁵Ka mite thil hihkhial sakmi, nekding banghiam piak a a om chiang ua Muanna chi a kikou a, huaibang peloute peuhmah kidouna thu a vau lau zawlneite tungtang thu TOUPA’N hichi in a chi:

⁶Huaiziak in kilakna na neihlouhna ding un noute kiang zan hongtung hi; ai na san theihlouhna ding un na kiang uah mialna a hongom ding a; Zawlneite ading in ni a tum ding a, sun amau tung ah mial ahi ding hi.

⁷Mutheimite a zum ding ua, aisansiamte a zahlak ding uh, avek un muk a hum ding uh: Pathian in a dawn louh ziak in.

⁸Himahleh Jakobte kiang ah a tatlekna uh theisak ding leh Israelte kiang ah a khelhna uh theisak ding in TOUPA kha ziak a thilhihtheihnate, vaihawmnate, hatnate in ka dim hi.

⁹Nou Jakob inkawte heutute leh Israel inkaw vaihawmmi, vaihawmna kih a, dikna chiteng lumlet mite aw, hiai ngaikhia un, k’on ngen ahi.

¹⁰Zion sisan in a lam ua, Jerusalem ginatlouhna in.

¹¹Huai ah heutute’n kipahman lamen in vai a hawm ua, siampute’n loh lamen in a sinsak ua, a zawlneite’n dangka lamen in ai a san uhi: huchi in leng, TOUPA a lak uah a om ka hia? Thil hoihlou i tung uah a hong tungkei ding, chi in TOUPA tung ah a kinga uhi.

¹²Huaiziak in Zion, noute ziak in, lou bang a leileh ahi ding a, Jerusalem thilsia omkhawm ahi ding a, biakin omna gammang bang ahi ding.