Read Paite Chin ZEKARIAH 2 Bible Online

ZEKARIAH 2 - Paite Chin bible

ZEKARIAH 2

¹Huan ka dak a, ngai in mi khat a khut a tehna khau tawi ka mu hi,

²Huailai in ken, “Koilam a hoh ding?” ka chi hi. Aman ka kiang ah, “Jerusalem, a vailam bang tan hi, a dunglam bang tan hiam chih thei ding a teh ding” a chi hi.

³Huan ngai in, kei hon houpih angel a paikhia a, amah kituahpih ding in angel dang khat a paikhe nawn hi,

⁴A kiang ah, “Tai inla, hiai tangvalpa kiang ah, asung a mi leh gante tam mahmah ziak in, khua kulhbang bei bang in Jerusalem luah in a om ding va chi in, a chi hi.

⁵Amah adia a kimvel a mei kulhbang a hih ding ziak in, leh a lak a thupina ka hih ding ziak in, TOUPA’N a chi” chi in.

⁶Khai, khai, mallam gam a kipan taikek un, TOUPA’N a chi: van huih lite bang in nou lah k’on dalhzaksakta ngal a, TOUPA’N a chi.

⁷Khai! Zion ah tai in, nang Babulon tanu toh tengkhawm un.

⁸Huchibang in sepaihte TOUPA’N a chi hi: Thupina khit in aman nang honlok namte kiang ah kei a honsawl hi; kuapeuh nang honkhoih in a mit nauta khoih ahi.

⁹Ngai in, a tung ua ka khut sing ding ka hi a, huchi in a na uh sepsakte ading in gallak ahi ding uh: huan sepaihteTOUPA’N kei a honsawl chih na thei ding uhi.

¹⁰Aw Zion tanu, lasa inla, kipak in; ngai in, kei, na lak ua ka teng ding in ka hongpai hi, TOUPA’N a chi.

¹¹Hua nichiang in TOUPA lam ah nam tampi a kizom khawm ding ua, ka mite ahi ding uh: na lak ah ka teng ding, huchi in sepaihte TOUPA’N kei na kiang ah a honsawl chih na thei ding hi.

¹²Huan gam siangthou a a tantuam bang in TOUPA’N Judah a luah ding a, Jerusalem a hon tel ding hi.

¹³Dai un, mi tengteng, TOUPA ma ah: a omna siangthou a kipan in amah a khanglou in a thoukheta hi.