Read Paite Chin ZEPHANIAH 3 Bible Online

ZEPHANIAH 3 - Paite Chin bible

ZEPHANIAH 3

¹Khopi nuaisiah, hihbuah leh nitsak a om tung a gik hi;

²TOUPA Aw a mangkei a, bawlhoihna leng a kipahpih kei; TOUPA ah a muangkei a; a Pathian a naih kei hi.

³A lak a a heutuliante humpinelkai humham bang ahi ua, a vaihawmmite nitaklam ngia a zingchiang a nekding nuse utlou bang ahi uhi;

⁴A zawlneite mizuau leh lepchiah ahi uh; A siampute un Mun Siangthou a hihbuah ua, dan tung ah a hiamgam uhi.

⁵A lak ua TOUPA a diktat a; thulimlou ahihkei ding; zingsang teng in a vaihawm khovak ah a lak a, a vuaksuak ngeikei a; himahleh dikloute’n zum chih a theikei uhi.

⁶Namte ka satkheta a, a insangte uh a kisegawp hi; a kongzingte uh ka susia a, kuamah a paikei uhi; a khopite uh hihsiat in a om a, huchi in mi a omkei ua a teng leng a omkei uhi.

⁷Chihtaktak in kei n’on kihta ding ua, bawlhoihna na kipahpih ding, ka chi a; huchi in a tenna satkhiak in a omkei dia, amah tungtang a sehsa tengteng bang in; himahleh beltak in a thou ua a hih tengteng uh a sesak uhi.

⁸Huaiziak in matding zuan a ka thohni a tun masiah hon nangak un TOUPA’N a chi; namte kaihkhawm ka tup ahi ngal a, lalgamte ka suktuah a a tung ua ka hehna ka sunbuak theihna ding in, ka thangpaihna lauhuai tengteng; ka mullitna mei a lei tengteng nekgaih a om ding lah ahi ngal a.

⁹Huai hun chiang a mite’n TOUPA min a loh ua, thukhatsat a amah na a septheihna ding un, a kiang uah muk siangthou ka pe ding hi.

¹⁰Ethiopia luite khenlam a kipan gimlim halmite, dalhsa ka mite tanu mahmah in ka thillat a hontawi ding hi.

¹¹Huai ni chiang in ka tung a na tatlekna, na thilhihte tengteng ziak in na zahlak kei ding; huai hun chiang a na lak a na mi kisathei leh kiuangsakte lakhe ding ka hih ziak in, huchi in ka tang siangthou ah na kiuangsak nawnta kei ding uhi.

¹²Himahleh na lak ah mi gimthuak leh genthei ka nuse ding a, TOUPA ah a muang ding uhi.

¹³Israel omsunte’n gilou ahihkei ding ua, zuau a gen sam kei ding uh; a kam uah leng lei khemhat a kimu kei ding hi; ne a, lum ding a, amaute kuamah in a hihlau louh ding ziak un.

¹⁴Lasa in, Aw Zion tanu; kikou in, aw Israel; Jerusalem tanu aw, na lungtang tengteng toh kipak in nuamsa in.

¹⁵TOUPA’N na vaihawmnate a lamangta a, na melma a delhkhia a, na lak ah Israel kumpipa, TOUPA ngei a om hi; gilou na lau nawn kei ding hi.

¹⁶Huai ni chiang in, Jerusalem kiang ah Lau ken, chih ahi ding; Aw Zion, na khutte ze awl sak ken.

¹⁷Na lak ah TOUPA na Pathian a om hi, hondam ding mihat; na itna ah a khawl ding, lasa in na tung ah a nuam ding hi.

¹⁸Khawmpi kulmut ziak a dahnate, noute adia puakgik leh gensiatna hite ka lamang ding hi.

¹⁹Ngai in, huai hun chiang in, nang hihgimte tengteng ka bawl ding a, panpih kiphamohnu ka hondam ding a, hawlmang a omnu ka lakhawm ding; huchi in lei tengteng a a zahlakna uh a na omkhitnate ah, phatna leh minthanna amau ka pe ding hi.

²⁰Huai hun chiang in k’on lanawn ding a, huai hun chiang in nou k’on kaikhawm ding hi; na mitmuh ua na saltanna ua kipan a k’on pinawn chiang in, lei a mi tengteng lak ah min leh phatna in nou k’on bawl ding, TOUPA’N a chita hi.