Read Paite Chin MATTHAI 14 Bible Online

MATTHAI 14 - Paite Chin bible

MATTHAI 14

¹Huailai tak in kumpipa Herod in Jesu tanchin a naza hi.

²A sikhate kiang ah thu a gen a, “Hiai Baptispa Johan ahi; misi lak a kipan thounawn ahi; huaiziak in huai thilhihtheihnate’n amah a sem ahi” a chi hi.

³Herod in a unau Philip zi, Herodia ziak in Johan a man a, a hen a, suangkulh ah a na khum hi.

⁴Johan in a kiang ah amah na neih a siangkei, a chih ziak in.

⁵Johan hihlup ut mahleh mipi a kihta a, zawlnei a a bawl ziak un.

⁶Himahleh Herod pianni a hongtun in Herodia tanu a lai ah a lam a, Herod a kipaksak hi;

⁷Huai phet in a nget peuhmah pe ding in thu a kichiam hi.

⁸Aman a nu thuhilh in, hiai kuang ah Baptispa Johan lutang honpia in, a chi hi.

⁹Kumpipa a lungkhamta a, himahleh a thuchiamte leh a Ankuang umpihte ziak in piak ding thu a pia hi.

¹⁰Huchi in mi a sawl a, Johan lutang a tansak hi.

¹¹Huan kuang in a lutang a honla ua, numei naupang kiang ah a pia ua, aman a nu kiang ah a paipihta hi.

¹²Johan nungzuite’n a luang a hongla ua, a vui ua, huchi in Jesu a va hilh uhi.

¹³Jesu’n huai a zak in, hiai a kipan long in gamkeu lam ah a paituamta hi. Himahleh mipi’n a zaktak un khua a kipan khe a pai in a zuita uhi.

¹⁴Huchi in amah a hong paikhiak leh mipi thupitak a mu a, a hehpih mahmah a, a damloute uh a hihdam sak hi.

¹⁵Nitaklam a hong hih in, nungzuite a kiang ah a hongpai ua, “Hiai mun gamkeu ahi a, ni a kaita a, mipite khuate a pai a, amau ading nek ding a lei theihna ding un paisakta in” a chi uhi.

¹⁶Jesu’n a kiang uah, “A paimang uh kiphamoh kei, noumau nekding pia un” a chi hi;

¹⁷Amau a kiang ah, “Hiai ah tanghou phel nga leh ngasa nih kia i nei uh” a chi uhi.

¹⁸Aman “Huaite ka kiang ah honla un” a chi hi.

¹⁹Huchi in loupa tung a tu ding in mipite thu a pia a, tanghou phel nga leh ngasa nihte a la a, vanlam en in a vualzawl a, a balkham a, tanghoute nungzuite kiang ah a pia a, nungzuite’n mipite kiang ah a pesawn uhi.

²⁰Huan avek un a ne ua, a vah chiatta ua; a khamval uh bawmpi sawmlehnih dim a ngah uhi.

²¹A nete numei leh naupang simlouh in, piching ngen sang nga vel ahi uhi.

²²Huan mipite a sawlmang khit in a paima a galkhat a na pai masa ding in nungzuite long ah a tuangsak teitei hi.

²³Mipite a paimang nung in thum ding in tang ah a tuam in a paitou a, nitaklam a hong hih in huai ah amah kia in a omta hi.

²⁴Long dil laitak ah a omta a; huih in a hilou lam a a sawn ziak in tuikihawt in a septa hi.

²⁵Zan ven lina ah Jesu dil tung ah khe a pai a, a kiang lam uh honzuan in a mu uhi.

²⁶Nungzuite’n amah dil tung a khe a pai a muh un, “Sikha ahi” chi in a buai ua, lau in a kikou ta uhi.

²⁷Himahleh Jesu’n amau a houpih paha, “Khamuangtak in om un, keimah ka hi, lau kei un,” a chi hi.

²⁸Peter in a dawng a, “Toupa, nang na hihleh tui tung ah nang kiang a hongpai thu honpia in” a chi hi.

²⁹Huan aman, “Hong paive” a chi a, Peter long a kipan a kum a, Jesu kiang zuan in tui tung ah khe in a paita hi.

³⁰Himahleh huihnung a muh in a lau a, tum din a kisa a, “Toupa, hon hondam in” chi in a kikou hi.

³¹Jesu’n a sawkpah a, amah a len a a kiang ah, “Nang gintawm, bangdia ginglah na hia?” a chi hi.

³²Huan long a a tuan uleh huih a daita hi.

³³Long a omte’n, “Pathian Tapa na hi taktak hi” chi’n, amah a bia uhi.

³⁴Huan galkhat lam a kai uleh, Gennesaret gam a hongtung uhi.

³⁵Huai mun a mite’n amah a theihtak un, huai kim gam tengteng ah mi a sawl ua, damlou tengteng a kiang ah a honpi ua;

³⁶A puanmong bek khoih theih a ngen ngutngut ua; huan a khoih peuhmah a dam zel uhi.