Read Paite Chin NAHUM 2 Bible Online

NAHUM 2 - Paite Chin bible

NAHUM 2

¹Kitam gawpsakpa doutu na mai ah a hongpawt hi: kigalvan inla, na lampi veng in, na kawng khauhsak inla na thilhihtheihna hattak in bawlhoih in.

²Hihsemite’n Israel thupina hihsia in a grepguite hihtan mahle uh, TOUPA Jakobte thupina a ma a bang in tungding nawn ngal ding ahi.

³A mi hatte lum sansak ahi a, mi hangsante a sanau in a kivan ua; a kisakna ni’n kangtalaite kahpasik tet in a te kelkel ua, teipite mulkim huaitak in a phe zolzol hi.

⁴Kangtalaite kongzing ah a tai gomgom a; lamlian zate ah a kiphu noknok ua; meisel bang in a lang ua, khophia bang in a tai zualzual uhi.

⁵A miliante a sam khia a: a kituak pailai a kisui ua; kulhbang lam zuan in a kinoh ua, kihumbitna ding a bawl uhi.

⁶Lui kongkhakte hon ahi a, kumpipa in hihsiat in a om hi.

⁷Huan Huzzab salmat in a paimang pih ua, a sikhanute’n a awm uh tum in vakhu bang a ham in a kah uhi.

⁸Nidanglai a kipan Ninevi khua zaw dil bang ahi; himahleh a mi tampi a taikhia ding ua, khawlin, khawlin, chi in kikou mahle uh kuamah a kihei kei ding uhi.

⁹Dangka sik gallak in laksak unla, dangkaeng leng gallak in laksak un; gou manpha a dim ahihman in thil kisekkhawm leh vanhoihte tawi bei ni a nei kei ding hi.

¹⁰Sukvuak in a om a, a vuak keuhkeuh a, a siang sipsip: lungtang a zulmang a, khukte a kihot ua, kawng tengteng a na tuntun a, avek ua mel a mualkhin hi.

¹¹Humpinelkai khosakna mun, Humpinelkai pite leh a noute nekding a balnenna leh a lausak ding omlou a Humpinelkai leh humpinelkai tekte pai vialvialna mun koimun hita ahia?

¹²Humpinelkai tal in a noute khamkhop a botnen a, Humpinelkai pite adin a keilum a, a kawkhukte uh sakeih in a dimsak a, a omna kawkhuk samatte a dimsak in, a bu kim loupa a bohzan hi.

¹³Sepaihte TOUPA’N, ngai dih, k’on dou ahi, a kangtalaite ka halkhu vungvung ding a, na humpinelkai noute namsau in a hihmang ding; lei a na sa keih ka sutawp ding a, na palaite aw zak ahi nawnta kei ding, a chi hi.