Read Paite Chin MALAKI 2 Bible Online

MALAKI 2 - Paite Chin bible

MALAKI 2

¹Tuin, nou siampute aw, “Hiai thupiak nou ading ahi.

²Ka min pahtawi ding a, na ngaihkhiak kei ua, na lungtang ua na koih kei uleh, huchi in na tung uah hamsia ka tungsak ding a, na vualzawlnate uh ka hamsiat khum ding, sepaihte TOUPA’N a chi, ahi, lungtang a na koihlouh ziak un, ka hamsiat khinta hi.

³Ngai un, nou ziak in na chi tuh ka sal ding a, na mai uah ek ka theh thang ding a, na kithoihna ek ngei uh; huchi in huai toh lakmang in na om ding uhi.

⁴Hiai thupiak, Levi toh ka thukhun a om theihna ding in, na kiang uah ka honsawlta chih na thei ding uh, sepaihte TOUPA’N a chi.

⁵“Hinna leh lungmuanna ka thukhun amah toh a om hi, a kihtak theihna ding in a kiang ah a maute ka peta a, kei a hon kihta a, ka min a zahtak mahmah hi.

⁶Thudik a kam sung ah a om a, diktatlouhna a muk ah a kimu kei hi; lungmuanna leh tanna ah ka thu a zui a, gitlouhna a kipan in mi tampi a hei mangsak hi.

⁷Siampu mukte’n theihna a kem un, a kam uah danthu a zong ding uh ahi him hi; amah lah sepaihte TOUPA sawltak ahi ngal a.

⁸“Himahleh lampi a kipan a pialsak in na om ua; tampi dan ah na kisuipuk sak uhi; Levi thukhun na suseta uhi.

⁹Huaiziak in ka lampite na zuihlouh dungzui un, dan a mite deihsak tuam na neihzawk ziak un, ken leng mipite tengteng ma ah zahpihhuai leh dai in k’on bawlta hi, sepaihte TOUPA’N a chi.

¹⁰I vek un pa khat i neikei ua hia? Pathian khat in honsiam ka hia? Bangdia lepchiah tak a michih in i pipute uh thukhun hihnin a unau siatna ding a hih i hi ua?

¹¹Judah in lepchiahtak in a hihta a, Israel ah leh Jerusalem ah kihhuai hih in a om hi, Judah in Pathian Mun Siangthou it a hihninta a, theihlouh pathian tanu a kitenpihta hi,

¹²TOUPA’N hiai thilhihpa, sinsakpa leh sinsak a ompa, Jakob puanin a kipan leh sepaihte TOUPA kiang a thillat lanpa a satkhe ding hi.

¹³Huan hiai na hih nawn uh; TOUPA maitam khitui, kah leh thumna in na khuh ua, thillat a limsak nawnlouh a, na khut ua kipan a deihsakna toh san leng a san nawnlouh tanpha in.

¹⁴Hinapi in lah, bangding in? a chi uhi. Na tuailai zi, lepchiahtak a na bawl, na kithuahpihnu, na thukhun zi hinapi in, amah leh nang kikal ah TOUPA theihpihpa a hih khittak ziak in.

¹⁵Pathian in nihte sa khat in honbawl kei maw? Khat in na kha hon bawlsak in, a hingsak kei maw? Bang a chia khat? Pathian limsak chi a zong ahi. Huaiziak in michih in a tuailai zi lepchiahtak a hihlou ding in na kha thu uah pilvang un.

¹⁶TOUPA Israel Pathian in a chi, koihmangna ka hua a, hiamgamna a puansilh khuh mipa ka mudah hi, sepaihte TOUPA’N a chi. Huaiziak in, michih in a tuailai zi lepchiah tak a hihlou ding in, na kha thu uah pilvang un.

¹⁷Na thu un TOUPA na hihgimta uh, koi ah k’on hihgim ua eita na chilai uhi: michih gilou hih TOUPA mitmuh in a hoih a, huaite ah amah a kipak hi na chihna uah leh vaihawmna Pathian kaw om hiam na chih nakna uah.