Read Paite Chin MATTHAI 10 Bible Online

MATTHAI 10 - Paite Chin bible

MATTHAI 10

¹Huai zoh in a nungzui sawm lehnihte a kiang ah a samkhawm a, a kiang uah khaninte tung leh amau hawlkhe ding, damlouhna chiteng leh natna chiteng hihdam ding in a thuneihna a pia hi.

²Huai sawltak sawmlehnihte min hiaite ahi: A masapen in Simon Peter, leh a unau Andru; Zebedai tapa Jakob leh a unau Johan,

³Philip leh Bartholomai; Thomas leh siahkhawn Matthai: Alphai tapa Jakob leh Thaddai;

⁴Kanan mi Simon leh zuausan a mansakpa Judas Iskariot.

⁵Hiai sawmlehnihte Jesu’n a sawlkhia a, a kiang uah huchi in thu a pia hi. “Jentelte lam ah paikei unla, Samari mite khua ah leng lut kei un.

⁶Himahleh Israel inkuan belam mangte kiang ah paizaw un.

⁷Huan, na pai un, van gam a naita, chi in, thu genzel un.

⁸Damloute hihdam unla, misite kaithou unla, phakte hihsiangthou unla; dawite hawlkhia un, a thawn in na mu ua, a thawn in pia un.

⁹Na kawnggak uah dangkaeng hiam, dangka hiam, dal dangka hiam tawi kei un.

¹⁰Zinna ading in kawlzal hiam, puanak nih hiam, khedap hiam, chiangkhun hiam tawisam kei un; nasemmi nekding mutak ahi.

¹¹“Huan kholian hi in khoneu hitaleh na lutna peuh uah nou hon tungsaktak mi zongkhia unla, na pawtnawn mateng uh huai inn ah tungden un.

¹²A inn ua na lutpeuh chiang un, chibai buk un.

¹³Huai inn a mite chibai buktak a hih uleh na khamuanna uh a tung uah a tung dia; a takkei ua leh na khamuanna uh nou tung ah hong kiknawn ding hi.

¹⁴Kuapeuh nou hon kipahpihlou a, na thu uh leng a ngaihkhiak kei uleh, huai inn a kipan leh huai khua a kipan na pawt chiang un, na khepek ua leivui tatkhia un.

¹⁵Chihtaktak in k’on hilh ahi, thukhen ni chiang in huai khua sang in Sodom leh Gomorrah gam thuak ding a dan a omzaw ding hi.

¹⁶“Ngai dih ua, ngia lak a belam om bang in k’on sawlkhia hi: gul bang a pilvang, vakhu bang a poi khoihlou in om un.

¹⁷Himahleh mihing lak ah pilvang un: vaihawmmite a hon mansak ding ua, kikhopnain ah a hon vuak ding ziak un.

¹⁸Keimah ziak in gamukte leh kumpipate ma ah amaute leh Jentelte theihsakna ding in a honpi ding uhi.

¹⁹Himahleh a hon matsak chiang un, bangchih ding ahia, bang thu ka gen dia? chi in lungkham kei un; na gen ding uh a huntak in a hon theisak ding hi.

²⁰A genpa noumau na hi kei ding ua, na Pa uh Kha in noumau ah a genzaw ding hi.

²¹Huan hihlup ding in unaupa leh unaupa a kimansak ding ua, pa’n leng a ta a mansak ding; tate’n leng a nu leh a pate uh a dou ding uh, a hihlumsak ding uhi.

²²Ka min ziak in mi tengteng huat na hi ding uh; himahleh a tawppha a thuakngap peuhmah hotdam in a om ding hi.

²³Huchi in hiai khua a hon gawt chiang un, khaw dang ah taisan un; chihtaktak in k’on hilh ahi, Mihing Tapa hongpai ma in Israel gam a khopite na siksuak kei ding uhi.

²⁴“Nungzui a heutu tung ah a omkei; sikha leng a pu tung ah a omkei hi.

²⁵Nungzui a heutu bang a a hongom leh sikha a pu bang a a hongom tuh a hun e. Inn neipa bawn Beelzibul a chih uleh, a inkuanpihte nak chihna tel un chia!

²⁶“Huaiziak in amaute kihta kei un; langlou ding a sel bangmah a omkei, theihlouh ding a im bangmah a omkei hi.

²⁷Mial a nou k’on hilh vak ah na gen ding ua; bilbul a na zak uh intung a tuang in tangkoupih un.

²⁸Huan sapum that a kha that theiloute kihta kei unla; Gehenna a kha leh sapum hihmang theipa kihta zaw un.

²⁹Kawlgit nih dal dangka khat in a zuakzel uh hilou hiam? Himahleh a lak ua khat leng na Pa uh theihlouh in lei ah a ke kei ding hi.

³⁰Na samzangte uh nangawn leng simvek ahi.

³¹Huaiziak in lau kei un; kawlgit tampi sang in na manpha zaw uhi.

³²“Huchi in mite ma a hon gum peuhmah, ka Pa van a om ma ah ka gum sam ding hi.

³³Himahleh kuapeuh mite ma a hon kitheihmohbawl, ka Pa van a om ma ah ka kitheihmohbawl sam ding hi.

³⁴“Leitung a lemna lengsak ding a hongpai honsa kei un; lemna lengsak ding hilou in namsau lengsak ding a hongpai ka hi zaw.

³⁵Mi a pa dousak ding in, tanu a nu dousak ding in, mou a nu dousak ding a hongpai ka hi.

³⁶Mi a melma amah inkuanpihte lak a mi mah ahi ding hi.

³⁷Kuapeuh a nu hiam, a pa hiam, kei sang a it zaw tuh ka mi hitak ahi kei; kuapeuh a tanu hiam a tapa hiam kei sang a it zaw leng, ka mi hitak ahi kei.

³⁸Kuapeuh a Kros pua a hon zuilou ka mi hitak ahi kei.

³⁹Kuapeuh a hinna mu in a tan ding a, keimah ziak a a hinna tan in a mu ding hi.

⁴⁰“Kuapeuh nou hon kipahpih in kei hon kipahpih ahi a, kuapeuh kei hon kipahpih a hon sawlpa kipahpih ahi.

⁴¹Zawlnei kua hiam, zawlnei a hih ziak a kipahpih in zawlnei kipahman a mu ding; kuapeuh mi diktat kua hiam mi diktat a hih ziak a kipahpih in mi diktat kipahman a mu ding hi.

⁴²Huan kuapeuh hiai mi neuchikte lak a khat kiang a, nungzui a hih ziak a tuisik nou khat kia pia leng, chihtaktak in k’on hilh ahi, a kipahman a tan kei hial ding” a chi hi.