Read Paite Chin HABAKKUK 1 Bible Online

HABAKKUK 1 - Paite Chin bible

HABAKKUK 1

¹Puakgik zawlnei Habakkuk in a muh;

²Aw TOUPA, bang tan kei kikou ding a, nang hon zalou ding? Hiamgamna thu ah na kiang ah ka kikou khia a, nang n’on dawng nuam kei hi.

³Bangding a thulimlouhna hon musak a, ginatlouhna hon ensak na hia? Lohna leh hiamgamna lah ka ma ah a om ngal ua: kilanna a om a, kinakna a om hi.

⁴Huaiziak in dan a ze-awl a, vaihawmna a kuankhe ngeikei: giloute’n lah diktatte a umsuak vek ua; huaiziak in vaihawmna pawtkhia hekkawi in a om hi.

⁵Namte lak en unla, thei unla, lamdangtak in lamdang sa un: noute hunsung in nna khat ka sem ding hi, huai bel honhilh mahle uh na gingta nuam kei ding uhi.

⁶Ngai un, Kaldaite ka bawlkhia hi, huai nam hiamgam leh ngongtat; huaite’n amau tenna mun hilou tang ding in lei vailam khaktan in a pai uh.

⁷A mulkimhuai un a lauhuai ua; a vaihawmna uh leh a thuneihna uh amau ngei a kipan a pawtkhia hi.

⁸A sakolte uleng gialbemte sang in a kin zaw ua, nitaklam ngiate sang in a lauhuai zaw uh; a sakol tungtuangmite uh a kiphalh ua; ahi, a sakol tungtuangmite uh gamlapi a kipan a hongpai uhi; ne gai ding a kinoh muvanlai bang in a leng uhi.

⁹Hiamgam ding in avek un a hong ua; suahlam huih bang in kilawp tak in a mailam en in a tai ua; piaunel bang in salte a kaikhawm uhi.

¹⁰Ahi, amau kumpipate a nuihsan ua, amau ading in thuneite nuihzatna ahi uhi; kulh muanhuai chiteng a nuihsan ua; leivui a vuma, a lak zel ziak in.

¹¹Huaichiang in huih bang in a leng ding ua, a talek ding ua, a mawh ding uhi, huai a hatna pathian in a nei uhi.

¹²Aw TOUPA ka Pathian, ka Mi Siangthou, tangtawn a kipan na hi ka hia? Ka si kei ding uh, Aw TOUPA, vaihawm ding in amah na hihkipta hi. Nang, Aw suangpi, bawldik ding in amau na tungkheta hi.

¹³Gilou muhna ding a nang mit chimzaw, hoihlouhna ensim theilou, bang ding a lepchiahtak a thilbawlte mu a, gilou in amah sang a diktat zaw mi a nawmvalh lai a dai maimah na hia?

¹⁴Mite tuipi ngasate bang, a tung ua vaihawmtu neilou, leh bokvak ganhingte bang a bawl maimah na hi.

¹⁵Ngakuai in avek un a khaikhe tou a, a len in amau a man a, amaute a lenpi a huaikhawm a om in nuamsa in a kipak uhi.

¹⁶Huaiziak in len a ding in kithoihna a lan ua, a lenpi ua ding in gimlim a hal hi; amaute ziak a a tan uh hoih a, a sa uh a tam ziak in.

¹⁷Huaiziak in amau lente hihvuak a, namte hihsia gige tel ding ahi u maw?