Read Paite Chin ZEKARIAH 1 Bible Online

ZEKARIAH 1 - Paite Chin bible

ZEKARIAH 1

¹Darias kum nihna, kha giatna in, Iddo tapa, Berekiah tapa, Zekariah, zawlnei kiang ah TOUPA thu a hongtung hi:

²Na pipute uh tung ah TOUPA nakpitak in a lungkim kei hi, chi in.

³Huaiziak in nang a kiang uah, huchibang in sepaihte TOUPA’N a chi: Ka kiang ah hongkik un, sepaihte TOUPA’N a chi, huan na kiang uah ka hongkik ding, sepaihte TOUPA’N a chi, chi in.

⁴Hichibang in sepaihte TOUPA’N a chi, “Tuin na omdan gilou ua kipan leh na thilhih giloute ua kipan hongkik un” chi a zawlnei masate’n a genna uh, na pipute uh bang in omkei un: himahleh amau hon zakei ua, hon ngaikhe sam kei uh sepaihte TOUPA’N a chi.

⁵Na Pipute uh tua koi a om ahita ua? Huan a zawlneite uh tangtawn in a hing uhia?

⁶Himahleh ka thute leh ka thusehte, ka sikha zawlneite thupiak a ka piakte, huaite’n na pipute uh a delhphate uh ahi kei maw? Huan a kihei ua, “Sepaihte TOUPA’N i tung ua hihdia a ngaihtuah bang in, i omdan bangzel in leh i thilhihte bangzel a i tung ua hih eita ve” a chi uhi.

⁷Darias kum nihna, Sebat kha, kha sawmlehkhat ni sawmnih leh li ni’n, Iddo tapa, Berekia tapa Zekariah, zawlnei kiang ah, TOUPA thu a hongtung hi.

⁸Zan in mengmuhna in mi khat sakol san tung a tuang, munliap a om muisingte lak ah ading ka mu a, a nunglam ah sakolte a om ua, a san, a sanpuang leh a ngou ahi uhi.

⁹Huchi in, “Aw ka TOUPA, hiaite bang ahi ua?” ka chi a, huan kei hon houpih angel in ka kiang ah, “Hiaite bang ahi ua k’on ensak ding” a chi hi.

¹⁰Huai muising lak a dingpa’n a dawng a, “Hiaite lei a kivialleh a vak dia TOUPA’N a sawlte ahi uh” a chi hi.

¹¹Huchi in huai muising lak ah ding TOUPA’N angel a dawng ua, “Lei a kivialleh in ka vakta ua, ngai in, lei tengteng a tu kinken a, a khawl dide hi” a chi uhi.

¹²Huan TOUPA angel in a dawng a, “Aw sepaihte TOUPA, hiai kum sawmsagih na hehkhum, Jerusalem tung leh Judah khopite tung ah bang tan chitna neilou ding na hia?” a chi hi.

¹³Huchi in TOUPA’N thuhoihte, thu lungmuanhuaite a kei hon houpih angel a dawng hi.

¹⁴Huchi in kei hon houpih angel in ka kiang ah, hichibang in sepaihte TOUPA’N a chi: Thikthusetak in Jerusalem leh Zion ka deihthoh ahi, chi in, nang kikou in: chi in.

¹⁵Huan bangmah awlmohlou namte tung ah ka lungkim kei ding a: neukha lel a ka lunghihlouh lai in, siatna a thupisak semsem uhi.

¹⁶Huaiziak in hichibang in TOUPA’N a chi hi: Chitnate toh Jerusalem ah ka kiknawnta a, asung ah inn lam ahi ding, chi in.

¹⁷Hichibang in sepaihte TOUPA’N a chi: Hauhsakna ziak in ka khopite a kiphalh ding a; TOUPA’N Zion a lungmuan in, Jerusalem a tellai ding hi, chi in, kikou behlap lai in, chi in.

¹⁸Huan ka dak a, ngai in ki li ka mu hi.

¹⁹Kei hon houpih angel kiang ah, “Hiaite bang hi ding ahia?” ka chi a. Aman, “Hiaite Judah, Israel, leh Jerusalem hawlzak mite ahi uh” chi in a hon dawng hi.

²⁰Huchi in TOUPA’N siksekmi li a hon ensak hi.

²¹Huchi in ken, “Bang hihdia hiaite hong uh ahi ua?” ka chi hi. Aman thu a gen a, “Kuamah in a lu a dak saklouhna dia, Judah dalhzaksak hiai kite ahi uh: himahleh hiaite, dalhzaksak ding a Judah gam tung a a ki uh sangsak namte dou ding leh a kite uh paikhe ding a hongpai ahi uh” a chi hi.