Read Paite Chin ZEKARIAH 9 Bible Online

ZEKARIAH 9 - Paite Chin bible

ZEKARIAH 9

¹Hadrad gam dou in TOUPA thu a kilak a, Damaska a khawlna mun ahi ding; Aram khopite TOUPA a ahi, Israel namte tengteng a hih bang un;

²Huan pil mahle uh a gamgit pih Hamath, Tura leh Sidon tung a tung ding hi,

³Tura kulh muanhuaitak in a kilamkhia in, dangka leivui bang in vum venvon in, kongzingte buannawi bang in dangkaeng hoih in dim mah leh,

⁴Ngai in, TOUPA’N amah neih leh lam a lamang ding a, tuipi a a hauhsakna a hihse ding; huchi in mei a nekgaih a honghi ding hi.

⁵Askelon in huai a mu ding a, a lau ding; Gaza in leng a mu dia, nakpi a suknat in a om ding; Ekron, a lametna zahlakna ahi ding a; Gaza a kipan kumpipa a mangthang ding a, Askelon luah in a omkei ding hi.

⁶Huchi in Ashdod ah chi siangloute a teng ding ua, “Philistiate kisaktheihna ka satkhe ding hi.

⁷Huan a kam a kipan a sisan ka lamang ding a, a hate kikal a kipan in a kihhuainate; huchi in amah leng i Pathian ading in omsun ahi ding hi; Jebusmi bang in Judah leh Ekron ah hausa ahi ding hi.

⁸Huan sepaihpawlte ziak in ka inn a kimvel in ka um ding, huchi a kuamah a paisuak uhiam a kiknawn louhna ding un; huchi in nuaisiahmi in a paltan nawnta kei ding; tuin ka mit mahmah in ka muta hi” a chi hi.

⁹Aw Zion tanu, nakpi mahmah in kipak in; Aw Jerusalem tanu, kikou in; ngai in, na kumpipa kiniamkhiak in, sabiltungtung, sabiltung nou tuan ngei nailouhna tung a tuang in na kiang ah a honghi: Amah a diktat a, hotdamna a nei.

¹⁰Ephraim a kipan kangtalai leh Jerusalem a kipan sakol ka satkhe ding a, kidouna thalpeu satkhiak in a om ding a; namte kiang ah lemna thu a gen ding; huchi in a gam tuipi a kipan tuipi tan, luipi a kipan lei tawpnate tan ahi ding hi.

¹¹Nang tungthu ah leng, na thukhun sisan ziak in tui omlouhna kawkhuk a kipan in na suangkulhtangte ka sawlkheta hi.

¹²Lametna suangkulh a tangte, kulh muanhuai lam ah kihei un; tuni mahmah in na tung ah a zahnih in k’on dinkik ding chih ka phuang hi.

¹³Judah thalpeu bang in ka lai kulta a, Ephraim thal a bawl in thalpeu ah ka bulhta hi; Aw Zion, na tapate dou ding in na tapate ka tokthou ding, Aw Grik, huchi in mi hat namsau bang in, nang k’on bawl ding hi.

¹⁴Huchi in a tung ah TOUPA a kimu ding a, khophia bang in a thal a paikhe ding; TOUPA Pathian in pengkul a mut dia, simlam pingpei toh a paikhe ding hi.

¹⁵Sepaihte TOUPA’N amau a hunkhe ding a; suang sailimgtangte a sikden ding ua; a negai ding ua, uain bang in a sisan uh a dawn ding ua; noubem te bang in a dim ding ua, maitam ningte bang in a kawt ding uhi.

¹⁶Huai ni chiang in TOUPA a Pathian un amau belamhon bang in a hondam ding a; lallukhu a suangmantamte bang in a gam ah a tang ding uhi.

¹⁷Ahi, a hoihna a lian mahmah a, a kilawmna a thupi mahmah a; buh leh bal in tangvalte a tai ding a, uain thak in nungakte a tai ding uhi.