Read Paite Chin MIKAH 7 Bible Online

MIKAH 7 - Paite Chin bible

MIKAH 7

¹Ka tung gikna mai e: nipi thei a sekkhawm hunlai a om bang leh grep loh hunlai a grep maih lohding bang ka hi ngal a: gahbom nek ding a omkei; ka hinna in theipi min masa a lunggulh hi.

²Pathian limsakmi lei a kipan a mang ua, mihing lak ah midiktak a omkei uh: sisan suah ding in a tang vek ua; michih in amau unau len in a gem uhi.

³A khutte uh thil hoihlou tung a thanuamtak a hih ding in a nga ua; kumpipa’n thilpiak ngiat a, vaihawmpa’n a negu a; mi lian in a lungsim thil hihkhelhna a genkhia a: huai in a kithutuak uhi.

⁴A lak ua mi hoihpen loulingnei bang ahi a; midik pen leng dailing nei sang in a hoihkei zaw: nang vengmite ni, veh a na om ni ngei a hongtung hi; huai bel a mangbat ni uh ahi ding hi.

⁵Lawm ah muang kei unla, makaimi ah ginna koih kei un: na angsung a omnu a kipan in na kam kongkhakte veng in.

⁶Tapa in pa min a hihsia a, tanu in a nu a dou a, mou in a pi a dou ngal a; mihing melmate zaw amah inkawte mah ahi uh.

⁷Ken zaw TOUPA lam ka en ding a; ka hotdamna Pathian ka ngak ding; ka Pathian in a hon ngaikhe ding hi.

⁸Aw ka melma, ka puk hun chiang in hon awi ken: ka thou nawn ding; mial a ka tut in leng TOUPA kei din vak ahi ding hi.

⁹TOUPA tung a thil ka hih khelh ziak in, a lunghih louhna mahmah ka paw ding, ka tungthu a hon genpih a, kei adia vaihawmna a tangtun masiah; vak ah a hon pikhe ding a, huan diktatna ka mu ding hi.

¹⁰Huchi in ka melma ka kiang a, TOUPA na Pathian koi ah, chipa’n huai a mu ding a, zahlakna’n amah a tuam ding hi. Ka mite’n amah a en ding ua: tun zaw kongzing buannawi bang a sikden ahita ding hi.

¹¹Na kulh bangte bawlna ni ding leh na gamgi kekletna ni hongtung ding hi.

¹²Huai ni chiang in Assuria gam leh Aigupta khopi a kipan, Aigupta leh Lui phahial a kipan, tuipi leh tuipi kikal a kipan leh tang leh tang kikal a kipan na kiang ah a hongpai ding uhi.

¹³Huchi pi in gam, asung a tengte ziak leh a thilhih uh gah ziak in hihgam ahi ding hi.

¹⁴Karmel tangkal a gamnuai a lungzuang tak a om na goutan belamhon, na mite na khetbuk zang in vak inla: nidanglai bang in Bashan leh Gilead ah vak in om chiat uhen.

¹⁵Aigupta gam a kipan a na paikhiaklai bang in a kiang ah thillamdang mahmahte ka ensak ding hi.

¹⁶Namchih in huai a mu ding ua, a thilhihtheihna tengteng uh a zumpih ding uh: a muk uh a hum ding ua, a beng uh a ngong ding hi.

¹⁷Gul bang in leivui a liak ding ua; khupboh a vakte bang in a omna kua ua kipan in ling kawm in a hongpai ding uh: TOUPA i Pathian kiang ah laudansiam kawm in a hongpai ding ua, nang ziak in a lau ding uhi.

¹⁸Nang bang a thulimlouhna ngaidampa leh a goutan omsun tatlekna nelhsiah Pathian kua a om a? A hehna tangtawn in a vom gige kei, hehpihna a a kipah mahmah ziak in.

¹⁹A kihei kiknawn ding a, i tung ah hehpihna a nei ding; i thulimlouhnate a khe nuai ah a sikden ding; nang amau khelhna tengteng tuipi taw thukpi ah na pailut ding hi.

²⁰Nidanglai a ka pu leh pate kiang a na kichiamsa, Jakob kiang a thutak leh Abraham kiang a hehpihna na tangtun ding hi.