Read Paite Chin ZEKARIAH 10 Bible Online

ZEKARIAH 10 - Paite Chin bible

ZEKARIAH 10

¹Vuah nanung hun in TOUPA vuah ngen un, meipite bawlpa TOUPA mahmah, huchi in vuahphinte, gam a loupate kiang ah, amaute a pe ding.

²Milimte’n bangmahlou thu a gen un, aisante’n zuau a mu uhi; mang zuauthei a gen ua, a thawn in a lungmuan uh; huaiziak in belamte bang in amau lampi ah a pai ua, belamchingmi a omlouh ziak in hihgim in a om uhi.

³“Belamchingmite tung ah ka hehna a puakzak a, a heutute uh ka gawt ding” sepaihte TOUPA’N Judah inkawte, a belamte a vehta a, kidouna a sakol hoih bang in amau a bawl ding hi.

⁴Amau a kipan in a ning a suang, amau a kipan puanin khetphim amau a kipan kidouna thalpeu, amau a kipan vaihawmpa a hong paikhe ding hi.

⁵Kidouna a kongzing a buannawi a a melmate uh childen in, mihatte bang in a om ding ua; a kiang ua TOUPA a om ziak in a dou ding uh; sakol tung a tuangte hih lungzin in a om ding uhi.”

⁶“Judah inkawte ka hatsak ding a, Joseph inkawte ka hondam ding, amaute k’on pinawn ding a, amau tung ah chitna ka nei hi; huchi in ka paihkhiak hetlouh bang a honghi ding uh; TOUPA a Pathian uh ka hi a, amau ka dawng ding hi.

⁷Ephraim mite mihatpa in a om ding ua, uain ziak in a lungtang uh a kipak ding a; ahi, a tate un huai a mu ding ua, a kipak ding uh; TOUPA ah a lungtang uh a kipak ding hi.

⁸Amau ka khutvan ding a, amau ka kaikhawm ding; amau ka tanta hi; A punkhitsa bang un a pung ding uhi.

⁹Namte lak ah hawldalh mah leng; gam gamlate ah kei hon theigige ding uh; huchi in a tate uh toh ka kiang ah hongkik nawn ding uhi.

¹⁰Aigupta gam apan ka pi nawn ding a, Assuria a kipan ka pi kiknawn ding hi; Gilead leh Lebanon gam ah amau ka pilut ding; amau ading a mun kidaih louh dong in

¹¹Gimthuakna tuipi a palkai ding ua, tuipi a tui kihawtte khet in a om ding uhi, huchi in Nile luipi thukna tengteng a kangvek ding; Assuria kisaktheihna koihniam in a om dia, Aigupta kumpi chiang a paimang vengveng ding hi.”

¹²Huan TOUPA ah amau ka hihhat ding a; a min in a vaktou un a vaksuk ding uh” TOUPA’N a chi.