Read Paite Chin HABAKKUK 2 Bible Online

HABAKKUK 2 - Paite Chin bible

HABAKKUK 2

¹Ka galvenna ah ka ding dia, insang ah ka pang ding a, ka kiang a bang ahia a gen chih thei ding in leh ka phunna tungtang bangchi’n ka dawng dia chih thei ding in ka ngak ding hi.

²Huan TOUPA’N kei a hondawng a, mengmuh pen gelh inla, thangkou in simkhia a a taipih theihna ding in, suangpek ah kichiantak in gelh in.

³Mengmuh lah hun sehsa ading ahilai a, a tawplam ah a kinoh a, a zuau kei ding; omtadih mahleh, ngak in; a hongtun ding ziak in, a zekai kei ding hi.

⁴Ngai in, a kha kiliansak amah mi diklou ahi, himahleh mi diktat tuh ginna in a hing ding hi.

⁵Ahi, uain in lepchiahtak in a omsaka, mi kiuangsak om kinken lou ahi; gawtmun bang a a deih hihlian, sihna bang ahi a, suklungkim theih ahi kei, nam tengteng amah ah a kaikhawm zaw a, a tung ah mipite tengteng a sekhawm hi.

⁶Hiaite tengteng in amah demin gentehna a gen un, amah demna paunak enghouna hiai bang a gen in, “Amah a lou hihpungpa tung a gik!” Bang tan? chi in, a genkei ding ua hia! Bang tan thilkhamna zang a kihih inbulpa;

⁷Nang honsual ding in thakhat in a hong thoukhia un, nang hon hihbuai ding a hong khanglou in, nang amaute ading in gallak suak ding hilou na hi maw?

⁸Nam tengteng na loh ziak in, mipite, a omsunte tengteng in nang a honlok ding ua; mite sisan ziak in leh gam tung, khopi tung leh asung a teng tengteng tung a hiamgam na hihna ziak in.

⁹“Tunglam sang a a bu a seh theihna ding leh gilou khut a kipan a tatkhiak a om theihna ding a, a in adia punna gilou mumi tung a gik hi!”

¹⁰Mi tampi satkhia leh, na hinna tung a khial in na inkawte tung ah zumhuaina na zong ahi.

¹¹Bang a kipan a suang kikou khe ding a, sing a kipan a inkam in dawng ding a hih ziak in.

¹²“Khua sisan a lam a, khopi gitlouhna a dingsakmi tung a gik hi.”

¹³Ngai in, mite sepgimna mei a khul ding singkhuah bang leh namte kisukgimna uh bangmahlou a suah ding sepaihte TOUPA thilgelsa ahi kei maw?

¹⁴Tuite’n tuipi a khuh bang in, TOUPA thupina theihna a lei pumpi dim ding a hih ziak in.”

¹⁵A inveng dawn ding pia a, huai a gu hel a, a vuaktanna uh na et theihna ding a, amah khamsaklai mi tung a gik hi;

¹⁶Thupina deihna in zumhuaina in na dim a; nang leng dawn inla, zeksumloupa bang in om in; TOUPA khut taklam nang lam ngatsak ahi ding a, na thupina tung ah zumhuaina hoihlou a om ding hi.

¹⁷Lebanon tung a hiamgam hihna in nang a honkhuh ding a, gamsate siatna in nang a hon lausak ding; gam tung, khopi leh asung a teng tengteng tung a hiamgam a mite sisan na suah ziak in.

¹⁸A gelhmi in a gelh, milim gelh; milim sun, zuaute sinsakpa, milim pautheilou bawl ding a, huai a a nasep bang phatuam ahia?

¹⁹Sing kiang a, Halh in, suang pautheilou kiang a, thou in, chi mi tung a gik hi; Ngai in dangkaeng leh dangka a luan milim, amah ah nakna omlou in a sinsak thei diam?

²⁰Himahleh TOUPA a biakin siangthou ah a om a; lei tengteng a ma ah daisipsip hen.