Read Paite Chin MATTHAI 11 Bible Online

MATTHAI 11 - Paite Chin bible

MATTHAI 11

¹Huan hichi ahi a, Jesu’n a nungzui sawmlehnihte thu a piakzawh in huai apan in a khopite ua sinsak ding leh thugen ding in a paita uhi.

²Johan in suangkulh sung a Khrist thilhihte a na zak in a nungzuite sawl in a kiang ah,

³“Hongpai dingpa na hi hia, ahihkeileh midang hungaih lai ding ka hi uhia?” a chisak hi.

⁴Huan Jesu’n a kiang uah, “Painawnta unla, thil na muh uh leh na zak uh Johan kiang ah vahilh un:

⁵Mittawte a mit uh a hongvakta, khebaite khe in a hongpai ua, phakte a hong siangthouta ua, bengngongte leng a bil uh a hongvakta, misite leng kaihthoh in a omta ua; a mizawngte’n leng Tanchinhoih hilh a dongta uhi.

⁶Kuapeuh ka tung a lunghihlouhna mulou a hampha uhi” chi in a dawng hi.

⁷Huai mite a paitak un, Jesu’n mipite kiang ah Johan thu a genta hi: “Bang ending a gamdai a paikhia neita ua? Sialluang huihmut ling maw?

⁸Ahihkeileh bang ending pen a paikhia neita ua? Puannem silh maw? Ngai un, puannem silhte zaw kumpipate in ah eive a om uh.

⁹Ahihkeileh bang ziakpen in ahia na paikhiak uh? Zawlnei ending in maw? Ahi tawk vaw oi, k’on chi ahi, zawlnei sang a leng thupizaw.

¹⁰‘En dih ka thangkou na ma ah ka sawl ahi, aman na ma ah na lampite a bawl ding chih a tanchin a gelh uh hiai mipa ahi.’

¹¹Chihtaktak in, k’on hilh ahi, numei suan lak ah baptispa Johan sang a thupizaw a piang kei; himahleh van gam a mi neupen amah sang in a thupizaw uhi.

¹²Baptispa Johan om a kipan tutan in van gam in hiamgamna a tuaknak, hiamgamte’n hat thu in a la hi.

¹³Zawlneite tengteng leh danthu in Johan a hongom tanpha in a na genkhol zel uhi.

¹⁴Na pom nop uleh, huai zaw Elijah hongpai dingpa mah ahi.

¹⁵Kuapeuh zakna ding a bilnei in za hen!

¹⁶“Himahleh tulai khangte bang toh ka tehpih dia? Naupang dawlmun a tu a, a lawmte sam a,

¹⁷Tamngai hontum sak ung a, lam lou uchin a, kap huphup ung a, sunlou uchin a, chite bang ahi uhi.

¹⁸Johan a hongpai a, ne in a dawn kei a, dawizawl, a chi uhi.

¹⁹Mihing Tapa a hongpai a, ne in a dawn a, En dih ua, anhaipa, uain haipa, siahkhonte leh mikhialte lawm, a chi uhi. Himahleh pilna a tate’n siam a tan uh” a chi hi.

²⁰Huan a kisiklouh ziak un, a thil thupi hihtamna khopite a tai hi.

²¹“Korazin, na tung gik e; Bethsaida, na tung gik e; noumau a thil thupi kihihte Tura leh Sidon khua a hih hileh, saiip puansilh a vutlak a tu in a kisikta ding uhi.

²²Himahleh k’on hilh ahi, thukhen ni chiang in nou thuak ding sang in Tura leh Sidon khua thuak ding a dan a omzaw ding hi.

²³Huan nang Kapernaum, van tan a tawisang na hidia hia? Misi khua tan a paisuk ding neive, nangmah a thil thupitak kihihte Sodom khua a hih hileh, tutan in a omlai ding hi.

²⁴Himahleh k’on hilh ahi, thukhen ni chiang in na thuak ding sang in Sodom gam thuakding a dan a omzaw ding” a chi hi;

²⁵Huchihlai in Jesu’n a houpih a, “Pa aw, leitung leh van Toupa, nang mi pil leh mi bengvakte kiang ah hiai thu na im a, naungekte kiang a na theihsak ziak in k’on phat hi.

²⁶Ahi, Pa, tua bang hih, nang ngaih in a hoih ahi.

²⁷Ka Pa’n thilbangkim hon kemsakta; Pa lou in kuamah in Tapa a theikei; Tapa leh a kiang ua Tapa in a kitheihsak utnate kia loungal in kuamah in Pa a theikei hi.

²⁸“Nou semgim leh puakgik paw tengteng aw, ka kiang ah hongpai un, keiman khawlna k’on pe ding hi.

²⁹Ka hakkol pua unla, kei a kipan zil un; thunuailut leh lungtang kingainiamtak ka hi; huchi in, na kha ua ding in khawlna na mu ding uhi.

³⁰Ka hakkol a nuam a, ka puak leng a zang hi” a chi hi.