Read Paite Chin HAGGAI 1 Bible Online

HAGGAI 1 - Paite Chin bible

HAGGAI 1

¹Kumpipa Darias vaihawm kum nihna, kha gukna, a kha a ni khat ni’n, Judah ukpipa Sialtiel tapa Zerubbabel kiang leh, siampu lian, Jehozadak tapa Joshua kiang ah zawlnei Haggai a kipan TOUPA thu a hongtung hi:

²Hichibang in sepaihte TOUPA’N thu a gen: hiai mite’n, eite i kisak a TOUPA inn lam hun ahi kei a chi uhi.

³Huchi in zawlnei Haggai a kipan in TOUPA thu a hongtung hi:

⁴Hiai inn kigawpsa a om a, nou adia na intung dalneite ua na ten hun uh ahi maw? chi in.

⁵Huaiziak in tuin sepaihte TOUPA’N: Na lampite uh ngaihtuah un, a chi hi.

⁶Tampi na tuh ua, tawmchik na la uh; na ne ua, himahleh na vahkei uh; na dawn ua, himahleh na dawnkham zoukei uh; na kisilh ua, himahleh kuamah na lum kei uh; loh mu in iptaw vangsa a koih ding in loh a mu hi, chi in.

⁷Sepaihte TOUPA’N hichi in a chi: Na lampite uh ngaihtuah un.

⁸Tang ah hohtou unla, sing vala unla, inn lam un; huai ah ka kipak ding a, hihthupi in ka om ding, TOUPA’N a chi.

⁹Tampi na lamen ua, ngai un, tawmchik a honghi hi; inn na hontut chiang un, ka na mutmang hi. Bangding in? Sepaihte TOUPA’N a chi. Michih noumau inn tuam ah na tai chiat ua, kei inn pen kigawp a a om ziak in.

¹⁰Huaiziak in noute ziak in van in a daitui a khou a, lei in a gah a khou hi.

¹¹Huchi in, gam, tang, buh leh uain, sathau ah lei in a hon suahkhiak leh, mi leh ganhon leh, khut nasep tengteng tung ah keuna ka samta hi.

¹²Huchi in Sialtiel tapa Zerubbabel leh siampu lian Jehozadak tapa Joshua in mi omsunte tengteng toh TOUPA a Pathian uh aw leh TOUPA a Pathian un a sawl, zawlnei Haggai thute a mang ua; huan mite’n TOUPA a lau taktak uhi.

¹³TOUPA thukhah in TOUPA sawltak Haggai in mite kiang ah thu a gen a, TOUPA’N, Na kiang uah ka om, a chi, chi in.

¹⁴Judah ukpipa Sialtiel tapa Zerubbabel kha leh, siampu lian, Jehozadak tapa Joshua kha leh, mi omsunte tengteng kha TOUPA’N a tokthou a; a kuan ua sepaihte TOUPA, a Pathian uh inn ah na a semta uhi.

¹⁵A kha a ni sawmnih leh li ni, a kha gukna, kumpipa Darias vaihawm kum nihna in.