Read Paite Chin MALAKI 3 Bible Online

MALAKI 3 - Paite Chin bible

MALAKI 3

¹“Ngai in, ka sawltak ka sawl a, aman ka ma ah lampi a bawlkhol ding a TOUPA, na zon uh, a biakin ah thakhat in a hongpai ding; na kipahna uh, thukhun sawltak, ngai un, a honghi,” sepaihte TOUPA’N a chi.

²Himahleh a hong paina ni kuan a thuakzou thei dia? A honglat chiang in kua a dingzou dia? Amah hihsiangthou mei leh sahbon bang ahi ngal a.

³Huchi in dangka hih siangthoumi leh siangsakmi bang in a tu ding a Levi tapate a hihsiang ding hi, dangkaeng leh dangka bang in amau a khuahsiang ding a, huchi in diktatna in TOUPA kiang ah thillatte a lan ding uhi.

⁴Huaichiang in Judah leh Jerusalem thillatte nidanglai bang leh tang a kumte bang in TOUPA ading in namtui a hi ding hi.

⁵“Huan vaihawmna ah aisanmite kalh in, angkawmte kalh in, zuau a kichiamte kalh in theihpihpa kin ka hi ding a, loh thu a migoih, meithai, nu leh pa bei, nuaisiah, a thuneihna a kipan mikhual kaiheipa, kei hon kihtaloute kalh in, na kiang uah ka hongding sepaihte TOUPA’N a chi.

⁶“Kei TOUPA ka zulhzau kei a; huaiziak in Jakob tapate aw, halbei in na omkei uhi.

⁷Na pipute uh damlai a kipan ka thusehte na kilehheisan ua, na zuikei uhi. Ka kiang ah hongkik unla, na kiang uah ka hongkik ding, sepaihte TOUPA’N a chi. Himahleh nou, koi ah i kik ding ua? na chi uhi.

⁸Min Pathian a lok diam? Hinapi in noute’n n’on lok uhi. Himahleh nou koi ah k’on lok ua eita? na chi uhi. Sawm a khatte ah leh thillat ah.

⁹Hiai nam pumpi in, kei n’on loh ziak un hamsiatna a hamsiat na hi uhi.

¹⁰Ka inn sung a an a hongom theihna ding in koihkhomna inn ah sawm a khat avek in hon lalut unla, huai in kei hon entel un, sepaihte TOUPA’N a chi hi. A koihna ding dantan kiching omlou khop in van tohlette hong in, vualzawlna k’on buakkhe kei na hiam!

¹¹Huan negaimi pen nou ziak in ka sal ding a, na leigahte uh a suse kei ding hi; na grepgui u leng lou ah a hun tunma in a gah a kesak kei ding hi, sepaihte TOUPA’N a chi.

¹²Huchi in nam tengteng in nang nuamsa a honchi ding ua; gam kipahhuai na hih ding ziak un, sepaihte TOUPA’N a chi.

¹³“Kei dem a na thute uh a khauh hi” TOUPA’N a chi. “Nou koi ah nang dem in thu ka gen ua eita” na chi uhi.

¹⁴“Pathian nasep a thawn ahi”; a thupiak i zuih ua, sunna puan silh a sepaihte TOUPA ma a i om uh bang a a phattuamna” chi uhi.

¹⁵Tuin kisatheite nuamsa chi in, a gitlouhna nasemte tunding in a om uh; ahi; Pathian khemte hotkhiak in a om uh” i chi uhi.

¹⁶TOUPA kihtate a kihoupih ua; huchi in TOUPA’N a ngaikhia a, a za a, TOUPA kihta a, a min ngaihtuahte a ma uah theihgigena laibuzial ah gelh ahi.

¹⁷“Huan amau kei a a hi ding ua, gou lamdangtak ka bawl ni chiang in” sepaihte TOUPA’N a chi. Min a nasem amah tapa a hawi bang in huchi in amau ka hawi ding hi.

¹⁸Huai hun chiang in na hong kihei ding ua, diktatte leh giloute, Pathian nasem leh amah semloute kal na khenchian thei ding uhi.