Read Paite Chin ZEPHANIAH 1 Bible Online

ZEPHANIAH 1 - Paite Chin bible

ZEPHANIAH 1

¹Judah kumpipa, Ammon tapa Josiah damlai a, Kusi tapa, Gedaliah tapa, Amariah tapa, Hezekiah tapa, Zephaniah kiang a TOUPA thu hongtung.

²“Leitung a thil om tengteng ka hihbei sipsip ding TOUPA’N a chi.

³Mihing leh sa ka hihbei ding; van a tungleng vasate, tuipi a ngasate, giloute toh kipalpuknate ka subei ding; leitung apan mihing ka satkhe ding hi” TOUPA’N a chi.

⁴“Judah tung leh, Jerusalem a tengte tung ah ka khut ka lik ding; hiai mun a kipan in Baal omlaite leh milim biak ching siampute min ka satkhe ding hi;

⁵Intung a van aksihon bia; TOUPA kiang a kun a kichiam khin napi a, Milkom mai a kichiamte;

⁶TOUPA zuihna a kipan kilehheite, leh TOUPA zong lou a, amah kanloute ka satkhe ding hi.”

⁷TOUPA Pathian ma ah dai sipsip in, TOUPA ni lah a naita ngal a; TOUPA’N lah kithoihna a bawlkhol khin a, a misapte a hih siangthou khinta hi.

⁸TOUPA kithoih ni’n hichi ahi ding, heutute, leh kumpipa tapate leh, gamdang puan a kizem huchibang tengteng ka gawt ding hi.

⁹Huai ni chiang in, phual kan a tawmte, hiamgamna leh khemna a a pu uh inn hihdimte, ka gawt ding hi.

¹⁰Huai ni chiang in Ngasa kongpi apan kah thawmging a om dia, kongpi Nihna apan mauna leh tangte a kipan nakpitak a siatna husa a om ding, TOUPA’N a chi.

¹¹Mau un, nou Maktes a tengte, na sumsin mite tengteng a omta kei ua; dangka teh mite satkhiak ahita uhi.

¹²Huai hun chiang in hichi a hi ding hi, khawnvak tawi in Jerusalem zong ding ka hi; mi uain dawn a tengden, a lungtang ua, TOUPA’N thil hoih hi’n thil gilou leng a hih sam kei ding chi mite ka gawt ding hi.

¹³Huchi in a hauhna uh gallak a honghi dia, a innte uh a segawp ding; innte a lam ding ua, himahleh a luah kei ding uh; grephuante a bawl ding ua, himahleh huai a uain a dawn kei ding uhi.

¹⁴TOUPA ni thupi a nai a, a nai a, a kinoh mahmah, TOUPA ni’n kah aw a thupi ding a; mi thilhihtheitakte huai ah a kap lawlawih ding uhi.

¹⁵Huai ni thangpaihna ni ahi, lungzinna leh dahna ni, mialna leh lungkiakna ni, meipi leh khomial bikbek ahi.

¹⁶Pengkul leh gallauna ni, khopi daikaih siatna, a ning a insangte siat ni.

¹⁷Huan mite tung ah dahna ka tun ding a, mittaw mite bang in a vak ding uhi, TOUPA tung a thil a hihkhelh ziak un; huchi in a sisan uh leivui bang leh a sa uh eklei bang in butkhiak in a om ding hi.

¹⁸TOUPA thangpaihna ni chiang in a dangka uhiam a dangkaeng uhiam in amaute a tan theikei ding; himahleh a mullitna mei in gam pumpi a kangbei ding a; hihbei a om ding a hih ziak in, beina mulkimhuai, gamsung a tengte tengteng tung ah a om ding hi.