Read Paite Chin ZEKARIAH 8 Bible Online

ZEKARIAH 8 - Paite Chin bible

ZEKARIAH 8

¹Huchi in sepaihte TOUPA thu ka kiang ah a hongtung nawn a:

²Hichibang in sepaihte TOUPA’N a chi: Thikthusetakin Zion ka deihthoh a, nakpitak a hehna toh amah adin ka phatuamngai hi, chi in.

³Hichibang in TOUPA’N a chi: Zion ah kiksak in ka om a, Jerusalem lai ah ka tengding: Jerusalem bel Thutak khopi, sepaihte TOUPA mual, mual siangthou a kichi ding hi.

⁴Hichi in sepaihte TOUPA’N a chi; Jerusalem kongzingte ah putekte leh pitekte a hong khosa ding ua, a upat ziak un a khut uah chiangkhun a khunchiat ding uhi.

⁵Khopi kongzingte a kimawl in numei leh pasal naupangte in a dim ding hi.

⁶Hichibang in sepaihte TOUPA’N a chi: Huai ni chiang a hiai mite lak a omlaite mit a lamdang ahihleh, kei mit ah leng a lamdang sam kei dia hia? sepaihte TOUPA’N a chi.

⁷Hichibang in sepaihte TOUPA’N a chi: ngai in, suahlam gam a kipan leh tumlam gam a kipan, ka mite ka hondam ding hi:

⁸Amau k’on pikhawm ding a, Jerusalem lai ah a teng ding ua; ka mite ahi ding ua, thutak leh diktatna ah, a Pathian uh ka hi ding hi.

⁹Hichibang in sepaihte TOUPA’N a chi: TOUPA inn suangphum phum ni a kipan a hiai nite a zawlneite kam a kipan a hiai thu zate’n, tempul a kilam theihna ding in noute khut hatsak un.

¹⁰Huai nite malam a mihing adia kilohna a omlouh a, a ganta dia leng kilohna a om samlouh ziak in; melma ziak in a pawtkhia hiam honglut hiam ading in leng muanna himhim a omsak kei a, mi tengteng michih a invengte dou in ka koih hi.

¹¹Himahleh tuin zaw hiai mite lak a omlaite tung ah tuma lam in nite a bang in ka omkei ding, sepaihte TOUPA’N a chi hi.

¹²Huan haichi pawi a om ding ahi ngal a; grepgui in a gah a suang ding a, leitung in a pung a omsak ding a, vante’n a daitui uh a pe ding uh; huchi in hiai mite lak a omlaite hiai thil tengteng ka luahsak ding hi.

¹³Huan hichi a hi ding a, namte lak a hamsia na hihtak bang un, Aw Judah inkawte leh Israel inkawte, huchibang mah in nou k’on hondam ding a; vualzawlna na hi ding uh; lau kei un, himahleh na khutte uh hatsak un.

¹⁴Hichibang in sepaihte TOUPA’N a chi: Na pipute un a hon hihheh lai ua, na tung ua gilou hih ding ka tup bang in, huchi in ka nem tuankei, sepaihte TOUPA’N a chi:

¹⁵Huchi in Jerusalem tung leh Judah inkawte tung ah hoih hih ding tulai nite in ka tum nawnta hi; lau kei un.

¹⁶Na hih ding uh thil hiaite ahi: Michih in a invengte toh thutak kihilh un; na kongpite uah thutak leh lemna vaihawmna hih un;

¹⁷Huan na lak ua kuamah in a invengte siatna ding na lungtang uah gilou ngaihtuah kei un; thuchiam diklou deihkei un; hiaite tengteng ka thil huatlam ahi uh, TOUPA’N a chi.

¹⁸Huan sepaihte TOUPA thu ka kiang ah a hongtung nawn hi:

¹⁹Hichibang in sepaihte TOUPA’N a chi; kha lina anngawlna, ngana anngawlna, sagihna anngawlna leh sawmna anngawlna, Judah inkawte ading in nuamna leh kipahna, Ankuangluina vualnopna ahi ding hi; huaiziak in thutak leh lemna deih in, chi in.

²⁰Huchi in sepaihte TOUPA’N a chi; hichibang in a hong omlai ding, mite leh khopi tampite apan a hongpai ding ua;

²¹Huan “Khopi khat a te khopi dang a tengte kiang ah a pai ding ua, TOUPA deihsakna ngen ding leh sepaihte TOUPA zong ding in kintak in kuanni; keileng ka kuan ding” a chi ding uhi.

²²Ahi, mi tampite leh nam hatte Jerusalem a TOUPA sepaihte zong ding leh TOUPA deihsakna ngen ding in a hong kuan ding uhi.

²³Huchibang in sepaihte TOUPA’N a chi; huai ni chiang in hichi a honghi ding: namte pau tengteng a kipan mi sawm in Judah mipa puanten a len ding ua, “Na kiang ah ka pai ding uh, na kiang ah Pathian a om chih ka za ngal ua” a chi ding uh, chi in.