Read Paite Chin ZEKARIAH 3 Bible Online

ZEKARIAH 3 - Paite Chin bible

ZEKARIAH 3

¹Huchi in siampu lian Joshua TOUPA angel ma ading leh Setan a khut taklam a a hek ding ading a hon musak hi.

²TOUPA’N Setan kiang ah, “Aw Setan, TOUPA’N hontai hen; ahi, Jerusalem telpa TOUPA’N nang hontai hen: hiai mi kangmei a kipan a sahkhiak ahi ka hia?” a chi hi.

³Huchi in Joshua puansilh nin a kizem in angel ma ah ading hi.

⁴Angel in a ma a dingte kiang ah thu a genta hi. “Amah a kipan puansilh nin lamang un” chi in. Huan a kiang ah, “Ngai in, na thulimlouhna nang a kipan ka lakheta a, puansilh hoih in ka honzem ding hi” chi in.

⁵Huan, ken “A luzang ah lukhu siang koih uhen” ka chi a. Huchi in lukhu siang a luzang ah a koih ua, puansilh in a tuam ua; huchi in TOUPA angel kiang nai ah ading hi.

⁶Huan TOUPA angel in Joshua kiang ah hiai thu a gen hi,

⁷“Hichibang in sepaihte TOUPA’N a chi: Ka lampite a na om a, ka thupiak na zuih leh, ka inkaw vai na hawm ding a, ka vaihawmna innte ah thu na nei dia, hiai a dingte lak a luttheihna k’on pe ding hi, chi in.

⁸Aw siampu lian Joshua, Tuin za un: nang leh na ma a tu na lawite; amau chiamtehna hoih mite ahi ua: ngai in ka sikha Hiang honpi ding ka hih ziak in.

⁹Ngai in, Joshua ma a ka suang koih, suang khat mai sagih nei tung ah laigelh ka gelh ding, sepaihte TOUPA’N a chi hi. Ni khat thu in gam pumpi thulimlouhna ka lamang ding hi chi in.

¹⁰Huai ni chiang in, na grepgui nuai leh theipi sing nuai ah michih in a invengte na chial ding uh,” TOUPA’N a chi.