Read Paite Chin MIKAH 4 Bible Online

MIKAH 4 - Paite Chin bible

MIKAH 4

¹Himahleh ni nanung chiang in hichi ahi ding a, TOUPA inn omna tang, tanglian tungte a hihkip in a om ding a, tang neute tung ah tawisang in a om ding; huai ah tawisang in a om ding; huai ah chichihte a pai zungzung ding uh.

²Nam tampite a pai ding ua, hong unla, TOUPA tang ah, Jakob Pathian inn ah i hohtou ding uh; huchi in aman a lampi tanchinte hon sinsak ding a, a lampite ah i pai ding ua, a chi ding uh; Zion a pan danthu a hongpawt ding a. TOUPA thu bel Jerusalem a kipan in a hongpawt ding ahi.

³Aman chi tampi lak ah vai a hawm dia, gamlapi a nam hattak leng a sal ding; A namsaute uh leilehna muk zum din a sek ding ua, a teipite uh theikung attanna temkawi ding in a sek ding uh; namdang in namdang tung ah namsau a likta kei ding a, kidou dan leng a sinsakta kei ding uh.

⁴Mi chihte a grepgui nuai uah leh a theipi kung nuai uah a tu ding ua; kuamah in a lausak kei ding ua, sepaihte TOUPA kam in a genta ngal a.

⁵Chichih amau pathian min chiat in a om ding ua, ei leng TOUPA i Pathian min in tangtawn tangtawn in i om ding hi.

⁶TOUPA’N hichi in a chi: Huai ni chiang in khebaite ka kaikhawm ding a, delhmang a om leh sukgim a omte ka kaikhawm ding hi chi in.

⁷A damsunte ka khosuaksak ding a, gamlapi a delhmang a omte bel nam hattak in ka bawl ding: tuban siah Zion tang ah tangtawn in TOUPA’N a tung uah vai a hawm ding hi.

⁸Aw nang, ganchinna insang, Zion tanu tenna bitna tang, na kiang ah lalgam masa a hongtung ding; ahi, Jerusalem tanu kiang ngei ah lalgam a hongtung ding hi.

⁹Bang a chia hichi nak kah na hia? Na sung ah kumpipa a om ka hia, nang hon gensakpa a mangthangta ahia, numei nauvei bang a lunggimna in nang a hon mat?

¹⁰Aw Zion tanu, numei nauvei suak ding bang in natna thuak in vei in: khopi a kipan in na pawtkhe ding a, gam ah na teng ding a, Babulon tanpha a paiding na hi ngal a, huai ah hotkhiak in na om ding a, huai ah na melmate khut a kipan TOUPA’N nang a hon honkhe ding hi.

¹¹Tuin tampi nang hondou in a kikhawm ua, hihbuai in om henla, i mit in Zion tung a a lunggulh pen mu hen, a chi uhi.

¹²Himahleh TOUPA ngaihtuahnate a theikei ua, a phatsakna leng a theisiam sam kei uh: phual a buhphal koihkhawm bang in amau a kaikhawmta ngal a.

¹³Aw Zion tanu, thou inla chil in: na ki sik bang in ka bawl ding a, na khepek dal bang in ka bawl ding; huan mi tampite na satnen ding a: a thilneihte uh TOUPA adia na koihtuam ding ahi, a sum uh lei kumpi TOUPA adin a koihtuam ding uhi.