Read Paite Chin ZEPHANIAH 2 Bible Online

ZEPHANIAH 2 - Paite Chin bible

ZEPHANIAH 2

¹Ki kaikhawm un, ahi, ki kaikhawm un, zumna neilou namte aw:

²Thupiak a kuankhiak ma a, buhsi bang a hon mutmang ma in, na tung ua TOUPA hehna kihtakhuai a hongtun ma in, na tung ua TOUPA hehna ni a hong tunma in ki kaikhawm un.

³A vaihawmna zui, nou lei a mi nunnemte tengteng aw, TOUPA zong un; diktatna zong un, migitna zong un; TOUPA hehna ni ah sel in na omkha thei uhi.

⁴Gaza lah nutsiat in a om dia, Askelon hihgawp in; suntang lai in Ashdod a hawlkhe ding ua, Ekron a ki zungkalh ding hi.

⁵Tuipi piau a teng Kereth namte aw na tung uh a gik hi, TOUPA thu in noute hondem hi, Kanaan aw, Philistiate gam a teng omlou ding in k’on hihgawp ding hi.

⁶Huchi in tuipi, piaute louhing noumun ahi ding a, belamchingte innte leh belamhonte a huangte ahi ding hi.

⁷Huai piau bel Judah inkaw omlaite ading ahi ding; huai ah a belamhonte uh a vak ding uh; nitaklam in Askelon innte ah a kual ding uh; TOUPA a Pathian un amaute a veh in, sal a a tang uh pikhe nawn ding a hih ziak in.

⁸Moab hon kouna leh, Ammon tate gensiatna ka zata hi. A kigitpihte uh tung a kiliansak a, ka mite gam a dou a sawm uhi,

⁹Huaiziak in sepaihte TOUPA, Israel Pathian ka hin bang in, Chihtaktak in Moab, Sodom bang ahi ding a, Ammon tate Gomorrah bang, lou bineite leh chikhukte munsia suakden ding a, ka mi omlaite’n a lok ding ua, ka nam omlaite’n a maute a luah ding uhi.

¹⁰Sepaihte TOUPA mite tung a a kiletsak ua, a kou ziak un, a kisaktheihna ziak un sawi in a om ding uhi.

¹¹Amau tung ah TOUPA a lauhuai ding a; lei pathiante tengteng kial in a hihbei chiang in michih in amau mun chiat leh namte tuikulh gam tengteng nangawn in amah a be ding uhi.

¹²Nou Ethiopiate leng, ka namsau a thah a om ding na hi uhi.

¹³Huan aman mallam dou in a khut a likkhe ding hi: Assuria a hihse ding; Ninevi a kisegawp ding, huchi in gamdai bang in a keu ding uhi.

¹⁴Belamte a lai ah a kual ding ua, namte ganta tengteng; vangawngsau leh sakuh a chial tungnung ah a giak ding ua; tohlet ah a aw in la a sa ding uh; sangkilte ah siatgawpna a om ding; sidar sing a nasepte a hihsiat ziak in.

¹⁵Hiai khopi nuamsa pilvangloutak a teng a, a lungtang a keimah ka hi, kei lou kuamah dang a omkei; chi ahi; bangchidan a hong segawp a, gantate adia kualna ding hi ahia; kuapeuh a kiang a pai in a nuihsan in, a khut a leh khum ding uhi.