Read Paite Chin NAHUM 1 Bible Online

NAHUM 1 - Paite Chin bible

NAHUM 1

¹Ninevi khaw puakgik. Elkos mi Nahum kilakna bu,

²TOUPA mullithat Pathian leh phulak ching ahi; TOUPA’N phu a la a, hehna in a dim hi; TOUPA’N amah doumite tung ah phu a la a, a melmate ading in hehna a kholkhawm hi.

³TOUPA a lungnel a, nakpi a thilhihthei ahi, mimawhte siam a tangsak mahmah kei ding; TOUPA’N pingpei leh huihpi ah a lampi a nei a, meipite a khe leivui ahi.

⁴Tuipi a sal a, a kangtat sak a, lui tengteng leng a kangsak khin a; Bashan gam a bah a, Karmel tang leh Lebanon tang paklunte a vuai uhi.

⁵Tang liante amah ziak in a ling ua, tang neute a zul mang ua; a ma ah lei a vuak a, ahi khovel leh asung a om tengteng toh in.

⁶A lunghih louhna mai ah kua ahia ding thei ding a, a hehna thupitak ah kua ahia om thei ding? A hehna mei bang a sunbuak ahi a, suangpite a kekzak sak vek hi.

⁷TOUPA zaw a hoih a, mangbat ni a kulh kip ahi; amah a ginnna uh koihmite a thei hi.

⁸Himahleh tuikhang luanglet zang in huai mun manthat vekna a tungsak ding a a melmate khomial a delhlut ding in.

⁹TOUPA kalh in bang na gel ua? bei sipsipna a tungsak ahi, haksa nihveina a tung kei ding hi.

¹⁰Lingnok bang a om in a uain dawn un diah kawt dimdem bang in om mahleh, buhpawl keu bang mai a hihman vek in a om ding uhi.

¹¹Nang a pawt mi khat TOUPA kalh a thil gilou ngaihtuahmi, gitlouhna thuhilhmi a om hi.

¹²TOUPA’N hichi in a chi: a hat theihtawp un hat mahle uh, tam leng tampi himah le uh, huchi pi in leng vatpuk in a om ding ua, a mangthang ding uhi. Hon na hihgim khin mah leng k’on hihgim nawnta kei ding hi.

¹³Tunzaw na kiang a kipan a hakkol ka kitansak ding a, nang gakna khaute ka kitatsak vek ding.

¹⁴TOUPA’N na tungtang thu ah thu a pia hi, na min chi bang a tuh ahi nawnta kei ding a: na pathiante inn a kipan milim bawltawm leh milim sunte ka hih mangthang ding a; na han ka bawl ding; na gilou ngal a chi in.

¹⁵Tangte a tanchinhoih tun a, lemna thu tangkoupihte khe en dih; Aw Judah, na Ankuang lui inla, na thuchiamte tangtun in; mi thuginalou in a hon pal paisuak nawn kei ding a; hih manthat vek ahita hi.