Read Paite Chin ZEKARIAH 12 Bible Online

ZEKARIAH 12 - Paite Chin bible

ZEKARIAH 12

¹Judah tungtang a TOUPA thu kilakna. Van phalh khia a, lei kingakna koih a, mihing sung a mihing kha koihpa, TOUPA’N hichi in a chi.

²“Ngai in, khaw kimvel a mite ading in Jerusalem hoina nou in ka bawl ding a, Judah tung ah leng, Jerusalem lakna ah ahi ding hi.

³Huan huai ni chiang in hichi ahi ding a, mi tengteng ading in Jerusalem suang chimtakhuai in ka bawl ding a, amah ziak a tunggik kisate nakpi a liamsak in a om ding ua, amah dou ding in lei a namte tengteng a kikhawm khawm ding uhi.

⁴Huai ni chiang in lamdangsakna toh sakol chih ka khen ding a, hehna toh a tungtuangmi; huan Judah inkawte tung ah ka mit a hak ding a mittawtna in mite sakol chih ka gawt ding hi.

⁵Judah hausate’n a lungtang un, Jerusalem a tengte’n sepaihte TOUPA a Pathian uah hatna a nei uh” a chi ding uhi.

⁶“Huai ni chiang in Judah hausate sing lak a mei am bang in ka bawl dia, buhphal lak a meisel bang in; a kimvel a mite tengteng a negai ding uh. Khut taklam pang leh veilam pang a; Jerusalem amah mun ah a hong tengnawn ding uhi, Jerusalem mahmah ah.

⁷TOUPA’N amasa in Judah puaninte leng a hondam ding. David inkawte thupina leh Jerusalem a tengte thupina Judah tung a kiliksak louhna ding in.

⁸Huai ni chiang in TOUPA’N Jerusalem a tengte a hum ding a, a lak ua hatlou pen leng huai ni chiang in David bang a hi ding ua; David inkawte Pathian bang in a om ding ua, a ma ua pai TOUPA angel bang in.

⁹Huai ni chiang in hichi ahi ding a, Jerusalem dou ding a hong kuan namte tengteng hihse ding in ka kuankhe ding hi.

¹⁰Huan David inkawte tung leh Jerusalem a tengte tung ah hehpihna leh thumna kha ka sungbaw ding a; a sutpa uh lam a en ding uhi: amah a sun ding ua, min a tapa neihsun a sun bang in, amah, min a tamasa khasetak a a kah bang in, a kah ding uhi.

¹¹Huai ni chiang in Jerusalem ah sunna thupi a om ding, Megiddon guam a Hadadrimmon sunna bang in.

¹²Huan gam pumpin a sun dia; inkuan chih in a tuam in; David nam inkawte a tuam in, a zite un a tuam in; Nathan nam inkawte a tuam in, a zite un a tuam in

¹³Levi nam inkawte a tuam in, a zite un a tuam in, Shimei inkawte a tuam in, a zite un a tuam in;

¹⁴inkuan omlai teng a inkuan chih a tuam in, a zite un a tuam in.