Read Paite Chin MIKAH 5 Bible Online

MIKAH 5 - Paite Chin bible

MIKAH 5

¹Aw sepaih honpi tanu, tuin sepaih hon kaikhawm inla: amau a hon umsuakta ua: Israelte vaihawmpa a biang ah sikchiang in a sun ding uhi.

²Himahleh nang Bethlehem Ephratha, Judah gam a sang tampi lak a tel din neu tawk lechin leng, nang a kipan in Israelte vaihawmpa ding kei din a hongpawt ding; a hongpawtna sawtpi, tanglai nite a kipan ahi.

³Huaiziak in nauveimi’n a suahsak ma teng amau a lehngatsan ding: huchi in a unau omsunte Israel suante kiang ah a kiknawn ding uhi.

⁴Amah ading dia, TOUPA a Pathian min thupina ngei in: amau a omta ding ua: amah lah leitawp pha in a thupi ding hi.

⁵Huan, hiai mi kilemna ahi ding; Assuria mi a gam ua a hong a, i kumpipa uh innte a honsik chiang in, amah dou ding in belampu sagih leh mi thupi giat i kitelkhe ding uhi.

⁶Assuria gam namsau in a hihse ding ua, Nimrod gam a lutna a hihse lai ding uh: huan aman, i gam ua Assuria mi hong a, i gam chiang uh a hongsik hun in, amah a kipan in a hon honkhe ding hi.

⁷Jakob mi omsunte chi tampi lak ah TOUPA a kipan a daitui kia bang leh loupa tung a vuahzu bang in a om ding uh; huai in mihing a ngak kei a, mihing tapate a ngak sam kei hi.

⁸Jakobte mi omsunte namte lak ah leh chi tampite lak ah gamnuai sate lak a humpinelkai bang leh belamhon lak a humpinelkai lunlai bang in a om ding: aman a paisuak peuhmahte a sikden a, a botnen a, humbit ding leng kuamah a omkei uhi.

⁹Na khut nang hondoute tung ah lik in om henla, na melma tengteng hihman in om hen.

¹⁰Huai ni chiang in hichi ahi ding a, TOUPA’N a chi, nang a kipan in na sakolte ka hihmang ding a, na kangtalaite ka hihse ding hi:

¹¹Na khopite ka hihmang ding a, na kulhhat tengteng ka hihchim ding;

¹²Na khut a kipan bumsiamte ka hihmang ding a; aisansiamte ka hihmang ding a; aisansiamte na nei nawnta kei ding hi:

¹³Nang a kipan na milim bawltawmte leh na suangphuhte ka hihmang ding a; na khutsuakte na be nawn kei ding hi.

¹⁴Nang a kipan Aserte ka botkhe ding a; na khopite ka hihse ding hi.

¹⁵Huan thu ngaikhelou namte tung ah hehna leh thangpaihna in phulakna ka piching sak ding hi.