Read Paite Chin ZEKARIAH 6 Bible Online

ZEKARIAH 6 - Paite Chin bible

ZEKARIAH 6

¹Huchi in ka dak nawn a, ngai in, mual nih kikal a kipan in kangtalai li a hong paikhia ua, huai mualte dal mual ahi uhi.

²Kangtalai khat in sakol san a nei ua kangtalai nihna in sakol vom;

³Kangtalai thumna in sakol ngou; kangtalai lina in sakol puang hat a nei uhi.

⁴Huan kei hon houpih angel ka dong a a kiang ah, “Hiaite bang ahi ua, ka TOUPA?” ka chi hi.

⁵Angel in a hondawng a, ka kiang ah, “Hiaite van huih lite, lei tengteng TOUPA ma a vading khin a paikhete ahi uh.

⁶Sakol vomte omna kangtalai mallam gam ah a paikhia ua; amau zui in angoute tumlam ah a pawtkhia ua; a puangte simlam zuan in a pawtkhia uhi.”

⁷Huan sakolte a paikhia ua, lei kantan a a vialvak theihna ding uh a ngaklah uhi. Aman, “Hiai a kipan pai unla, lei kantan in vialvak un” a chi a, huchi in lei kantan in a vialvak uhi.

⁸Huchi in honsam a, ka kiang ah thu a gen hi, “Ngai in, mallam gam zuan a paite’n mallam gam ah ka kha a khawlsakta uh” a chi hi.

⁹Huan TOUPA thu ka kiang ah a hongtung hi:

¹⁰Saltangte a kipan thilpiak, Heldai, Tobijah, leh Jedai a kipan la in; a ni mah in nang hong inla, Zephaniah tapa Josiah inn ah lut in, Babulon a kipan hongpai ahi na uhiam; chi in.

¹¹Ahi, amau a kipan dangka leh dangkaeng la inla, kumpilukhute bawl in, Jehozadak tapa Joshua, siampu lian luzang ah khusak in.

¹²Huan a kiang ah thugen inla, huchibang in sepaihte TOUPA’N a chi: Ngai in, mi a min Hiang; a mun a kipan a hong kakhe ding a, aman TOUPA biakin a lam ding hi.

¹³Aman TOUPA Biakin a lam ding a, thupina silhsak in om ding a, a mangtutphah tung ah a tu dia, vai a hawm ding; a mangtutphah tung ah siampu ahi ding; huchi in lemna thuhilhna amau gel kikal ah a om ding hi.

¹⁴Kumpilukhute Helem, Tobijah, Jedai leh Zephaniah tapa Josiah kiang ah, TOUPA biakin a theihgigena ding in a om ding uhi.

¹⁵Huan gamlapi a omte a hongpai ding ua TOUPA biakin a honglam pih ding ua, huchi in sepaihte TOUPA’N kei na kiang ah a honsawl chih na thei ding hi. Huchi in hiai a hongtung ding, TOUPA na Pathian aw uttak a na man uleh, a chi, chi in.