Read Paite Chin MATTHAI 13 Bible Online

MATTHAI 13 - Paite Chin bible

MATTHAI 13

¹Huai ni’n Jesu inn a kipan a paikhia a, dilgei ah a tu hi.

²Huan a kiang ah mipi thupitak a hong kikhawm ua, huchi in long ah a tuang a, a tu a, mipi tengteng piautak ah ading uhi.

³Gentehna in thu tampi a kiang uah a gen hi: “Ngai dih ua, buhchithehpa buhchi theh in a kuan hi.

⁴Buhchi a thehlai in a khen lamsik ah a kia a, vasate’n a nezou uhi.

⁵A khen suangsilei lak ah a kia a: lei a sahlouh ziak in a hong poupah hi:

⁶Himahleh ni a suah in haivuai in a om a: zung a neih louh ziak in, a vuai maimah hi.

⁷Huan a khen loulingnei lak ah a kia a, loupa a hong pousang a: a depmangta hi.

⁸A khen leihoih ah a kia a, khenkhat a leh za, khenkhat a leh sawmguk, khenkhatte a leh sawmthum in a honggah uhi.

⁹Kuapeuh bil nei in, za hen!” a chi hi.

¹⁰Huan nungzuite a hongpai ua, a kiang ah, “Bangdia gentehna a thu gen na hia?” a chi uhi.

¹¹Aman a dawng a a kiang uah, “Van gam thuguk noute theih phal ahi a, amau theihzaw phal ahi kei hi.

¹²Kuapeuh a nei piak behlap ahi ding a, a hau ding; kuapeuh a neilou a neihsun leng laksak ahi ding hi.

¹³Huchi a hih ziak in a kiang uah gentehna in thu ka gen ahi; ‘mu napi’n a mu kei nak ua, za napi’n a theisiamkei nak uhi.’

¹⁴Isai thugenkholh a tung uah a tung hi: ‘Bil in zaw na za ding ua, a theih zaw na theisiam kei ding uh; muh zaw na mu ding ua, theihzaw na theikei ding uh;

¹⁵Hiai chite lungtang a nang gawpta a bilte uh a ngong a, a mitsi ua, huchilou in zaw a mit un a mu ding ua, a bil un a zakha ding ua, a lungtang un a theisiam ding ua, a hong kiknawn kha ding ua, amau ka na hihdam kha ding’ a na chi hi.

¹⁶Nou mitte zaw a hampha hi, a muh ziak in; na bil uh leng a hampha hi, a zak ziak in.

¹⁷Chihtaktak in k’on hilh ahi, zawlnei tampi leh mi diktat tampi’n leng na thilmuhte uh muh a ut ua, himahleh a mu kei uh; na thilzakte uh zak a ut ua, himahleh a zakei uhi.

¹⁸“Huaiziak in, buhchithehpa gentehna thu za un;

¹⁹Kuapeuh in kumpi gam thu bil a a zak a, a theihsiamkei leh migilou a hongpai a, a lungtang a thehsa a laksak nak hi. Huai tuh lamsik a theh ahi.

²⁰Suangsilei a theh bel, thu za a kipaktak a pom bang ahi;

²¹Himahleh amah ah zung a omkei a, sawtlouchik kia a om a, thu ziak a gimthuakna leh sawina a hongom tak in a pukpah hi.

²²Huan loulingnei lak a thehte tuh thu za a, himahleh khovel awlmohna leh hauhsakna khemna in thu a dep a, gahlou in a hongom hi.

²³Huan leihoih tung a theh tuh thu bil a za a, theisiam ahi; huai tuh a gah ngei a, khenkhat a leh za, khenkhat a leh sawmguk, khenkhat a leh sawmthum in a pung” a chi hi.

²⁴Gentehna dang a kiang uah a gen nawn a; “Van gam tuh mi a lou a chi hoih thehpa toh teh ahi.

²⁵Himahleh mi a ihmut kal in melma a hongpai a, buh lak ah buhlem a theh a, a paimang nawnta hi.

²⁶Huan buh a hongpou a a hongvuih in buhlem leng a hong kilang sam hi.

²⁷Huchi in inneipa sikhate a hongpai ua, a kiang ah, Pu, na lou a chi hoih thehlou na hi maw? Buhlemte koi a kipan a hongom ahia? a chi uhi.

²⁸Aman a kiang uah, melma in na theh eive, a chi hi. Sikhate’n a kiang ah ahihleh ‘huaite va lakhawm le ung hoih na sa hia?’ a chi uhi.

²⁹Aman bel, ‘salou e, buhlem na lakkhawmna lam uah buh na botkhawm kha ding uh.

³⁰Buhlak dong in poukhawm uheh; buhlak hun chiang in buh atte kiang ah, buhlem lakhawm masa phot unla, hal ding in lomgak un; buh pen bel ka buh in ah seklut un, ka chi ding’ ” a chi hi.

³¹Gentehna dang a kiang uah a gen nawn a; “Van gam tuh ankam chi tang khat min a lak a, a lou a a theh bang ahi.

³²Huai chi laklak ah a neupen a; himahleh a hongpou sang chiang in loupa lak ah a lianpen a, sing a honghi a, huchi in tungleng vasate a hongpai ua, a hiang ah a giak uh” a chi hi.

³³Gentehna dang a kiang uah a gen nawn a; “Van gam tuh numei in silngou anbuang tehna thum lak a a bilh a, avek a a thoh mateng a phum bang ahi” a chi hi.

³⁴Jesu’n huai tengteng gentehna in mipite kiang ah a gen a, gentehna lou in a kiang uah bangmah a genkei hi;

³⁵Zawlnei in, “Gentehna in ka kam ka ka ding a, leilung pian tung a kipat thil kisel ka genkhe ding” chi a a gen a hongtun theihna ding in.

³⁶Huailai in mipite a paisan a, inn ah a lut a, nungzuite a kiang ah a hongpai ua, “Lou a buhlem gentehna thu hon hilhchian in” a chi uhi

³⁷Aman a dawng a, “Chi hoih thehpa Mihing Tapa ahi a; lou bel khovel ahi.

³⁸Chi hoihte gam tate ahi ua; buhlemte migilou tate ahi.

³⁹Melma buhlem thehpa Diabol ahi a, buhlak hun khovel tawpna ding ahi; a atte angelte ahi uhi.

⁴⁰Huchi in buhlemte a lakhawm ua mei a a hal bang un khovel tawpna ah a om ding hi.

⁴¹Mihing Tapa in angelte a sawlkhe ding a, gam a kipan hihkhial sakte leh thil hihkhialte tengteng a khawmkhe ding uhi.

⁴²Amaute haltuina mei ah a pai ding ua, huailai ah kah leh hagawi a om ding hi.

⁴³Huai hun chiang in mi diktatte a Pa uh gam ah ni bang in a tang ding uhi. Zakna ding a bil nei peuh in za hen!

⁴⁴“Van gam tuh lou a gou phumguk bang ahi; huai min a mu a, a sel a, a kipah ziak in a neih tengteng a zuak a, huai lou a leita hi.

⁴⁵“Huan Van gam tuh sumsinmi tuikepsuang hoihtak zawngmi bang ahi nawn hi;

⁴⁶Huan aman tuikepsuang manpha tak khat a mu a, a neih tengteng zuak in a leita hi.

⁴⁷“Van gam tuh lenpi, tuipi a paih, chichih tunkhawmna bang ahi nawn hi.

⁴⁸A dimtak in a gei ah a kaikhia ua, a tu ua, a hoih teng bawm ah a lakhawm ua, a hoihloute a paih uh bang ahi.

⁴⁹Khovel tawp hun chiang in huchi bangmah in a om ding, angelte a hongpawt ding ua, mi diktatte lak ah migiloute a khenkhe ding uhi.

⁵⁰Huchi in haltuina mei ah a pai ding uh, huai ah kah leh hagawi a om ding, a chi hi.

⁵¹“Jesu mah in a kiang uah, “Huai tengteng na theisiam uhia?” a chi a, amau a kiang ah, “Thei e” a chi uhi.

⁵²Huan aman a kiang uah, huaiziak in Laigelhmi van gam thuhilh a om peuhmah, inn neipa, a goubawm a kipan a thilthakte leh thilluite pholhkhepa bang ahi” a chi hi.

⁵³Huan hichi ahi a, Jesu’n huai gentehnate a genkhit in huai a kipan a paita hi.

⁵⁴A omna kholam a tung a, a kikhopnain uah amaute thu a hilh a, huchi in lamdang a sa mahmah uhi, “Hiai min hiai pilna leh hiai nasep thupi hihtheihnate koi a pat a a muh ahia?

⁵⁵Hiai mi singlem bawlpa tapa hilou hia? A nu Mari kichi hilou hia? A unaute Jakob, Joseph, Simon, Judas kichite hilou uhia?

⁵⁶Hiai mi phiangsan in koi a kipan a hiai tengteng mu ahia? A sanggamnute leng i kiang ua omvek hilou uhia?” a chi uhi.

⁵⁷Huchi in, a tung ah a lungkim kei uhi. Himahleh Jesu’n a kiang uah, “Zawlnei amah kholam leh amah inn lam loungal ah pahtawilouh in a om ngeikei” a chi hi.

⁵⁸A ginlouh ziak un huai ah nasep thupi dang tam ahihkei hi.