Read Paite Chin MALAKI 1 Bible Online

MALAKI 1 - Paite Chin bible

MALAKI 1

¹Israel kiang a TOUPA kilakna Malaki in a muh:

²“Ka hon itta,” TOUPA’N a chi. Nou bel, “Koilai ah ahia nang kou n’on ittak?” na chi uhi, “Esau, Jakob unaupa ahi kei maw? Hinapi in, Jakob ka it hi.”

³Himahleh Esau ka hua a, a tangsangte ka hihgawp a, a goutan gamdai sehalte kiang ah ka peta hi, TOUPA’N a chi.

⁴Edom in, “Suk zawngkhal in i om ua, himahleh i kiknawn ding ua mun segawpsate i lam ding uh” chi mahleh, hichibang in sepaihte TOUPA’N “A lam nawn ding ua, himahleh ka chimsak ding; mite’n amaute gitlouhna gam leh, mipi a tung ua tangtawn a TOUPA hehna nam” a chi ding uhi.

⁵Huchi in na mitte un a mu dia, “Israel gamgi khen ah TOUPA letsak in om hen” na chi ding uhi.

⁶“Tapa in a pa a zahtak a, sikha in a pu; huchi a pa ka hihleh, kei zahtakna koi a om ahia?” Huchi a pu ka hihleh, kei kihtakna kaw om ahia? Sepaihte TOUPA’N na kiang uah a chi, siampu ka min musitte aw. Nou koilai ah ahia na min ka muhsit uh? na chi uhi.

⁷Ka maitam tung ah tanghou sesa na lan ua, nou koilai ah ahia k’on hihnit uh? na chi uh. TOUPA dohkan a simmohhuai, na chih na uah.

⁸Kithoihna ding a mittaw na lat un, gilou ahi kei maw? Khebai leh damlou na lat un, gilou ahi kei maw? Tuin na ukpipa kiang ah tawi in na tung ah a lungdam diam? Ahihkeileh nou hon deihsak diam?” sepaihte TOUPA’N a chi.

⁹Huchi in tuin k’on ngen hi, i tung a a chitna na theihna ding in Pathian deihsakna ngen un. Hiai na khut ua kipan thilpiak toh nou hon deihsak diam? sepaihte TOUPA’N a chi.

¹⁰A thawn a ka maitam tung a mei na tohlouhna ding un, na lak ua mi khat kongkhakte khak ding om leh aw; Sepaihte TOUPA’N, “Nou ah kipahna ka neikei a, na khut ua kipan in thillat leng ka sangsam kei ding.

¹¹Ni suahna a kipan ni tumna lam pha hial in leng Jentelte lak ah ka min a thupi hi, munchih ah ka min adin gimlim a kilan a, thillat siangthou; Jentelte lak a ka min a let ziak in, sepaihte TOUPA’N a chi.

¹²Himahleh nou na hihnin ua, TOUPA dohkan a nin a, huai a a gah toh a an nangawn a zahpihhuai na chih na uah.

¹³‘Ngai un, a chimtakhuai na e; na chilai ua, huan na hahchhiau khum uh, sepaihte TOUPA’N a chi, hiamgam a lak gante n’on tawi ua, khebaite, damloute, huchibang in thillat na hontawi uhi; na khut ua kipan in hiai ka sang peuhmah ding hia?’ TOUPA’N a chi hi.

¹⁴Himahleh a ganhon lak a a pa nei a, thuchiam a TOUPA lak a thil demkai a kithoih, mikhempa hamsiat in om heh; Kumpipa thupi ka hi a, Jentelte lak ah ka min a lauhuai ngal a” sepaihte TOUPA’N a chi.