Read Paite Chin HABAKKUK 3 Bible Online

HABAKKUK 3 - Paite Chin bible

HABAKKUK 3

¹Zawlnei Habakkuk thumna, Sigionoth toh kituak a bawl.

²Aw TOUPA, na tanchin a gen uh ka za a, ka lau hi; Aw TOUPA, kumte lak ah nasep hihhalh ve, kumte lak ah ki theisakve; thangpaihna chitna theigige in.

³Teman a kipan in Pathian a hongpai a, Paran tang a kipan in Mi Siangthou, Selah A thupina in vante a tuam a, amah phatna in lei a dim hi.

⁴Amah thupina vak bang ahi a; A khut apan nizung a hong suakkhia hi; a thilhihtheihna huai ah a khuh hi.

⁵A ma ah hi a pai a, a khepekte ah suangkuangthei kuang a paikheta hi.

⁶A ding a, lei a lingsak a; a mu a, namte a hawlzak hi; tangtawn tangte hihdalh in a omta ua, tangtawn mualte a kun ua, a paina nidang a bang ahi.

⁷Kushan puaninte gimthuak in ka mu a; Midian gam mite linggawp uhi.

⁸Luite tung a TOUPA lungkimlou ahi diam aw? Luite tung a na hehna om hia ahihkeileh tuipi tung a na thangpaihna, na sakolte tung a na tuanna leh hotdamna na kangtalaite tung a na tuanna?

⁹Na thalpeu a vuak petmah a bawl ahi; namte kiang ah kichiamnate thutak ahi uh, Selah Luite’n lei a khangkhamsak hi.

¹⁰Tangte’n nang honmu ua, a lau uh; tuikhang in a kheng a, tuithuk in a aw a suah a, tung sang ah khutte a liktou hi.

¹¹A omna uah ni leh kha ading kinken ua; a pai bang un na thalte vak ah, na teipi te zolzol in a vak uhi.

¹²Heh in gam na palsuak petmah a, thangpai in namte na chil hi.

¹³Na mipite hondam ding in na kuankhia a, na thaunilh hotdamna ding in; giloute inn a kipan lutang na hihliam a; ngawng chiang pha hial in suangphum na hihse vek. Selah

¹⁴A galhatte lutang amah chiangte ngei in na sun a; kei hondalh sak ding in pingpei bang in a hongpai uhi; nuam a sakna uh gentheite a guk a nekhin ding in ahi.

¹⁵Na sakolte in tuipi leh tuihatte sunvumte na chil hi.

¹⁶Ka za a, ka gilpi a kising a, ka kam a awte ling pupulh a; ka guhte ah muatna a honglut a, ka mun ah ka linggawp hi; buai ni a amah sim dia hong kuan mite dou dia a hong paitouh chiang a ka lin louhna ding in, daidide in ka ngak ding hi.

¹⁷Theipi kung pak phalou in, Grepguite ah a gah omlou in; Olive sepgimna vuaksuak in, Loute’n nekding piangsaklou in; Huang apan ganhonte satkhiak a om in, huangsung ah ganta omta kei mahleh;

¹⁸Huchipi in leng TOUPA ah ka kipak ding a, ka hotdamna Pathian ah ka nuam ding hi.

¹⁹Jehovah, TOUPA, ka hatna ahi, ka khepekte zukpi khe bang in a bawl a, ka mun sangte ah a honvak sak ding hi. Lapu lian ading, tumging guineite a sak ding.