Read Paite Chin HAGGAI 2 Bible Online

HAGGAI 2 - Paite Chin bible

HAGGAI 2

¹Kha sagihna, kha a a ni sawmnih leh khatna in, zawlnei Haggai a kipan TOUPA thu a hongtung hi:

²Judah ukpipa Sialtiel tapa Zerubbabel kiang ah, leh siampu lian, Jehozadak tapa Joshua kiang leh, mi omsunte kiang ah tu’n thu gen in, chi in:

³Tuma a a thupina a hiai inn mu na lak uah kua na omlai ua? Huan tuin bangchibang in na mu ua? Na mitmuh un bangmahlou bang ahi maw? chi in.

⁴Himahleh, Zerubbabel aw, hattak in om in, TOUPA’N a chi; Joshua, siampu lian, Jehozadak tapa aw, hattak in om in; nou gam a mite tengteng aw, hattak in om unla, nasem un, TOUPA’N a chi; na kiang ua ka om ziak in, sepaihte TOUPA’N a chi.

⁵Aigupta gam a kipan na hong paikhiaklai ua na kiang ua thu ka khun a, na lak ua ka kha a om gige dan theigige un; lau kei un.

⁶TOUPA’N hichi in a chi ngal a; Khatvei lai, sawtloukal in, vante, lei leh tuipi, gamhulte tan in ka sing ding hi.

⁷Nam tengteng ka sing ding a, huchi in nam tengteng thildeihte a hongtung ding, huchi in hiai inn thupina in ka dimsak ding, sepaihte TOUPA’N a chi.

⁸Dangka kei a ahi, dangkaeng kei a ahi, sepaihte TOUPA’N a chi.

⁹Hiai inn thupina nanung amasa sang in, a thupizaw ding, sepaihte TOUPA’N a chi; hiailai mun ah muanna ka pe ding, sepaihte TOUPA’N a chi.

¹⁰Darias kum nihna, a kha kua a ni sawmnih leh lina in, zawlnei Haggai a kipan in TOUPA thu a hongtung hi.

¹¹Sepaihte TOUPA’N hichi in a chi: Tuin danlam thu a siampute dong un:

¹²Min a puansilh puanten ah sa siangthou lou leh a puanten in tanghou hiam, meh hiam, uain hiam, sa hiam sukha leh a hong siangthou diam? chi in. siampute’n, ‘Ii’ chi in a dawng uhi.

¹³Haggai in, “Misi luang ziak a mi nin in hiaite a bangpeuh khoih leh siang in a om diam?” a chi hi. siampute’n a dawng ua, “Sianglou in a om ding” a chi uhi.

¹⁴Haggai in a dawng a, TOUPA’N, huchibang in hiai mite, leh huchibang in hiai nam ka ma ah ahi uh; huchibang in a khutte uh nasep chiteng; leh huailai a a thillat uh a siangkei, a chi, chi in.

¹⁵Huchi in tuin, k’on ngen ahi, tuni a kipan leh a banban in, TOUPA biakin a suang a kichian ma in ngaihtuah un:

¹⁶Tehna sawmnih kivum min a hong muhlai, huai nite a om nung siah, sawmkhat kia a om hi; bawm sawmnga a dim khe ding a min uain thau a hon muhlai in, sawmnih kia a om hi.

¹⁷Na khut nasepte tengteng uah keuna leh kawtluatna leh gial in k’on gawt a; huchipi in leng kei lam na hong ngakei uh, TOUPA’N a chi.

¹⁸K’on ngen ahi, tuni a kipan leh a banban in, TOUPA biakin suangphum a kiphum ni a kipan, a kha kua na a ni sawmnih leh li ni a kipan, ngaihtuah un:

¹⁹Buhpang ah haichi a omlai hia? Ahi, grepgui, theipi kung, theibuhfai, olive sing a hongsuak kei lai a; tuni a kipan in k’on vualzawl ding hi.

²⁰Huai kha a ni sawmnih leh li ni’n Haggai kiang ah a nihveina in TOUPA thu a hongtung hi:

²¹Judah ukpipa Zerubbabel kiang ah, Van leh lei ka sing ding a,

²²Lalgam leh laltutphahte ka lumlet ding a, namte, lalgamte hatna ka suse ding a, kangtalaite leh huai a tuangte ka pai ding; huchi in sakolte leh a tung ua tuangmite a hongkum ding uh, michih a unau namsau in satlum ding a chi, chi in thugen in.

²³Huai ni chiang in Aw Zerubbabel, ka sikha, Sialtiel tapa, ka honla ding, sepaihte TOUPA’N a chi, suai namna in k’on bawl ding, TOUPA’N, a chi; nang ka hontelta ngal a, sepaihte TOUPA’N a chi.