Read Paite Chin MIKAH 6 Bible Online

MIKAH 6 - Paite Chin bible

MIKAH 6

¹TOUPA thugen tuin ngaikhia un; Thou inla, tang liante ma ah lang in, tang neute’n na aw ngaikhia uhen,

²Aw tang liante aw, TOUPA honhekna ngaikhia unla, nou leitung kingaknate aw, ngaikhia un: TOUPA a mite toh a kilang a, Israelte a hekna gen ding hi.

³Aw ka mite aw, na tung uah bang ka hihta a ahia? Banglam in ahia k’on hihgim? Hon gen dih ua.

⁴Aigupta gam a kipan in nou k’on pikhia a, saltanna inn apan nou k’on tankhia a; na ma uah Mosi, Aron leh Miriam ka sawl hi.

⁵Aw ka mite aw, TOUPA thilhih diktat na theihna ding un, Moab kumpipa Balak thusawm leh Boer tapa Balaam in a dawn dan, Sittim a kipan a Gilgal pha a thil omdan khong tuin theigige un.

⁶Bang toh ahia TOUPA ma a kongpai ding a, Pathian tungnung ma a ka kun ding? Haltum thillatte, bawngnou kum khat a upate toh A ma ah ka hongpai dia hia?

⁷TOUPA belamtal sang tampi hiam sathau lui singte hiam ah a lungkim dia hia? Ka tatlekna ziak in ka tachil pia in, ka khelhna ziak in pumpigah ka pedia hia?

⁸Aw mihing, a hoih nang a hon ensakta hi; TOUPA’N nang a honphut bang ahia? Diktak a hihleh hehpihna it leh na Pathian toh kiniamkhiak a tonkhawm ahi kei maw?

⁹TOUPA’N khopi a sam hi, pilna nei mi’n na min laudan a siam ding: khetbuk leh a bawlmi limsak un.

¹⁰Migilou inn sung ah gitlouhna a kaihkhawm goubawmte leh tehna diklou kihhuai tak a omlai hia?

¹¹Bukna diklou zangte leh khemna dia gikdan tehna diklou zangte siangthou ka chi ding ahia?

¹²Huai a mi hausate lah hiamgamna in a dim ua, huai a tengte’n zuau a gen ua, a kam sung ua a lei uh khemhat ahi.

¹³Huaiziak in ken leng nakpi a hon limsak in k’on khen a; na khelhna ziak in k’on hihgam hi.

¹⁴Na ne ding a, himahleh na taikei ding; na kiang ah na daina a om ding a: na khol ding a, himahleh a bit kei ding; na kholsate namsau in a pai mangpih ding in ka pe ding hi.

¹⁵Na ching ding a, himahleh na lakei ding: Olive gahte na chil ding a, himahleh a thau na nilh kei ding; grep chil mah lechin, a uain na dawn kei ding.

¹⁶Omri thusehte lah na vom gige ngal a, Ahab inkaw thuhilhna tengteng zui in amau lemtheihna ah na pai uhi; huchi in mun gam gawp in k’on bawl sinta hi, na sung a tengte simmawh thuak in soisak in a om ding uhi.