Read Paite Chin MATTHAI 12 Bible Online

MATTHAI 12 - Paite Chin bible

MATTHAI 12

¹Huchihlai in, Jesu khawlni’n buhlei kantan in a pai hi; nungzuite a gilkial ua, buhvuite khiak in, a neta uhi.

²Pharisaite’n huai a muh un, a kiang ah, “En dih, na nungzuite’n khawlni’n hihsianglou a hih uh” a chi uhi.

³Jesu’n a kiang uah, “David in a gilkial lai a a lawmte toh a thilhih uh na simkei ua hia?

⁴Huchi a Pathian inn a a lut a, amah leh a lawmte’n nek sianglouh, siampute kia neksiang tanghou koihtuam a nek thu uh?

⁵Ahihkeileh khawlni’n Pathian biakin a siampu omte’n khawlni a bohsiat un leng siamtang in a om uh chih danthu na simkei ua hia?

⁶Huchi a hih ngal leh, Pathian biakin sang a thupizaw hiai ah a om chih k’on hilh ahi.

⁷Himahleh ‘kithoihna deihlou in, zahngaihna ka deih’ chih a omdan na thei hile uchin, mi siamtangte siamlouh tangsaklou ding hive uchin.

⁸Mihing Tapa zaw khawlni Toupa ahi,” a chi hi.

⁹Huan huai a kipan a pai a, a kikhopnain uah a valut hi.

¹⁰Ngai dih, mi khat khutzaw a na om a, amah a hektheihna ding un, “Khawlni a hihdam a siang hia?” chi’n Jesu a dong uhi.

¹¹Aman a kiang uah, “Noute lak ah kuapeuh in belam khat nei unla, khawlni’n kawkhuk ah keta leh kua ahia len a kaikhelou ding?

¹²Belam khat sang in mihing khat bangchilel a manpha zaw ahia? Huaiziak in khawlni’n hihhoih a siang hi” a chi hi.

¹³Huaizoh in, huai mi kiang ah, “Na khut zan in” a chi hi, huchi in a zan a, a langkhat bang in a damsiangta hi.

¹⁴Pharisaite bel a pawt ua, amah a hihlup theihna dan ding uh ngaihtuah in a kihou uhi.

¹⁵Jesu’n huai thu a theih in huai mun a kipan in a kihemmang hi. Himahleh mitampi in amah a zui ua, a damloute a na hihdam vek hi.

¹⁶A tanchin genthang hetlou ding in a kiang uah a chi hi.

¹⁷Huai zawlnei Isai thugenkholh a tangtunna ding ahizaw hi:

¹⁸“En dih, ka sikha ka tel, ka deihtak, ka lungsim in a pahtak mahmah, a tung ah ka Kha ka koih dia, huchi in, Jentelte kiang ah dik a vaihawmna a ensak ding hi;

¹⁹A selkei ding a, a kikou sam kei ding a, kongzing ah kuamah in a aw a za sam kei ding uhi.

²⁰Dik a vaihawmna a vualzohsak mateng sialluang kigawpsa a hihtan khekei ding a, meivak kuang liakliak a hihmit sam kei ding hi.

²¹Amah min ah Jentelte’n lametna a ngah ding uh” a chi hi.

²²Huchihlai in dawimat mittaw pautheilou khat a kiang ah a honpi ua; aman a hihdam a, pautheilou hongpau in, a hon muthei ta hi.

²³Huchi in mipi tengteng in lamdang a sa mahmah ua, “Hiai mipa, David Tapa hilou ahi maw?” a chi uhi.

²⁴Himahleh Pharisaite’n huai a zakphet un, “Hiai mi’n dawite kumpipa, Beelzibul ziaklou in dawite a delhkhe kei ding” a chi uhi.

²⁵Jesu’n amaute ngaihtuahte a thei a, a kiang uah, “Koi gam leng amah kidou a mangthang nak; koi khua hiam, inkuan khat leng amah kidou, a khosuak kei ding hi.

²⁶Setan in Setan mah a delhkhiak in amah leh amah kidou hi ding hi a; a gam bangchi’n ading dia le?

²⁷Huan kei Beelzibul ziak a dawite delhkhia ka hihleh, na tate un kua ziak in ahia leh a delhkhiak uh? Huaiziak in, amaute noute tung a thukhenmite ahi ding uhi.

²⁸Himahleh, ken Pathian Kha ziak a dawite delhkhia ka na hihleh, Pathian gam na kiang uah hongtungta ahi ding hi.

²⁹Huchi ahihkei ngal in, min mi hat a gak masak phot kei leh bangchi’n ahia mi hat inn a lut a, a sum a laksak theih ding? Huai nung in a inn a lok mai ding hi.

³⁰Kuapeuh kei lam a panglou, hondou ahi; kuapeuh hon lakkhawm pihlou in a thehzak ahi.

³¹Huaiziak in k’on hilh ahi, mi a khelhna chiteng uah leh Pathian a gensiatna chiteng uh ngaihdam a hi ding ua: Kha hilhial a gensiatna ngaihdamsak ahi kei ding hi.

³²Kuapeuh Mihing Tapa kalh, a kalhna uh ngaihdamsak ahi ding: kuapeuh Kha Siangthou hilhial kalh zaw huai a kalhna uh, tu damsung leh hun hongtung ding ah leng, ngaihdam a hi kei ding” a chi hi.

³³“Sing hoih a gah leng a hoih na chih kei ngal uleh, sing sia a gah leng a sia, chi vanglak un: sing a gah a a kitheih ziak in.

³⁴Gul suante aw, nou gilou napi in bangchi’n ahia thuhoih na gen theih ding uh? Lungtang a dimval kam in a genzel hi.

³⁵Mi hoih in a goubawm hoih a kipan thil hoihte a hon lakhia a, migilou in a goubawm hoihlou a kipan thil hoihlou a hon lakhe zel hi.

³⁶Huan k’on hilh ahi. Mite’n thuginalou a gen peuhmah uh huai thu tanchin mah vaihawm nichiang in a gen ding uhi.

³⁷Na thu in siam a hon tangsak dia, na thu mah in siamlouh a hon tangsak ding hi” a chi hi.

³⁸Huailai in laigelhmite leh Pharisaite lak a mi kuate hiam in amah a houpih ua a kiang ah, “Heutupa, nang a kipan chiamtehna muh ka ut uh” a chi uhi.

³⁹Aman a kiang uah, “Khang gilou leh angkawmte’n chiamtehna a zong ua, himahleh zawlnei Jonah chiamtehna loungal a kiang uah chiamtehna piak ahi kei ding hi.

⁴⁰Jonah ni thum leh zan thum ngapi gilsung a a om bang in, Mihing Tapa ni thum leh zan thum lei gilsung ah a omsam ding hi.

⁴¹Ninevi khomite thukhen ni chiang in tulai khangte kiang ah ading sam ding ua, siamlouh a tangsak ding uh. Jonah thugen ziak in a kisik ua: ngai dih ua, Jonah sang a thupizaw hiai ah a om hi.

⁴²Simlam kumpinu thukhen ni chiang in hiai khangte kiang ah a thou ding a, siamlouh a tangsak ding hi, Solomon pilna ngaikhe ding in kawlmong a kipan a hongpai ngal a; ngai dih ua, Solomon sang a thupizaw hiai ah a om hi!

⁴³“Huan dawinin mihing sung a kipan a pawt in, khawlna zong in tui omlouhna mun ah a vakvaka, a mu kei hi.

⁴⁴Huan ‘ka pawtna inn mah ah ka kiknawn mai ding’ a chi a: a vatun leh a hawm a zephoihsa in a va mu hi.

⁴⁵Huaitak in a vapai a, amah sang a gilou zaw dawi dang sagih a honpi a, huai mi sung ah a lut ua, a tengta uhi: huai mihing omdan nanung amasa sang in a hong hoihkei zaw hi. Tuabang mah in, tulai khang giloutakte tung a a hongom ding” chi’n a dawng hi.

⁴⁶Mipite kiang a thu a genlai in ngai dih, a nu leh a unaute amah houpih tum in, inn pua ah ading uhi.

⁴⁷Mi khat in a kiang ah, “Ngai dih, na nu leh na unaute nang hon houpih tum in inn pua ah ading nilouh uh” a chi hi.

⁴⁸Aman a hilhpa kiang ah, “Ka nu kua ahia? Ka unaute leng kuate ahia ua?” chi in a dawng hi.

⁴⁹Huan nungzuite lam a a khutzan in, “En un, ka nu leh ka unaute:

⁵⁰Kuapeuh ka Pa van a om deihlam hihphot ka unau, ka sanggam nu leh ka nute ahi uh” a chi hi.