Read Paite Chin NAHUM 3 Bible Online

NAHUM 3 - Paite Chin bible

NAHUM 3

¹Sisan suahhat khopi tung a gik hi; zuau leh kilohna in a dimkhin a; a sa keih uh tatlak lou ahi.

²Zepna ging, kangtalai khe ging, sakol tawmte, kangtalai tai gopgopte toh;

³Sakol tungtuangmi sakol a tuangte, namsau te zolzolte, teipi te zualzual toh; mi thah om lemlumte, luang om ziazua toh; luang in bei chih mahmah a neikei; siluangte pal in a kisuipuk uhi:

⁴Huai kizuak melhoih, bumsiamnu, a angkawmna ziak a nam zuak a, a bumhatna ziak a inkuan zuaknu angkawmna thupi mahmah ziak a hon gawm ahi.

⁵Sepaihte TOUPA’N hichi in a chi: Ngai in, ka hondou ahi; na mai lam ah na puan ka lem ding a; na vuaktanna namte kiang ah leh na zahlakna kumpipa gamte kiang ah ka ensak ding.

⁶Nin kihhuai mahmah in ka hontheh ding a, zumhuai mahmah in k’on bawl ding a, muhnop ading in k’on koih ding.

⁷Hichi ahi ding a, nang honmu peuhmah nang a kipan a taimang ding ua, Ninevi khua a hong segawpta hi: kuan amah sun ding a, a hehnemtu ding koi a zong ding ka hia?

⁸Luite kikal a om Noamon, a kim a tui in a um, a kulh ding a tuipi zang a kulhbang ding a tuipi nei sang in na hoihzaw ahia?

⁹Ethiopia leh Aigupta a hatna ahi a, huai bel tawp hun neilou ahi; Put leh Lubim bel nang hon panpihte ahi uh.

¹⁰Huchipi in leng lakmang in a om a, sal in a tang a: kongzing teng tawp ah a naupang neute a paihnen sak uh: a mi thahte uh ading in ai a san ua, a mi liante tengteng khainiang a gak ahi uh.

¹¹Nang leng na khamsam ding a, sel in na om ding; melma ziak in kulh kip na zonglai ding hi.

¹²Na kulh tengteng theipi kung, gah min masa pulh bang ahi ding ua: a lin peuhmah uleh nemi kam ah a kelutzel uhi.

¹³Ngai in, na sung a na mipite numei ahi ua; na melmate din na kongpi a kihong heuhou a: na kikalhna siktawnte mei in a kangtum hi.

¹⁴Um kimvel a na omsung ading in tui tawi inla, ka kulhte hihkip in: tungman omna ah hoh in, belhkipna chil in, lei haltakna thuk hihkip in.

¹⁵Huai ah mei in a hong kangtum ding a, namsau in a hon satlum ding a, singnget bang in a honhih mangthang ding hi. Singnget bang in kipungsak inla, khaukhup bang in kihihpung in.

¹⁶Na sumsinmite van aksi sang a tam in na khangsak a: singnget in a hihsia a, a leng mang mai uhi.

¹⁷Kumpilukhu khu na mite lah khaukhup bang ahi ua, na sepaihte khovot ni a huandai a khaupe hon bokkhawm bang ahi uh, himahleh ni a hongsuak a, a leng mang ua, a omna mun uh theih ahi kei hi.

¹⁸Assuria kumpipa aw, na belamchingmite a lusu uhi: na miliante a khawl ua: na mipite tangte ah a dalh ua, pikhawmmi kuamah a omkei uhi.

¹⁹Na natna damna sing a omkei; na liamna a thupi mahmah hi: na husa za peuh in khut a hon betkhum ua; na gitlouhna thuak khalou kua a om a?