Read Paite Chin ZEKARIAH 7 Bible Online

ZEKARIAH 7 - Paite Chin bible

ZEKARIAH 7

¹Kumpipa Darias kum lina in hichi a honghi a, Kisleu kha, kha kua na ni li ni’n, Zekariah kiang ah TOUPA thu a hongtung hi.

²Huan amau Bethel a omte’n Serezer leh Regemmelek; leh a mite uh TOUPA deihsakna ngen ding in a sawl uhi,

³Sepaihte TOUPA inn a siampute kiang leh zawlneite kiang a thu vagen ding in. “Kum tampi sung ka na hihsa bang in a kha ngana ah kei leh kei kihihtuam in, kap a sun in an ka ngawl diam?” chi in.

⁴Huailai in sepaihte TOUPA thu ka kiang ah a hongtung a:

⁵Gam a mite tengteng kiang leh, siampute kiang ah thugen in. Hiai kum sawmsagih sung, a kha ngana leh a kha sagihna a an na ngawl chiang un, kei ding in, keimah ding in na ngawlta uhia?

⁶Na nek chiang un, na dawn chiang un, noumau amah ding in na ne un, na dawn uh ahi kei maw?

⁷Jerusalem a kiluah lai leh a hauhsak lai a, a kimvel a khopite leh a Sim leh gamniam gam a kiluah lai a zawlnei masate zang a TOUPA tangkoupih hiai thute ahi kei ua hia? chi in chi in.

⁸Huan TOUPA thu Zekariah kiang ah hiai bang in a hongtung hi:

⁹Hichibang in sepaihte TOUPA’N thu a gen hi: Vaihawmna dik hih un, michih in a unau tung ah chitna leh lainatna ensak hen.

¹⁰Meithai nuaisiah kei un, pabeite, mikhual, gentheite leng, na lak ua kuamah in a lungtangin a unau siatna ding gilou ngaihtuah kei hen, chi in, a chi hi.

¹¹Himahleh ngaihkhiak a utkei ua, paupengtak in a ki heimang ua, a zaklouhna ding un a bil uh a hum uhi.

¹²Ahi, suangtak bang in a lungtang uh a bawl ua, huchi kei leh dan a za kha ding ua, zawlnei masate khut a a Kha a sepaihte TOUPA’N a thukhakte a zakha ding uh; huaiziak in sepaihte TOUPA a kipan nakpi a hehna a hongtung hi.

¹³Huan hichi a honghi a, Ka kikou lai a a ngaihkhiak louh ziak un a kikou chiang un leng ka ngai khesam kei ding, sepaihte TOUPA’N a chi hi.

¹⁴Himahleh a theihlouh uh namte lam ah pingpei in amaute ka delhsak ding. Huchi in gam amau nung in a segawp ding a, kuamah in a kantan un a lehkik kei ding uh; gam nuam a sukgawp ziak un, a chi chi in.